ԵՐԵՎԱՆ, 6 մարտի — Sputnik. Նոր կառավարությունը կունենա 17 նախարար, մեկ առաջին փոխվարչապետ և 2 փոխվարչապետ: Կառավարության նման կառուցվածք նախատեսում է անհետաձգելի կարգով ԱԺ ներկայացված Կառավարության գործունեության ու կառուցվծքի մասին ՀՀ օրենքի նախագիծը:
Նշենք, որ այժմ նախարարությունների թիվը 18 է: Նոր կառավարության կազմից հանվել է Միջազգային ինտեգրման և բարեփոխումների նախարարությունը:
Փոխվարչապետներին սպասարկելու է նոր ստեղծվող գրասենյակը: Բացի այդ գրասենյակից կառավարության աշխատակազմում ևս 3 նոր մարմին կստեղծվեն` պետական արարողակարգի, պետական վերահսկողության և պետական պահպանության ծառայություններ:
Հիմնական զեկուցող արդարադատության նախարար Դավիթ Հարությունյանը հայտնեց նաև, որ նոր օրենքով վարչապետը կարող է զրկվել իր լիազորությունները կատարելուց, եթե կորցնում է քաղաքացիությունը, ձեռք է բերում այլ երկրի քաղաքացիություն կամ խախտվում են օրենքով նախատեսված անհամատեղելիության պահանջները: Վարչապետը կարող է զրկվել պաշտոնից նաև այն դեպքում, եթե ընտրվելուց հետո հինգօրյա ժամկետում կառավարության անդամների անհրաժեշտ թվով թեկնածուներ չի առաջադրում:
