Նաիրա Զոհրաբյանը՝ ԱԺ արտահերթ նիստում (7-ը հունիսի 2018 թ.)

Ես Երևանի ֆանատն եմ. քաղաքապետի թեկնածուն՝ «գնդակահարության» և իր ծրագրերի մասին. բացառիկ

243
(Թարմացված է 12:26 06.09.2018)
«ԲՀԿ» քաղաքապետի թեկնածու Նաիրա Զոհրաբյանը պատմել է իր սիրած փողոցի, մայրաքաղաքի խնդիրների և նախկին իշխանության սխալների մասին։

ԵՐԵՎԱՆ, 5 սեպտեմբերի — Sputnik, Նանա Մարտիրոսյան. Երևանի ավագանու ընտրությունները կկայանան սեպտեմբերի 23-ին։ Այնուհետև ավագանին քաղաքապետ կընտրի։ Sputnik  Արմենիան բացառիկ հարցազրույցներ է ներկայացնում քաղաքապետի թեկնածուների հետ։

Առաջինը հարցերին պատասխանել է «Բարգավաճ Հայաստան» կուսակցության թեկնածու Նաիրա Զոհրաբյանը։

– Ինչո՞վ է Երևանը տարբերվում աշխարհի մյուս մայրաքաղաքներից։

– Ամեն ինչ շատ պարզ է. Երևանն իմ քաղաքն է, իմ կյանքի մայրաքաղաքը։ Երևանի երկրպագուն եմ։ Սիրահարված եմ նրան։ Ինձ համար այն լավագույն քաղաքն ու լավագույն մայրաքաղաքն է։

– Ձեր սիրած փողո՞ցը Երևանում։

– Սիրում եմ զբոսնել քաղաքով։ Ամեն օր ոտքով առնվազն 10 կմ եմ անցնում։  Զբոսնում եմ Հրազդանի ձորում, Ծիծեռնակաբերդի տարածքում, Կենտրոնում, սակայն սիրած փողոցս` մանկությանս փողոցն է, որտեղ ծնվել և մեծացել եմ։ Սիրում եմ Արամ Խաչատրյան փողոցը։

– Ի՞նչն է պակասում քաղաքին։

– Շատ բան է պակասում Երևանին նրա համար, որ այն կյանքի համար հարմարավետ քաղաք դառնա։ Մի շարք խնդիրներ կան, և շուտով մենք կներկայացնենք այդ խնդիրների լուծման մեր առաջարկները։ Ուզում եմ, որ դրանք  վերացնելուց հետո, մենք կարողանանք հպարտությամբ հայտարարել, որ Երևանը լավագույն քաղաքն է ապրելու համար։

– Ինչո՞վ կարելի է զբաղվել միայն Երևանում։

– Երևանում կարելի է և պետք է ապրել, արարել ու աշխատել։ Երևանը խելահեղ էներգետիկա ունի։ Աշխարհի մի շարք մեգապոլիսներում եմ եղել, և միայն Երևան վերադառնալու ցանկություն է առաջանում։ Երևանը մեր տունն է, բոլորի մոտ և միշտ այստեղ վերադառնալու  ցանկություն պետք է առաջանա։

– Ձեր կարգախոսը…

– Մեր թիմի հետ առաջիկա Ավագանու ընտրությունների համար կարգախոսների մի շարք տարբերակներ ենք քննարկել։ Անձամբ իմ կարգախոսը, որը թիմի անդամները չհավանեցին. «Ապրելու քաղաք` Երևանս»։

– Երևանի մասին, ո՞ր երգն եք ավելի շատ սիրում։

– Երևանի մասին լավագույն երգն ինձ համար միշտ եղել ու մնում է «Էրեբունի-Երևան»–ը։ Սակայն նախընտրական արշավի մեկնարկից հետո մենք անակնկալ կմատուցենք, մի երգ, որը բոլորին դուր կգա։ Սակայն միևնույն է «Էրեբունի–Երևան»–ը մեր հարազատ քաղաքին նվիրված լավագույն երգն է։

– Երևանում առկա ո՞ր խնդիրն եք առավել մեծ  համարում։

– Քաղաքի խեղաթյուրված տեսքը։ Քաղաքն ինչի ասես, որ նման չէ, միայն թե ոչ այն Երևանին, որն ապրում է մեր հուշերում, և որին, անձամբ ես կարոտում եմ։

– Ո՞ր շենքը կարող է որպես քաղաքի այցեքարտ ծառայել։

– Միանշանակ, Էրեբունի քաղաք–ամրոցը։ Ամբողջ աշխարհում նման պատմամշակութային հին շենքեր հատուկենտ են, սակայն այն ուշադրության չի արժանանում։ Եթե ես քաղաքապետ դառնամ, ապա քաղաք–ամրոցը քաղաքի գլխավոր մուտքը կդառնա։ Հենց այնտեղից պետք է սկսվի Երևանը։

– Քաղաքային իշխանությունների ո՞ր սխալը կարելի է ամենալուրջ սխալը համարել։

– Քաղաքային իշխանություններն այնքան սխալներ են թույլ տվել, որ եթե սկսենք դրանք թվարկել, ապա Քրեական օրենսգրքում ստիպված կլինենք վերականգնել մահապատիժը, և նախկին կառավարիչների մեծ մասին ուղղակի գնդակահարել։

– Ինչպե՞ս է հնարավոր քաղաքին վերադարձնել այն կոլորիտը, որը, երևանցիների մեծ մասի կարծիքով, կորցրել ենք։

– Դրա համար պետք է սեր ու հավատարմություն, ինչպես նաև քաղաքի բոլոր բնակիչների համատեղ աշխատանքը։

243
թեգերը:
Հայաստան
Ըստ թեմայի
ԲՀԿ–ն հրապարակել է Երևանի քաղաքապետի իր թեկնածուի անունը
Մանե Գևորգյան

Փաշինյանի խոսնակը պատասխանել է Գագիկ Ծառուկյանին

398
(Թարմացված է 00:26 06.06.2020)
Մանե Գևորգյանը կարծում է, որ Ծառուկյանը պարզապես մտահոգված է մի շարք քրեական գործերի ընթացքով։

ԵՐԵՎԱՆ, 6 հունիսի – Sputnik. ՀՀ վարչապետ Նիկոլ Փաշինյանի խոսնակ Մանե Գևորգյանն արձագանքել է «Բարգավաճ Հայաստան» կուսակցության նախագահ Գագիկ Ծառուկյանի այն հայտարարությանը, որ իշխանության անդամների 100 տոկոսը պետք է փոխվի։

Ծառուկյանն այդ հայտարարությունն արել է ԲՀԿ քաղաքական խորհրդի հրատապ նիստի ժամանակ։

«Կարծում եմ պարոն Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերվում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային: Եթե պարոն Ծառուկյանը կարծում է, որ իր քաղաքական հայտարարությունները կշեղեն քննության բնականոն ընթացքը, սխալ հաշվարկ է, որովհետև Հայաստանում բոլորը հավասար են օրենքի առաջ, նաև՝ ապօրինի ձեռք բերված գույքը բռնագանձելու մասին օրենքի առաջ, որով մտահոգվելու առիթ նույնպես պարոն Ծառուկյանը կարող է ունենալ»,– Facebook–ի իր էջում գրել է նա։

Հիշեցնենք`հունիսի 2-ին ՀՀ քննչական կոմիտեն հայտնել էր, որ «Երևանի Արարատ կոնյակի-գինու-օղու կոմբինատի» տնօրենին մեղադրանք է առաջադրել երկու հոդվածով` ապացույցները կեղծելու և գույքային վնաս պատճառելու համար։

398
թեգերը:
Մանե Գևորգյան (ՀՀ վարչապետի մամուլի խոսնակ), Գագիկ Ծառուկյան, Հայաստան
Ըստ թեմայի
Գագիկ Ծառուկյանին մի քանի ժամ հարցաքննել են. «Ժամանակ»
Գագիկ Ծառուկյանի ընկերության դեմ սնանկության վարույթ է ներկայացվել. հայտնի են պատճառները
Ինչու է ՊԵԿ-ը ստուգում Գագիկ Ծառուկյանի ձեռնարկությունները
Գագիկ Ծառուկյան

Իշխանության անդամների 100 տոկոսը պետք է փոխվի. Գագիկ Ծառուկյան

252
(Թարմացված է 22:44 05.06.2020)
ԲՀԿ նախագահի կարծիքով` կառավարությանը հնարավորություն էր տրված, որ կարողանար ժողովրդի սպասելիքներն իրականացնել, բայց ոչինչ չստացվեց։

ԵՐԵՎԱՆ, 5 հունիսի – Sputnik. «Բարգավաճ Հայաստան» կուսակցության նախագահ Գագիկ Ծառուկյանը կարծում է, որ իշխանության անդամների 100 տոկոսը պետք է փոխվի, քանի որ բոլոր ոլորտները ձախողված են։ Ծառուկյանը նման հայտարարությամբ է հանդես եկել այսօր` ԲՀԿ քաղաքական խորհրդի հրատապ նիստի ժամանակ։

«Ես դեռ մեկ տարի առաջ ասել եմ, որ նման կազմով հնարավոր չէ ժողովրդին տված խոստումներն իրականացնել։ Այն ժամանակ ասել եմ, որ պետք է 97 տոկոսին փոխել, բայց հիմա ասում եմ` պետք է բոլորին փոխել։ Ժողովուրդը փորձադաշտ չէ»,–ասել է Ծառուկյանը։

Նրա խոսքով` կառավարությանը հնարավորություն էր տրված, որ կարողանար ժողովրդի սպասելիքներն իրականացնել, սակայն ոչինչ չի ստացվել։

Ծառուկյանը նշել է, որ ներդրումների համար այդպես էլ համապատասխան պայմաններ չեն ստեղծվել, գյուղատնտեսությունը չի զարգանում, իսկ ժողովրդին պետությունը 20-25 տոկոսով է վարկեր տվել։

Անդրադառնալով կորոնավիրուսի թեմային` ԲՀԿ ղեկավարը նշել է, որ մարզեր կան, որտեղ թեստեր չկան, ինչն անփորձության հետևանք է։ Նա ասել է նաև, որ ամենաանազնիվ քայլն այն էր, որ ստեղծված իրավիճակի ողջ պատասխանատվությունը փորձեցին գցել ժողովրդի վրա։

Հիշեցնենք, որ ՀՀ վարչապետ Նիկոլ Փաշինյանը ֆլեշմոբ է սկսել. Նա Facebook–ի իր էջում հրապարակում է քաղաքացիներից ստացած լուսանկարները, որոնցում երևում է` ինչպես են մարդիկ խախտում հակահամաճարակային կանոնները։ Լուսանկարների տարածման փաստը քննարկումների և քննադատումների տեղիք է տվել, դրանց առնչությամբ հնչում են տարբեր կարծիքներ։ Ավելին, Փաշինյանն արդեն իսկ որոշ գրառումներ հեռացրել է։

Ինչու են առողջացածների տվյալները նվազել. Փաշինյանը հայտնեց հաշվարկի նոր սխեմայի մասին

252
թեգերը:
Իշխանություն, կորոնավիրուս, Գագիկ Ծառուկյան
Ըստ թեմայի
Համաճարակն ու Հայաստանը․ կորոնավիրուսը արագացնո՞ւմ է քաղաքական գործընթացները
Քաղաքական ձախողումն ակնհայտ է. ո՞ր դեպքում Փաշինյանը կթողնի իշխանությունը
Պատերազմի ժամանակ ներքաղաքական պայքարը խելահեղություն է. Տեր-Պետրոսյանը` COVID-19-ի մասին
Լիլիթ Մակունց. արխիվային լուսանկար

«Մեր պաշտոնը չենք օգտագործել բիզնեսներ հիմնելու ու խլելու համար»․ Մակունցը՝ Ծառուկյանին

0
Լիլիթ Մակունցը վստահ է, որ որոշ մարդիկ կորոնավիրուսով պայմանավորված իրավիճակում փորձում են բարձրագոչ ելույթներ ունենալ, ներկայացնելով, իբր իրենք դա անում են «հանուն ժողովրդի ու պետության»։

ԵՐԵՎԱՆ, 6 հունիսի — Sputnik. ԱԺ «Իմ քայլը» խմբակցության ղեկավար Լիլիթ Մակունցը Facebook-ի իր էջում անդրադարձել է ԲՀԿ առաջնորդ Գագիկ Ծառուկյանի հայտարարություններին, այն որակելով «պատերազմական վիճակում դավադիր գործողություններ» պետության դեմ։

«Որոշ քաղաքական ուժերի մոտ այդպես էլ չի ստացվում ճիշտ քաղաքական հաշվարկ անել: Վարչապետի՝ կորոնավիրուսով վարակված լինելու հանգամանքի վրա բոլոր խաղադրույքները դնելը և կառավարող ուժի դեմ համավարակի պայմաններում կոնսոլիդացիայի կոչ անելը՝ քաղաքական ու անձնական մղումներին հագուրդ տալու նպատակով, նույնն է, ինչ պատերազմական վիճակում դավադիր գործողություններ ձեռնարկելը պետության դեմ»,-նշել է Մակունցը։

Նրա խոսքով՝ որոշ մարդիկ ստեղծված իրավիճակը փորձում են հրամցնել «երկրի մասին մտածողների, հանուն ժողովրդի ու պետության» բարձրագոչ ելույթներով:

«Այո՛, չունենք թալանի ու կոռուպցիայի մեջ թաթախված լինելու փորձ:Այո՛, չունենք ապարանքներ, և մեր պաշտոնը չենք օգտագործել բիզնեսներ հիմնելու ու խլելու համար: Այո՛, չենք կեղեքում ու չենք թալանում: Եվ, այո՛, հաղթահարելու ենք այս վիճակը»,-շեշտել է «Իմ քայլը» խմբակցության ղեկավարը:

Նա ափսոսում է, որ Բարգավաճ Հայաստան խմբակցության ղեկավարն իրեն դիտարկում է ոչ թե Հայաստանի իշխանությունների և քաղաքացիների հետ այս ծանր իրավիճակը հաղթահարողի դիրքերից, այլ որպես մերժված, բայց վերականգնվել ցանկացող քաղաքական խմբերի մի մասնիկ:

Հիշեցնենք` երեկ ԲՀԿ առաջնորդ Գագիկ Ծառուկյանն ասել էր, որ իշխանության անդամների 100 տոկոսը պետք է փոխվի, քանի որ բոլոր ոլորտները ձախողված են։

Նրա խոսքով` կառավարությանը հնարավորություն էր տրված, որ կարողանար ժողովրդի սպասելիքներն իրականացնել, սակայն ոչինչ չի ստացվել։

Երեկ ՀՀ վարչապետ Նիկոլ Փաշինյանի խոսնակ Մանե Գևորգյանն արձագանքել էր «Բարգավաճ Հայաստան» կուսակցության նախագահ Գագիկ Ծառուկյանի հայտարարությանը։

Նա ասել էր, որ կարծում է` պարոն Ծառուկյանը պարզապես մտահոգված է մի շարք քրեական գործերի ընթացքով, որոնք վերաբերվում են փողերի լվացմանը, ընտրակաշառք բաժանելուն, հարկերից խուսափելուն, կոռուպցիային:

Նրա խոսքով՝ եթե Ծառուկյանը կարծում է, որ իր քաղաքական հայտարարությունները կշեղեն քննության բնականոն ընթացքը, սխալ հաշվարկ է։

Հիշեցնենք`հունիսի 2-ին ՀՀ քննչական կոմիտեն հայտնել էր, որ «Երևանի Արարատ կոնյակի-գինու-օղու կոմբինատի» տնօրենին մեղադրանք է առաջադրել երկու հոդվածով` ապացույցները կեղծելու և գույքային վնաս պատճառելու համար։

0