ԵՐԵՎԱՆ, 6 մարտի – Sputnik. ՀՀ Ազգային ժողովը քննարկում է կառավարության նոր աշխատաոճը: Նոր վարչապետի ընտրությունից հետո կառավարության նիստերը կանցկացվեն դռնփակ:
«Ես չեմ տեսնում այնտեղ բովանդակային քննարկում: Երբ հարցը զեկուցվում է, որևէ մեկը, դեպքերի 99.999%-ի պարագայում, որևէ կարծիք չի արտահայտում»- կառավարության ներկա նիստերի մթնոլորտն այսպես բնորոշեց արդարադատության նախարարը` նշելով, որ դրա հիմնական պատճառը նիստերի դահլիճում առկա տեսախցիկներն են:
«Ելք» խմբակցության պատգամավոր Արարատ Միրզոյանը քննադատելով ներկայացված նախագիծը կարծիք հայտնեց, որ դրանով նախարարները վերածվում են «վարչապետի զինվորիկներ»-ի, իսկ առաջարկվող նախագիծը «վարչապետի միահեծան իշխանության ծրագրումն է»:
«Ամեն ինչ արվում է, որ երկրի կարևոր կառավարման օբյեկտները լինեն մեկ անձի` վարչապետի կառավարման տակ: Ունենալու ենք մի սուպերվարչապետ, որը վտանգավոր է մեր երկրի ապագայի և միջազգային վարկանիշի համար»,- ասաց «Ելքի» պատգամավորը:
Հակադարձելով ընդդիմադիր պատգամավորների ելույթներին` ԱԺ փոխնախագահ Էդուարդ Շարմազանովը նշեց, որ առաջարկվող օրինագիծն ամբողջովին բխում է սահմանադրական բարեփոխումներից:
«Սուպերվարչապետական համակարգ աշխարհում չկա: Չկա խորհրդարանական երկիր, որտեղ վարչապետը չունի լուրջ լիազորություններ»,- ասաց նա:
Շարմազանովն անդրադարձավ դռնփակ նիստերի խնդրին։
«Ինչպես կասեր մեր շատ սիրելի Գալուստ Գրիգորիչը,«դռնփակը դա թաքունը չէ»»,- ասաց նա:
Նշենք, որ «Կառավարության կառուցվածքի և գործունեության մասին ՀՀ օրենքի» նախագծում ներառված են հետևյալ դրույթները. «Կառավարության նիստերն արձանագրվում են վարչապետի աշխատակազմի կողմից: Նիստի արձանագրությունը կամ դրա մի մասը վարչապետի հանձնարարությամբ կարող է հրապարակվել: Կառավարության նիստերը դռնփակ են: Վարչապետի որոշմամբ նիստի մի մասը կարող է անցկացվել դռնբաց: Կառավարության անդամն իրավունք չունի առանց վարչապետի թույլտվության տեղեկատվություն հրապարակել Կառավարությունում քննարկված որևէ հարցի քննարկման ընթացքի մասին»:
Օրինագիծն ընդունվելու դեպքում ուժի մեջ է մտնելու նոր վարչապետի ընտրությունից հետո: