ԵՐԵՎԱՆ, 22 օգոստոսի — Sputnik. Հայաստանի ու Եվրամիության հարաբերությունների ապագան, Թուրքիայի պահվածքը, Բեռլինի ու Բաքվի պաշտպանային համագործակցության խոչընդոտումը. այս հարցերը պետք է քննարկվեն կանցլեր Անգելա Մերկելի երևանյան այցի ընթացքում։
Sputnik Արմենիայի հետ զրույցում նման կարծիք հայտնեց արտակարգ և լիազոր դեսպան Արման Նավասարդյանը։
ԳԴՀ կանցլերը օգոստոսի 24–ին երկօրյա պաշտոնական այցով Հայաստան է ժամանելու։ Երևանում նախանշված են Մերկելի ու վարչապետ Նիկոլ Փաշինյանի բանակցությունները։
Դիվանագետի կարծիքով` Մերկելի երևանյան այցը մի քանի պատճառներով է կարևոր։ Գերմանիան ոչ միայն Եվրամիության առաջատար երկիրն է, այլև Հայաստանի կարևոր առևտրա–տնտեսական ու քաղաքական գործընկերը։
«Փաշինյանի՝ վերջերս իրականացրած բրյուսելյան այցի ֆոնին, որտեղ նա եվրոպական պաշտոնյաների հասցեին մի շարք ոչ դրական գնահատականներ էր հնչեցրել, այս այցելությունը կարող է Հայաստան–ԵՄ հարաբերությունների յուրահատուկ ռեստարտ լինել։ Կարծում եմ` Մերկելի այցը կնպաստի Հայաստանի հանդեպ եվրոպական քաղաքականության վերանայմանը», – նշեց Նավասարդյանը։
Երևանի ու Բեռլինի մտերմացումը արդիական է դառնում նաև տարածաշրջանում Անկարայի ագրեսիվության մեծացման ու թուրք–գերմանական հարաբերութունների վատացման ֆոնին։ Ի դեպ, այդ սառեցման առանցքային պատճառներից մեկը հայկական թեմատիկան է. 2016 թվականի հունիսին Բունդեսթագը հատուկ բանաձևով ճանաչեց ու քննադատեց Օսմանյան կայսրությունում իրագործված Հայերի ցեղասպանությունը։ Այսպիսով` Թուրքիայի հետ հարաբերությունների հարցը կարող է դառնալ Մերկել–Փաշինյան բանակցությունների կենտրոնական թեմաներից մեկը։
Եվս մեկ թեմա, որը պետք է քննարկել ԳԴՀ ղեկավարի հետ, դա Նավասարդյանի կարծիքով, գերմանական ռազմական արդյունաբերության արտադրանքը Ադրբեջան մատակարարելու հավանականությունն է։
«Պետք է հասկացնել Գերմանիայի ղեկավարությանը, որ զենքի այդ վաճառքը կարող է տարածաշրջանի համար անկանխատեսելի հետևանքներ ունենալ»,–նշեց նա։
Ավելի վաղ գերմանական մամլում տեղեկություն էր հայտնվել այն մասին, որ Rheinmetall ռազմարդյունաբերական կոնցեռնը մտադիր է Ադրբեջանի հետ գործարք կնքել։
Հունիսի կեսերին Ջոն Թեյլոր գերմանական ընկերության ներկայացուցիչը և Ադրբեջանի պաշտպանական արդյունաբերության այն ժամանակվա նախարար Յավեր Ջամալովը (վերջերս նա մահացել է – խմբ.) «հետագա երկկողմ համագործակցության մասին» հռչակագիր են ստորագրել։
Գերմանական կոնցեռնի հաղորդմամբ` փաստաթղթում ընդգծվում է, որ Rheinmetall–ը ԵԱՀԿ–ի էմբարգոյի տակ չմտնող ծառայություններ կմատուցի։
