ԵՐԵՎԱՆ, 3 նոյեմբերի — Sputnik. Պաշտոնը ստանձնելուց առաջ նոր դեսպանին քննարկելը կոռեկտ չէ, 2018 թվական պետբյուջեի քննարկումներից հետո լրագրողներին ասաց ՀՀ արտգործնախարարի տեղակալ Շավարշ Քոչարյանը։
Թե ինչու Ռուբեն Սադոյանի անունը չէր հայտարարվում մինչև նշանակումը, ըստ Քոչարյանի` ընդունված չէ, որ մինչև հրամանագիրը սկսեն շոշափել անուններ և այնքան էլ կոռեկտ չէ հարևան պետության համար։
«Մեր հարևան Վրաստանը մեր երկրում բազմաթիվ դեսպաններ է նշանակել, սակայն վրացական մամուլում նշանակումներից առաջ երբեք քննարկումներ չեն եղել»,- ասաց նա:
Լրագրողները հարցրին` Սադոյանը մամուլում հայտնի է՝ որպես «շուն խփող», բիզնեսմեն, ի՞նչ սկզբունքով են ընտրվում դեսպանները։
«Հարցն իմ տիրույթում չէ»,- ասաց Քոչարյանը։
ՀՀ նախագահ Սերժ Սարգսյանի` հոկտեմբերի 31-ի հրամանագրով ծանրամարտիկ Յուրի Վարդանյանն ազատվեց դեսպանի պաշտոնից, և այդ պաշտոնում նշանակվեց Ռուբեն Սադոյանը:
Նախկին պատգամավոր Սադոյանը «շուն խփող» մականունը ստացել էր 2000-ական թվականներին, երբ դարձել է «Յունիգրաֆ-իքս» ընկերության համասեփականատեր, որը զբաղվում է թափառող կենդանիների վնասազերծման և ստերիլիզացման աշխատանքներով։