ԵՐԵՎԱՆ, 8 օգոստոսի – Sputnik. Միացյալ Նահանգները ղարաբաղյան հակամարտության կարգավորման հարցում կփորձեն ավելի ակտիվ դիրք գրավել, այսօր մամուլի ասուլիսի ժամանակ ասաց ՀՀ Գիտությունների ազգային ակադեմիայի Արևելագիտության ինստիտուտի տնօրեն, թուրքագետ Ռուբեն Սաֆրաստյանը:
ԱՄՆ–ին տարածաշրջանում, առաջին հերթին, հետաքրքրում է Վրաստանը և Սև ծովը:
«Ամերիկացիները կփորձեն ակտիվացնել իրենց դերը ԵԱՀԿ Մինսկի խմբի շրջանակներում: Կարելի է սպասել, որ իրենք հանդես կգան որոշակի նախաձեռնություններով, ինչպես նախորդ փուլի ժամանակ դա արեց Ռուսաստանը` փորձ կատարելով առաջ մղել բանակցային գործընթացը»,–ասել է Սաֆրաստյանը:
Այդ նախաձեռնությունները, նրա կարծիքով, չեն ունենա սկզբունքային բնույթ, այնուամենայնիվ, ԱՄՆ-ն կփորձի ակտիվություն ցուցաբերել այս հարցում:
Բոլոր միջնորդները քաջ գիտակցում են, որ բանակցային գործընթացում իրական առաջընթացի հասնելը բավականին բարդ խնդիր է:
Սաֆրաստյանը նշել է, որ ղարաբաղյան հարցի շուրջ Ռուսաստանի և ԱՄՆ դիրքորոշումները հակադրության մեջ չեն: Երկու երկրներն էլ շահագրգռված են, որպեսզի կոնֆլիկտը չսրվի:
