ԵՐԵՎԱՆ, 6 հունիսի — Sputnik. ՆԱՏՕ-ի Խորհրդարանական վեհաժողովի` Վարշավայում կայացած գագաթնաժողովում, ի թիվս այլ թեմաների, քննարկվել է նաև Հայաստանի ներքաղաքական իրավիճակը։ Այս մասին լրագրողներին տեղեկացրեց ՆԱՏՕ-ի ԽՎ-ում Հայաստանի Ազգային ժողովի պատվիրակության ղեկավար, ՀՀԿ խմբակցության անդամ Կորյուն Նահապետյանը։
«Բրիտանացի պատվիրակներից մեկը խոսեց Հայաստանում տեղի ունեցած վերջին իրադարձությունների մասին։ Նրան հետաքրքրում էր, թե Հայաստանի արտաքին քաղաքական վեկտորը կկրի՞ ինչ-որ փոփոխություն, և հետագայում կզարգանա՞ն արդյոք ՆԱՏՕ-ի հետ գործընկերային հարաբերությունները», — ասաց Նահապետյանը։
Հայկական կողմը հայտարարեց, որ նոր իշխանությունները մտադիր են պահպանել հարաբերությունների պարագիդման ինչպես եվրատլանտյան կառույցների, այնպես էլ Ռուսաստանի հետ։ Նահապետյանի խոսքով` Հայաստանը շարունակում է մնալ Հարավային Կովկասի ՆԱՏՕ-ի կարևոր գործընկերը։ Լինելով ՀԱՊԿ-ի և ԵԱՏՄ-ի անդամ` Երևանը շարունակում է հաջող փոխգործակցությունը ԵՄ-ի և ՆԱՏՕ-ի հետ` ներկայանալով որպես յուրահատուկ կամուրջ երկու պայմանական դաշինքների միջև։
Մենք հետաքրքրվեցինք պատգամավորից, թե բարձրացրե՞լ է արդյոք հայկական պատվիրակությունը Չեխիայից և Սլովակիայից Ադրբեջան զենք առաքելու հարցը։ Երկու երկրներն էլ ՆԱՏՕ-ի անդամներ են։ Այդ կազմակերպությունն ամեն կերպ փորձում է հեռու մնալ արցախյան խնդրից։ Այնուամենայնիվ, նրանց տարածքներում արտադրված հաուբիցները և համազարկային կրակի ռեակտիվ համակարգերն Ադրբեջան են առաքվել Իսրայելի տարածքով, ինչի մասին գրել ենք նախորդ հրապարակումներում։
Նահապետյանի խոսքով` այդ հարցը չի քննարկվել, քանի որ չի համապատասխանել նստաշրջանի օրակարգին։ Հայկական կողմը համոզված չի եղել, որ ՆԱՏՕ-ի գործընկերները ճիշտ կհասկանան։
«Արժե՞ր արդյոք այդ հարցը տալ միայն հարց տալու համար` նախօրոք իմանալով, որ ադեկվատ պատասխան չի լինի։ Նման մարտավարությունը նույնպես ընդունելի է, բայց պետք է հաշվի առնել, որ ՆԱՏՕ ԽՎ ձևաչափը միակը չէ։ Եվ նման խնդրահարույց պահերը մենք պարբերաբար քննարկում ենք մյուս ձևաչափերում», — ասաց պատգամավորը։
Նշենք, որ չեխական «ԴԱՆԱ» հրետանային սարքավորումները և համազարկային կրակի RM-7 ռեակտիվ համակարգերը հայտնվել են Ադրբեջանում։ Ամենայն հավանականությամբ, Իսրայելը հանդես է եկել որպես միջնորդ։ Միաժամանակ Հայաստանում Չեխիայի դեսպանատանն ավելի վաղ տարակուսանք է հայտնել, թե ինչպես զենքը կարող էր հայտնվել Ադրբեջանում։
Նման գործարքների շրջանակում գոյություն ունի այնպիսի երևույթ, ինչպիսին է «վերջնական օգտատիրոջ սերտիֆիկատը»։ Պաշտոնական Պրահան կամ Բրատիսլավան պետք է իմանան առաքման մասին, նույնիսկ եթե այն վերավաճառել է Իսրայելը։
