ԵՐԵՎԱՆ, 26 հոկտեմբերի — Sputnik. ՀՀ ԱԺ- ն այսօր որոշեց հետաձգել հանրային մեծ ռեզոնանս առաջացրած «Զինծառայության և զինծառայողների կարգավիճակի մասին» օրինագծի առաջին ընթերցմամբ քվեարկությունը և ևս 2 ժամ քննարկել այն։
Բանն այն է, որ երեկ խորհրդարանը սպառել էր ԱԺ կանոնակարգով քննարկման համար նախատեսված 4 ժամը, բայց պատգամավորները չէին հասցրել ելույթներ ունենալ։ Աժ նախագահ Արա Բաբլոյանն առաջարկեց քվեարկությամբ ևս 2 ժամով ավելացնել քննարկման տևողությունը։ Առաջարկն ընդունվեց միաձայն, պատգամավորները ելույթի հնարավորություն ստացան։
«Ելք» խմբակցության անդամ Գևորգ Գորգիսյանն իր ելույթում իշխանությանը մեղադրեց «Ազգ-բանակ» կոնցեպցիայով Հայաստանում ռազմական դիկտատուրա հաստատելու նպատակ հետապնդելու համար։ «Իսկ ո՞ւր էին ձեր պաթոսախառը ելույթները, երբ բանակը թալանում էին, երբ զինվորին թալանում էին»,- դիմելով իշխանամետ գործընկերներին ասաց ընդդիմադիր պատգամավորը։ Նա նաև մտավախություն հայտնեց, որ բոլոր 18 տարեկաններին զորակոչելը բացասաբար կազդի հենց բանակի որակի վրա։
«Եթե բոլոր 18 տարեկաններին բանակ տանեք, բանակը չի ունենա ռազմական մասնագետներ՝ ռազմական հոգեբաններ, փորձագետներ։ Արդյո՞ք ՊՆ-ն այս խնդիրը հաշվի է առել»,-ասաց Գորգիսյանը։
ՀՀԿ խմբակցության ղեկավար Վահրամ Բաղդասարյանն էլ իր ելույթում ընդդիմությանը կոչ արեց անհարկի չքաղաքականացնել օրինագծի քննարկումը։ «Սա այն օրենքը չէ, որ իրենց ընդդիմադիր կերպարում ինքնահաստատվելու ելքեր գտնեն, դրա համար կան այլ դաշտեր»,- ասաց Բաղդասարյանը։
ՀՀԿ-ական պատգամավորը նաև փաստեց՝ օրինագծի քննարկումը ցույց տվեց, որ այն ունի հասարակական պահանջ, և քաղաքական ուժերի կողմից էլ ամբողջական քննադատության չի արժանացել։
