Մամուկա Բախտաձե. Վրաստանի վարչապետ

Վրաստանը պետք է երախտապարտ լինի Հայաստանին, կամ ինչ սպասի Երևանը վարչապետ Բախտաձեից

380
(Թարմացված է 09:20 22.06.2018)
Վրաստանի նոր վարչապետի օրոք հայ–վրացական հարաբերությունները միայն խորանալու են։ Այդ հարաբերություններն արդեն փորձություն անցել են երրորդ նախագահ Միխայիլ Սահակաշվիլու օրոք. երկու կողմերի համար էլ ամենավատ ժամանակներն անցյալում են, կարծում է վրաց փորձագետը։

Լաուրա Սարգսյան, Sputnik Արմենիա

Վրաստանը պետք է երախտապարտ լինի Հայաստանին` Վրաստանի երրորդ նախագահ Միխայիլ Սահակաշվիլու ժամանակաշրջանում ցուցաբերած համբերատարության համար։ Այն փորձությունը, որ անցան հայ–վրացական հարաբերություններն այդ շրջանում, ապացուցում է դրանց ամրությունը։

Դրանում համոզված է Վրաստանի նախագահի աշխատակազմի նախկին ղեկավար Պետրե Մամրաձեն, ընդգծելով, որ երկկողմ հարաբերությունները կխորանան նաև նոր իշխանությունների օրոք։

Բանն այն է, որ Սահակաշվիլու նախագահության օրոք, պաշտոնական Թբիլիսին սերտ համագործակցում էր Անկարայի և Բաքվի հետ` նրանց ռազմավարական գործընկերոջ կարգավիճակ տալով, իսկ Երևանին պրագմատիկ գործընկերոջ դեր էր հատկացվել։ Հայ–վրացական հարաբերությունները նոր փուլ են թևակոխել Վրաստանի նախկին վարչապետ  Բիձինա Իվանիշվիլու և նրա «Վրացական երազանք` Ժողովրդավարական Վրաստան» կուսակցության իշխանության գալուց հետո։

Այսօր Վրաստանի ներքաղաքական կյանքում փոփոխություններ են տեղի ունեցել։ Հունիսի 20-ին, Վրաստանի խորհրդարանը վստահություն հայտնեց վարչապետ Մամուկ Բախտաձեի գլխավորությամբ նոր կառավարությանը, ինչպես նաև` «Ազատություն, արագ զարգացում, բարեկեցություն» կառավարական ծրագրին։

«Ամենավատն, ինչ կարող էր տեղի ունենալ հայ–վրացական հարաբերություններում, արդեն անցյալում է։ Մենք ապացուցել ենք, որ մեր հարաբերություններն ամուր հիմք ունեն` փորձությունների միջով անցնելով Սահակաշվիլու կառավարման օրոք։ Եվ սա մեծ հաշվով, հայկական կողմի դիվանագիտության շնորհիվ», – ասաց Մամրաձեն։

Նրա խոսքով` հայկական կառավարության հասցեին Սահակաշվիլու ցանկացած պոռթկում Երևանն ընդունում էր հաստատակամ և կշռադատված։ Նա նաև համոզված է, որ Վրաստանի նոր վարչապետ Բախտաձեն կշարունակի «Վրացական երազանքի» երկար տարիների վերցրած ուղղությունը, որը միտված է տարածաշրջանի բոլոր երկրների, հատկապես Հայաստանի հետ, գործընկերային հարաբերությունների ստեղծմանը։

Այն փոփոխությունները, որոնք տեղի են ունեցել երկու երկրներում, օգտակար կլինեն երկկողմ հարաբերությունների համար` դրանք կխորանան։

«Հայաստանը հավակնություններ չի ներկայացրել նույնիսկ այն ժամանակ, երբ Վրաստանը (աշխարհում միակը) ճանաչել է չերքեզների ցեղասպանությունը` չճանաչելով Հայոց ցեղասպանությունը, որը պաշտոնապես արձանագրել են մի շարք երկրներ», – ասաց Մամրաձեն։

Վրաց փորձագետի դիրքորոշման հետ համակարծիք է նաև Վրաստանի հարցերով փորձագետ Ջոնի Մելիքյանը։ Նա համոզված է, որ Հայաստանը` Վրաստանի նոր վարչապետ Բախտաձեի օրոք Թբիլիսիից «Վրացական երազանք» իշխող կուսակցության քաղաքականության շարունակություն պետք է սպասի։

«Հիմնական փոփոխությունները կլինեն Վրաստանի ոչ թե արտաքին, այլ ներքին քաղաքականության մեջ։ Հայ–վրացական հարաբերություններն անփոփոխ կմնան։ Սակայն նախանշված նախագծերի ռեսթարթի և նոր պայմանավորվածությունների ձեռք բերման համար, անհրաժեշտ է, որ վրացական կողմը Հայաստան այցելի», – ասաց Մելիքյանը։

Փորձագետն ընդգծեց, որ Վրաստանում իշխանության գլուխ շարունակում է մնալ Իվանիշվիլիի կուսակցությունը, որը  տարածաշրջանի յուրաքանչյուր հարևանի հետ հարաբերությունների կառուցման առումով հստակ պատկերացում ունի։ Վարչապետների փոփոխությունից քիչ բան է փոխվում։

«Կանխադրույթները անփոփոխ են մնում, տարբերությունն այն է, որ վարչապետներից մեկն ավելի նախաձեռնող է, երկրորդը` պակաս նախաձեռնող։ Բախաձեն, իմ պատկերացմամբ, երիտասարդ, աշխույժ վարչապետ է, որը կշարունակի հայ–վրացական հարաբերությունների խորացման գործընթացը», – ասաց Մելիքյանը։

Ինչպես հայտնեց Sputnik Արմենիայի աղբյուրը, վարչապետ Մամուկ Բախտաձեի գլխավորությամբ Վրաստանից պատվիրակության այց Երևան մոտ ժամանակներում չի սպասվում։ Ներկա պահին որևէ նման պայմանավորվածություններ Երևանի և Թբիլիսիի միջև չկա։

Բախտաձեն մոտական երեք շաբաթվա ընթացքում զբաղված է իր նախաձեռնությամբ` փոքր կառավարության հայեցակարգով, որը  նախատեսում է կրճատել նախարարությունները և 14-ից դարձնել 11։ Բախտաձեի այցը Երևան, ենթադրաբար, տեղի կունենա սեպտեմբերին` մինչև Վրաստանի նախագահական ընտրությունները։

380
թեգերը:
Վրաստանի Հանրապետություն, Հայաստան
Ըստ թեմայի
Սարգսյանի բեկումնային այցը Վրաստան. ինչ տվեց այն Հայաստանին
Հայաստանի «աբխազական» գերությունը. ինչպե՞ս գործարկել Վրաստան–Ռուսաստան առևտրային միջանցքները