ԵՐԵՎԱՆ, 22 դեկտեմբերի — Sputnik. ԵՄ–ի հետ Հայաստանի հարաբերույունների համատեքստում 2018թ–ը պետք է դառնա պայմանագրի վավերացումների տարի։ Խոսելով արտաքին քաղաքական ոլորտում հաջորդ տարվա անելիքներից` այսօր Sputnik Արմենիա մամուլի կենտրոնում, լրագրողների հետ հանդիպմանն ասել է ՀՀԿ փոխնախագահ Արմեն Աշոտյանը։ Նրա խոսքով` Հայաստանը պետք է աշխատանքներ տանի ԵՄ անդամ 28 երկրներում վավերացման ուղղությամբ։
«Այս փաստաթուղթը քաղաքական փաստաթուղթ է և ամբողջությամբ միս ու արյուն ստանալու համար պետք է անցնի ԵՄ անդամ երկրների խորհրդարաններով։ Հատկապես ուզում եմ շեշտել այն ձևակերպումները, որոնք տեղ են գտել համաձայնագրում` կապված արցախյան հիմնախնդրի կարգավորման հետ։ ԵՄ–ի կողմից ամրագրվել է Հայաստանի արտաքին քաղաքական գերակայություններին ամբողջությամբ համապատասխանող բանաձև, ըստ որի խնդիրը պետք է կարգավորվի բացառապես ՄԽ համանախագահների ջանքերով, խաղաղ ճանապարհով, ժողովուրդների ինքնորոշման իրավունքի սկզբունքի հիման վրա»,– նշեց Աշոտյանը։
Պայմանագրի վավերացումից հետո այս սկզբունքները, Աշոտյանի դիտարկմամբ, կդառնան նաև ԵՄ անդամ երկրների ազգային խորհրդարանների կողմից ընդունված սկզբունքներ։
Արևտաքին քաղաքական ասպարեզում Արմեն Աշոտյանը կարևորեց նաև այս տարի Հայաստան–Չինաստան, Հայաստան- Իրան, Հայաստան–Իսրայել հարաբերությունների զարգացման ուղղությամբ իրականացված քայլերը` հույս հայտնելով, որ 2018թ–ին դրանք էլ ավելի կսերտանան։
Ինչ վերաբերում է Թուրքիայի հետ հարաբերություններին, Արմեն Աշոտյանը փաստեց, որ թե՛ քաղաքական, թե՛ տնտեսական և թե՛ դիվանագիտական ուղղություններով դրանք գտնվում են փակուղային վիճակում։ 2009–ին Հայաստանի նախաձեռնությամբ ստորագրված արձանագրություններն 2018թ–ի գարնանից այլևս քաղաքական օրակարգի մաս չեն լինելու։
«Թուրքիան ունի երեսը փրկելու խնդիր, բայց բոլոր ջանքերը տապալված են, որովհետև գերտերությունները շատ լավ գիտեն, թե ում պատճառով է տապալվել հայ–թուրքական կարգավորման գործընթացը»,–ասաց նա` հավելելով, որ Թուրքիայի ակնկալիքներն այս արձանագրություններից շաղկապված են բացառապես արցախյան խնդրի ադրբեջանամետ կարգավորումների հետ, ինչն անընդուների է հայկական կողմի համար։
«Վերջին 100 տարվա համար շատ արդիական պատմական իրողություն է`Ադրբեջանը պարզապես մեկ այլ Թուրքիա է տարածաշրջանում, մեկ այլ Թուրքիա` Հայաստանի և հայ ժողովրդի համար»,– ասաց Աշոտյանը։
Փոխարենը` հաջորդ տարի, ՀՀԿ փոխնախագահի խոսքով, Հայաստանի արտաքին քաղաքական օրակարգի կարևոր ուղղությւններից է լինելու հարաբերությունների աշխուժացումը իսլամական մի շարք երկրների հետ, այդ թվում` Իրանի, արաբական երկրների և իսլամական աշխարհի այն երկրների, որոնք, Արմեն Աշոտյանի ձևակերպմամբ, շատ քիչ տեղեկություն ունեն Հայաստանի մասին։
Աշոտյանը կարևորում է նաև ՀՀ–ԱՄՆ հարաբերությունների կառուցումը։ Հայաստանը, նրա համոզմամբ, պետք է զգոն լինի և հետևողական` հասկանալու համար, թե ինչ է կատարվում տարածաշրջանային և գլոբալ աշխարհաքաղաքական մակարդակներում։
