Հայկ Մարությանը՝ Հանրապետության հրապարակում  (8 մայիսի 2018 թ.)

Հայկական սև ու սպիտակը. ինչպե՞ս քաղաքապետի աթոռին ձգտող կոմիկն ընկավ լուրջ ցեխի մեջ

376
(Թարմացված է 06:29 04.09.2018)
Արդեն մեկ օր է՝ սոցիալական ցանցերում ակտիվորեն քննարկվում է «Քաղաքացիական պայմանագիր» կուսակցության Երևանի քաղաքապետի թեկնածու, հայտնի կոմիկ դերասան Հայկ Մարությանի հայտարարությունն այն մասին, որ իրենց թիմի «դեմ խաղ չկա» ու հասարակությունը բաժանվում է «սևերի ու սպիտակների»։

ԵՐԵՎԱՆ, 3 սեպտեմբերի — Sputnik, Նանա Մարտիրոսյան. Իշխող «Քաղաքացիական պայմանագիր» կուսակցության Երևանի քաղաքապետի թեկնածու, կոմիկ դերասան Հայկ Մարությանը երեկ բավականին հուզական կերպով է ներկայացրել ներկայիս քաղաքական իրավիճակի իր պատկերացումը։

Նա մի քանի անհաջող արտահայտություն է թույլ տվել, որոնք հասարակության շրջանում մեծ իրարանցում են առաջացրել ու բուռն քննարկվում են սոցիալական ցանցերում։

Մարությանի խոսքով՝ նրա թիմը միակ սպիտակ ուժն  է ու այն մարդիկ, ովքեր չեն ուզում, որ նրանք հաջողության հասնել, համապատասխանաբար սև ուժերն են։ Սակայն  հանրությունն ամենաշատը վրդովվել է «մեր դեմ խաղ չկա» չարաբաստիկ արտահայտությունից ու մարդկանց «սևերի» ու «սպիտակների»  բաժանելուց։

Սոցցանցերում միանգամից զուգահեռներ են անցկացրել նախկին իշխանության ներկայացուցիչների նման արտահայտությունների հետ։ Օգտատերերի մի մասը նշել է, որ Մարությանի հռետորաբանությունը նման է նախկին նախագահ Սերժ Սարգսյանի ու մի շարք այլ պաշտոնյաների հռետորաբանությանը, որոնք խոսում էին այն մասին, իրենց իշխանությանն այլընտրանք չկա։

Սոցցանցերի օգտատերերը հիշեցրել են վարչապետ Նիկոլ Փաշինյանին ու նրա թիմին այն մասին, որ ավելի  վաղ նրանք խոսում եին բոլոր անջատող գծերը մաքրելու ու երկիրը համատեղ ուժերով զարգացնելու մասին։

Երևանի ավագանու նախկին անդամ Անահիտ Բախշյանն ասաց Sputnik Արմենիայի թղթակցին,  որ իր մոտ դեժավյու է։ Ըստ Բախշյանի՝ ինքը նույնպես հիշել է նախկին իշխանությունների «սպառնալից» հայտարարություններն ու տխրել։

Նա ընդգծեց,  որ Փաշինյանը մշտապես հիմնվում է հասարակության ու ժողովրդական աջակցության վրա, սակայն նրա թիմակիցները սխալ ուղղությամբ են շարժվում ու լուրջ վնաս են տալիս իրենց ու քաղաքական ուժի ապագային։ Բախշյանն ասաց, որ Փաշինյանը չպետք է թույլ տա, որ իր թիմակիցները նման բաներ անեն, քանի որ նրանք վարկաբեկում են հեղափոխությունը։

«Փաշինյանի շուրջ եղած երիտասարդները երեք ամսվա ընթացքում շատ են մեծամտացել։ Մարությանը կրկնում է նախկին իշխանությունների սխալները, որոնց համար, ի դեպ, Փաշինյանի թիմը քննադատում էր նրանց», – նշել է  Բախշյանը։

Իրավապաշտպան Վարդան Հարությունյանն իր հերթին կարծում է, որ Մարությանի հայտարարությունը միանշանակ բացասական ազդեցություն կունենա Փաշինյանի համբավի վրա։  Դա վատ կանդրադառնա նաև իր՝ որպես քաղաքապետի թեկնածուի համբավի վրա, եթե հաշվի  առնենք հեղափոխության խաղաղասեր հռետորաբանությունը։

Սակայն փորձագետի կարծիքով, սեպտեմբերի 23–ին կայանալիք ավագանու ընտրությունների վրա Մարությանի հայտարարություններն առանձնապես չեն ազդի։ Միաժամանակ Հարությունյանը համոզված է, որ դերասանը չի գիտակցել իր կերպարի փոփոխությունը ու չի հասկանում` որքան լուրջ հետևանքներ կարող են ունենալ իր խոսքերը։

«Նրան պետք է բացատրեն, որ նա այլևս շոումեն չէ, ու իր բոլոր հայտարարությունները կարող են օգտագործվել իր քաղաքական թիմի դեմ», – ընդգծեց նա։

Մինչդեռ «ՔՊ»–ի Ավագանու թեկնածու, հայտնի բլոգեր Իզաբելլա Աբգարյանը (համացանցում նրան «Բելկա» են անվանում) ֆեյսբուքի իր էջում գրել է, որ Մարությանը իր թիմի առաջ էր ելույթ ունենում ու այդպես է ասել` իր թիմին ոգևորելու համար։ Նա նաև համարում է, որ նախորդ իշխանությունների հետ համեմատություններն անտեղի են։

«Տպավորություն է, որ մրցակիցներն արդեն իսկ մեր թիմը հաղթած ու պաշտոնավարող են համարում և բողոքում են միահեծան կառավարումից: Իսկ մենք, անտեղյակներս, իզուր ջանքեր ենք գործադրում՝ պատրաստվելով մրցապայքարի», – նշել է նա։

Նա հայտարարել է նաև, որ ոչ ոք հասարակությանը սևերի ու սպիտակների չի բաժանում, քանի որ խոսքն այն ուժերի մասին էր, որոնք չեն ուզում, որ նրանց թիմը հաջողության հասնի. միաժամանակ նա նշել է, որ այդպիսիք քիչ չեն։

«Ինչ վերաբերում է հեղափոխությանը մասնակցած ու սատարածներին. առնվազն տարակուսելի էր, որ իրենք իրենց շտապեցին գցել ռևանշիստական սևերի հետ նույն շարքը: Կարծես թե ասում էին «մենք բոլորին հաջողություն ենք մաղթում», բայց, արի ու տես, իրենք իրենց համարեցին «ուժեր, որոնք չեն ցանկանում, որ մենք հաջողենք»,–ընդգծել էր նա։

Սակայն դա չհանգստացրեց համացանցի օգտատերերին, որոնք մեկնաբանություններում մտահոգություն էին հայտնում ու նույնիսկ ասում էին, որ չեն ցանկանում Մարությանի համար քվեարկել։

Ինքը` Մարությանը, գիտակցելով, որ անհաջող է արտահայտվել, արդեն փորձել է արդարանալ.

«Ուզում եմ հստակ ֆիքսել, որ Հայաստանում կա ընդամենը մեկ սուբյեկտ, որի դեմ խաղ չկա. դա Հայաստանի ժողովուրդն է։

Ու, այո, բոլոր այն ուժերը, որոնք տարիներ շարունակ բռնացել են ու դեռ փորձելու են բռնանալ ժողովրդի ազատության և արժանապատվության վրա, խաբել ժողովրդին, կանխել վերջինիս առաջընթացն ու հաջողությունը, սև ուժեր են, և ես անձամբ իմ պարտքն եմ համարել և համարում անել ամեն ինչ, որպեսզի նրանք այլևս երբեք չկարողանան դա անել։ Ընտրությունը ժողովրդինն է, և ես համոզված եմ, որ մեր թիմը կարժանանա վերջինիս վստահությանը»,–ասել է նա։

ՀՀ Կենտրոնական ընտրական հանձնաժողովն այսօր գրանցեց Երևանի ավագանու ընտրությանը մասնակցելու հայտ ներկայացրած բոլոր քաղաքական ուժերի ցուցակները:  Այսպիսով՝ սեպտեմբերի 23-ին կայանալիք ավագանու ընտրությանը կմասնակցեն հետևյալ 8 կուսակցությունը և կուսակցությունների 4 դաշինքը` Ռեֆորմիստների կուսակցություն, Ժառանգություն կուսակցություն, «Լույս» կուսակցությունների դաշինք, «Երևանի հանրություն» կուսակցությունների դաշինք, Բարգավաճ Հայաստան կուսակցություն, «Հայք» (Հայկազուններ) կուսակցություն, Երկիր Ծիրանի կուսակցություն, Ժողովրդական Ուղի կուսակցություն, «Իմ քայլը» կուսակցությունների դաշինք, Օրինաց Երկիր կուսակցություն, Հայ Հեղափոխական Դաշնակցություն կուսակցություն, «Երևանցիներ» կուսակցությունների դաշինք:

376
թեգերը:
Հայկ Մարության, Հայաստան
Ըստ թեմայի
Առանց արմատական շրջադարձների. ինչո՞ւ Մոսկվան խաղադրույք չի անի Քոչարյանի վրա
Կենացների դիվանագիտություն. ինչո՞ւ է Վրաստանի վարչապետ Բախտաձեն Բաքվից հետո Երևան ժամանում
Հայտնի են Երևանի քաղաքապետի աթոռի համար պայքարող ուժերի անունները
Հրայր Թովմասյան. արխիվային լուսանկար

Հանրաքվեն կչեղարկվի. Հրայր Թովմասյանը և ՍԴ դատավորները կշարունակեն պաշտոնավարել

10
(Թարմացված է 10:30 03.06.2020)
Ազգային ժողովի պատգամավորները քիչ առաջ քվեարկեցին ՍԴ–ում փոփոխություններին առնչվող հանրաքվեն չեղարկելու մասին օրինագծի համար։

ԵՐԵՎԱՆ, 3 հունիսի – Sputnik. Ազգային ժողովն այսօր երկրորդ ընթերցմամբ ընդունեց «Հանրաքվեի մասին» սահմանադրական օրենքում փոփոխություններ և լրացումներ կատարելու մասին» օրենսդրական փաթեթը:

Նախագիծը երկրորդ ընթերցմամբ և վերջնականապես ընդունելով` արտակարգ դրության ավարտից հետո հնարավոր կլինի չեղարկել Սահմանադրական դատարանի նախագահ Հրայր Թովմասյանի և 6 անդամների լիազորությունների դադարեցման հանրաքվեն:

Հիշեցնենք՝ սահմանադրության փոփոխությունների հանրաքվեով առաջարկվում է դադարեցնել Սահմանադրական դատարանի նախագահ Հրայր Թովմասյանի և դատարանի 6 անդամների պաշտոնավարումը: Սահմանադրության փոփոխությունների հանրաքվեն նախատեսված էր ապրիլի 5-ին, սակայն չկայացավ արտակարգ դրության հայտարարման պատճառով:

10
թեգերը:
Սահմանադրական դատարան, Սահմանադրական փոփոխությունների նախագիծ, հանրաքվե, ԱԺ, Հրայր Թովմասյան
Արթուր Վանեցյան

Ինչու է Արթուր Վանեցյանը որոշել մտնել քաղաքականություն. նա ներկայացրել է իր դիրքորոշումը

334
(Թարմացված է 20:53 30.05.2020)
Արթուր Վանեցյանը խոստովանել է` երբեք չի մտածել, որ մի օր կդառնա որևէ կուսակցության անդամ, առավել ևս՝ կգլխավորի որևէ կուսակցություն։ Նա խոսել է իր պատկերացրած իշխանության, Արցախյան հիմնախնդրի, տնտեսության գահավիժման, այլ երկրների հետ հարաբերությունների մասին։

ԵՐԵՎԱՆ, 30 մայիսի – Sputnik. Ազգային անվտանգության ծառայության նախկին ղեկավար Արթուր Վանեցյանն այսօր «Հայրենիք» կուսակցության համագումարում խոսել է Հայաստանի քաղաքականության, տնտեսության, իշխանության սխալների ու իր պատկերացրած հայրենիքի մասին։

Ո՞վ ենք մենք և ո՞ւր ենք գնում

Վանեցյանն ասել է, որ տեսնում է պետության համար լուրջ ռիսկեր, բարդ խնդիրներ, վտանգավոր սխալներ, որոնք ամեն օր են արվում։

«Ցավոք, իրականանում են իմ վատագույն կանխատեսումները։ Հիմա էլ պնդում եմ, որ անհրաժեշտ է իրականացնել մեծ աշխատանք՝ ավելի վատ զարգացումներից խուսափելու համար։ Հենց դա՛ ինձ ստիպեց զբաղվել քաղաքականությամբ։ Իրական քաղաքականությամբ»,–ասել է Վանեցյանը։

Նա բացատրել է, որ իր պատկերացրած իրական քաղաքականությունը պատասխանատվությունն է՝ ընդդեմ ինֆանտիլիզմի, ազնվությունն է ընդդեմ ստի և մանիպուլյացիայի,կարգապահությունն է ընդդեմ ամենաթողության, միասնականությունն ընդդեմ պառակտման, համակարգն ընդդեմ քաոսի, կայունությունն ընդդեմ անորոշության պրոֆեսիոնալիզմն ընդդեմ դիլետանտիզմի, պրագմատիզմն ընդդեմ պոպուլիզմի։

«Մեզ պետք են իշխանություններ, որոնք զերծ կմնան կեղծ և ֆեյքային օրակարգերից, գործելաոճից և գործիքակազմից։ Մեզ պետք է իշխանություն, որը «ինտերնետային լայվի» ռեժիմից կտեղափոխվի իրական կյանքի մարտահրավերների հաղթահարման ռեժիմ:

Մեր ժողովրդին անհրաժեշտ է այնպիսի իշխանություն, որը ոչ թե կբաժանի, այլ կհամախմբի հասարակությանը՝ երկրի զարգացման ծրագրերը կյանքի կոչելու համար։ Իշխանություն, որը լուծում կտա ճգնաժամերին, այլ ոչ թե հենց ինքը կստեղծի խառնաշփոթ ու ճգնաժամեր։ Մեր Հայրենիքին անհրաժեշտ են ոչ թե կեղծ փրկիչներ, այլ՝ իրական առաջնորդներ»,–ասել է Վանեցյանը:

Արցախի մասին

Վանեցյանի խոսքով`անվտանգության ապահովման խնդիրը մեր երկրի համար մշտական առաջնահերթություն է լինելու, որովհետև խաղաղությունը աշխատանք է, պատերազմին պատրաստ լինելն ու պատերազմին դիմակայելը` աշխատանք։ Հայրենիքի անվտանգության մակարդակի բարձրացումը պահանջում է ամենօրյա, ամենժամյա գրագետ աշխատանք՝ բազմաթիվ ուղղություններով։

«Արցախի ժողովրդի ինքնորոշման իրավունքը անքակտելի է և չի կարող կախվածության մեջ դրվել որևէ երրորդ կողմի համաձայնությունից կամ բարի կամքից: Դա իրավունք է և պետք է իրացվի ողջ ծավալով:Հայաստան-Արցախ փոխհարաբերությունները պետք է հիմնված լինեն ազգային տեսլականի, փոխադարձ վստահության և համագործակցության վրա: Հայաստանի կողմից միանշանակ պետք է հարգվի Արցախի սուբյեկտայնությունը: Հայաստանը պետք է ներդնի իր ջանքերը՝ Արցախի անկախության միջազգային ճանաչման համար: Հայաստանը եղել է և լինելու է Արցախի անվտանգության երաշխավորը»,–ասել է Վանեցյանը։

Արցախի հարցի լուծման միակ ճանապարհն, ըստ նրա, խաղաղ բանակցություններն են, բացառապես ԵԱՀԿ Մինսկի խմբի շրջանակներում։

Վանեցյանը վստահ է, որ ո՛չ Արցախը, ո՛չ Հայաստանը Ադրբեջանի ճնշման առաջ չեն ընկրկելու, և այդ սպառնալիքը որևէ կերպ չի նպաստելու հարցի համապարփակ և ամբողջական լուծմանը: Հայաստանի և Արցախի հետ սպառնալիքի լեզվով խոսել հնարավոր չէ:

«Արցախի ժողովուրդը վաղուց ինքնորոշվել է։ Պատերազմով չկա լուծում։ Պատերազմով հնարավոր չէ հասնել խաղաղության և տարածաշրջանային կայունության։ Մենք մեր բանակի մարտունակությամբ, տնտեսության հզորացմամբ և ներքին համերաշխությամբ՝ այս գաղափարը պետք է հասանելի դարձնենք միջազգային հանրությանը և Ադրբեջանին։ Արցախյան հիմնահարցի կարգավորումը պետք է հիմնված լինի ոչ թե փուլային, այլ՝ փաթեթային տարբերակի վրա»,–շեշտել է նա:

Հարևանների մասին

ԱԱԾ նախկին պետն ավելի քան վստահ է, որ Իրանի և Վրաստանի հետ Հայաստանի Հանրապետության հարաբերությունները պետք է լինեն փայլուն։

«Մենք ունակ ենք տնտեսական և քաղաքական հարաբերություններում կամուրջ հանդիսանալ մեր հարևանների և մեր գործընկեր երրորդ երկրների միջև։ Մինչդեռ վերջին զարգացումները վկայում են, որ մեր ավանդական դաշնակից պետությունների հետ հարաբերությունները սկսել են վատթարանալ, ինչն անթույլատրելի է»,–ասել է Վանեցյանը։

Նրա խոսքով`մենք այնքան ենք կենտրոնացել մեր ներսում կատարվող իրադարձությունների վրա, որ կարծես թե մոռացել ենք, որ հետևողական աշխատանք է պահանջվում միջազգային գործընկերների հետ։ Աշխատանք՝ բոլոր մակարդակներում։ Անհրաժեշտ է իրականացնել ամենօրյա աշխատանք մեր միջազգային գործընկերների հետ բազմակողմ ձևաչափերով՝ ՀԱՊԿ-ում, ԵԱՏՄ-ում, ԵԽԽՎ-ում, ԵՄ-ում և այլ կառույցներում։

Ինչպես պետք է Հայաստանը զարգացնի հարաբերությունները

Վանեցյանը կարծում է, որ մենք պետք է լիարժեք օգտագործենք հնարավորությունները, որ մեզ տալիս են ԵԱՏՄ-ն ու ՀԱՊԿ-ը։

«Մենք պետք է զարգացնենք Ռուսաստանի Դաշնության հետ ռազմավարական գործընկերությունը՝ առավել խորքային և փոխշահավետ արդյունք ստանալու նպատակով։ Մենք ունենք զգալի հնարավորություններ Իրանի հետ մեր հարաբերությունները խորացնելու համար։ Անկախ միջազգային հարաբերությունների կոնյուկտուրայից՝ Իրանը մեր վաղեմի բարեկամ պետությունն է, մեր անմիջական հարևանը և Հայաստանի համար շատ կարևոր գործընկեր»,– նշել է նա։

Միաժամանակ, մեր մյուս կարևորագույն գործընկերների՝ Ամերիկայի Միացյալ Նահանգների, եվրոպական և այլ երկրների, հատկապես՝ Չինաստանի, Հնդկաստանի հետ մեր հարաբերությունները պետք է ունենան ծրագրային և համակարգված բնույթ և հրատապ բարձրացվեն նոր մակարդակի։

Տնտեսությունը գահավիժում է

Վանեցյանը նշել է, որ վերջին ամիսներին մեր տնտեսության վիճակը, տնտեսության կառավարիչների անկարողությունը մտան յուրաքանչյուրիս տուն։

«Փաստորեն՝ բոլորի համար ակնառու լուրջ մարտահրավերի դեպքում հերթական անգամ վերահաստատվեց այն, ինչ ասել էի ժամանակին` որոշումների տարերայնություն, գործողությունների հախուռնություն, առաջնայինը երկրորդայինից չտարբերելը։ Ցավոք, այսօր տնտեսությունը գահավիժում է։ Բնակչության սոցիալական վիճակը շարունակաբար վատանում է։ Մարդու համար օրվա ապրուստի միջոց գտնելը դարձել է ամենաբարդ խնդիրը։ Այսօր Հայաստանում մարդիկ լավ չեն ապրում, իսկ ինձ համար հստակ է՝ Հայաստանում մարդը պետք է լավ ապրի։ Սա համարեք իմ գլխավոր նպատակը, որը սահմանել եմ ինձ համար, եթե կուզեք՝ իմ երազանքը։ Վստահեցնում եմ, ջանք չեմ խնայելու և հասնելու ենք այդ երազանքին»,– ասել է նա։

Վանեցյանը խոստացել է առաջիկայում ձևակերպված մոտեցումներ հանրության ներկայացնել Հայաստանի զարգացման բոլոր ուղղությունների վերաբերյալ։

«Իհարկե, կարող ենք շատ երկար խոսել նոր կորոնավիրուսի պայմաններում առաջացած մարտահրավերներից և դրանց հետևանքներից, բայց բոլորս էլ հասկանում ենք, որ այդ խնդիրները հաղթահարելու համար պետք է լինել իշխանություն՝ կոմպետենտ և ժողովրդի հանդեպ ազնիվ իշխանություն։ Իսկ իրավիճակը իսկապես մտահոգիչ է և պահանջում է գրագետ ու օպերատիվ կառավարում։Ամփոփելով ելույթս՝ նշեմ. որևէ քաղաքական ուժ իրավունք չունի հավակնել նրան, թե ինքն է միակ ճշմարիտը, իսկ դրա առաջնորդը՝ ազգի փրկիչ կամ մարգարե։ Այսօր Հայաստանի Հանրապետությունում կառավարող քաղաքական միավորը չունի և չի էլ ուզում ունենալ բավարար կադրային և մասնագիտական ներուժ պետության առջև ծառացած մարտահրավերները արդյունավետ հաղթահարելու համար»,– ասել է նա։

Վանեցյանի խոսքով` իրենք հետամուտ են լինելու համազգային համախմբմանը և հակաճգնաժամային համաձայնության կառավարության ձևավորմանը։

Նա իր ելույթն ավարտել է հետևյալ խոսքերով` Հայաստանը պետք է զարգանա և հզորանա, մենք կարող ենք, ու հենց մենք էլ դա անելու ենք։

334
թեգերը:
Արթուր Վանեցյան, Արցախ, Հայաստան
Ըստ թեմայի
Կադրային փոփոխություններ ԱԱԾ-ում․ ինչ է ուզում Փաշինյանը, և ինչ կապ ունի դրա հետ Վանեցյանը
«Անհրաժեշտ է նոր՝ հակաճգնաժամային կառավարություն». Արթուր Վանեցյանի առաջարկը
Ինչու Փաշինյանն ու Հարությունյանը չքննարկեցին Արցախի խնդիրը, կամ նոր հարաբերություններ