ԵՐԵՎԱՆ, 24 հոկտեմբերի — Sputnik. ՀՀ նախագահ Սերժ Սարգսյանի համար շատ տարօրինակ իրավիճակ է ստեղծվել, երբ ժնևյան բանակցություններից հետո ադրբեջանական կողմը մի հատուկ չարությամբ փորձել է շեշտել, որ նա ինչ-որ պայմանավորվածություններ է խախտել: Ինչպես հայտնում է ՀՀ նախագահի մամուլի ծառայությունը, Սերժ Սարգսյանն այսօր այս մասին խոսել է ՊՆ Պաշտպանական ազգային հետազոտական համալսարանի կրթական նոր ծրագրի մեկնարկն ազդարարող նիստում` անդրադառնալով Ադրբեջանի նախագահ Իլհամ Ալիևի հետ հոկտեմբերի 16-ին կայացած ժնևյան հանդիպմանը հաջորդած իրադարձություններին։
«Անկեղծորեն տարօրինակ է, և ես մեր հաջորդ հանդիպմանը շատ անհամբեր սպասում եմ, որպեսզի իմ գործընկերոջը հարցնեմ, թե ինչն է նրանց զայրացրել: Ընդ որում՝ խոսում են մարդիկ, ովքեր, փաստորեն, ընդհանրապես տեղյակ չպետք է լինեն մեր խոսակցությանը, որովհետև մենք երկուսով ենք խոսել, և եթե մենք պայմանավորվածություն ենք ունեցել որևէ մեկին չասելու, ապա ինչպե՞ս են իր օգնականները, կամ, չգիտեմ, տեղակալները և այլն, թեմային ծանոթացել»,- ասել է Սարգսյանը։
Նշենք, որ Ադրբեջանի նախագահի աշխատակազմի արտաքին կապերի բաժնի պետ Նովրուզ Մամեդովը Հայաստանի և Ադրբեջանի նախագահների ժնևյան հանդիպումից հետո հայտարարել էր, որ «Հայաստանի նախագահը խախտել է Ղարաբաղի շուրջ համաձայնությունները և չի պահել խոստումը»։
«Հավատացնում եմ՝ մեր խոսակցությունից ես կես բառ անգամ որևէ տեղ չեմ ասել: Իսկ ի՞նչ եմ ասել Շվեյցարիայի հայ համայնքի հետ հանդիպմանը՝ ես ասել եմ, որ որևէ հայ ղեկավար չի կարող փաստաթուղթ ստորագրել, որը խաթարելու է Լեռնային Ղարաբաղի անվտանգությունը: Սա՝ մեկ: Երկրորդ՝ ես ասել եմ, որ Ղարաբաղն Ադրբեջանից դուրս պետք է լինի: Եվ երրորդ՝ ասել եմ, որ Ադրբեջանի նախագահն էլ է մտահոգված իր զինվորների անվտանգությամբ և զոհվելով: Այսինքն՝ այստեղ որևէ նոր բան կա՞: Ես կրկնել եմ այն, ինչ 20 տարի ասում եմ, ինչ 25 տարի մենք խոսում ենք»,- ասել է ՀՀ նախագահը:
Սարգսյանը ևս մեկ անգամ ընդգծել է, որ ժնևյան իրադարձություններին հաջորդած հայտարարությունը շատ տարօրինակ էր։
«Այսինքն, եթե որևէ մեկին թվում էր, թե եթե մենք Ժնևում բանակցել ենք, ասել ենք և հայտարարություն ենք ընդունել, որ լարվածությունը պետք է թուլանա՝ դա չի նշանակում, որ Ղարաբաղի անկախության ձգտումն էլ պետք է թուլանա: Անկեղծ ասած, ինձ համար շատ տարօրինակ է»,- ասել է նա:
Սարգսյանն ընդգծել է` մենք վրեժի և կոլեկտիվ պատժի գործողություններ չենք իրականացրել, չենք իրականացնում և չենք էլ իրականացնելու: Սակայն ամեն մի ռազմական կորստի դիմաց լինելու է հակառակ կողմի զինվորականների դեմ ուղղված հատուցման գործողություն:
«Լեռնային Ղարաբաղի հակամարտությունը էթնիկական և կրոնական բնույթ չի կրում: Մենք որևէ խնդիր չունենք ո՛չ ադրբեջանցի ժողովրդի, ո՛չ էլ առավել ևս մահմեդական կրոնի հետ: Մենք վստահ ենք, որ ադրբեջանցի ժողովուրդը խաղաղություն է ցանկանում, պարզապես այդ ցանկությունը պետք է ճիշտ հունի մեջ գցել»,- ասել է Սարգսյանը:
ՀՀ նախագահը շեշտել է` Արցախի ազատագրական շարժման ամենաառաջին իսկ օրվանից հայկական կողմն ամեն ինչ արել է այդ պահին գործող օրենքի և միջազգային իրավունքի շրջանակներում:
