ԵՐԵՎԱՆ, 17 հոկտեմբերի — Sputnik. ԵՄ–ի հետ ասոցացման մասին Հայաստանի կողմից համաձայնագրի ստորագրումը որևէ կերպ չի ազդի Հայաստանի քաղաքացիների կենսամակարդակի վրա, համենայն դեպս, այնքան ժամանակ, քանի դեռ երկիրն ուժեղ տնտեսություն չունի, Sputnik Արմենիայի մամուլի կենտրոնում ասաց քաղտեխնոլոգ Վիգեն Հակոբյանը։
«Մինչև Հայաստանը զարգացած տնտեսությամբ ուժեղ երկիր չդառնա, Հայաստան–ԵՄ գործընկերության մասին ընդլայնված և համապարփակ համաձայնագրի ստորագրումից մեծ հեռանկարներ ակնկալել պետք չէ», – ասաց Հակոբյանը։
Նրա խոսքով` Հայաստանում հայրենական արտադրանքի մեծ ծավալներ չկան, որոնք կկարողանայինք մատակարարել եվրոպական շուկա, բացի այդ հարկավոր է պահպանել բոլոր նորմերն ու չափորոշիչները։ Որպես բոնուս նա հետագայում դիտարկում է միության տարածքում պարզեցված մուտքի հնարավորությունը։
«Արևելյան գործընկերություն» ծրագիրը Եվրամիության հետ ասոցացման հեռանկար էր նախատեսում։ Ծրագրվում էր, որ Երևանը ԵՄ-ի հետ ասոցացման ու ազատ տնտեսական գոտու մասին համաձայնագիրը կստորագրի 2013 թվականին Արևելյան գործընկերության վիլնյուսյան գագաթնաժողովի ժամանակ, սակայն դրանից երկու ամիս առաջ Հայաստանը հայտարարեց, որ մտադիր է Մաքսային միությանն անդամակցել ու մասնակցել եվրասիական ինտեգրմանը։ Հայաստանը Եվրասիական տնտեսական միությանը միացավ 2015 թվականի հունվարին։
ԵՄ խորհուրդը 2015 թվականի նոյեմբերի 12-ին Լյուքսեմբուրգում արտաքին գործերի նախարարների մակարդակով հանդիպման ժամանակ լիազորեց Եվրոպական հանձնաժողովին բանակցություններ սկսել Հայաստանի հետ նոր համապարփակ համաձայնագրի վերաբերյալ, որը կփոխարինի գործող համաձայնագիրը ԵՄ-ի և ՀՀ-ի միջև գործընկերության ու համագործակցության մասին գործող համաձայնագրին։
