Հերմինե Նաղդալյան

Նաղդալյան. ՕՐՕ դաշինքը մեզ համար վտանգ չի ներկայացնում

21
(Թարմացված է 17:55 25.03.2017)
Հանրապետականները քաղաքական մրցակիներին վերացնելու ճանապարհ չէին բռնի նրանց նկատմամբ քրեական գործեր հարուցելով, պնդում է ՀՀ ԱԺ փոխխոսնակ Հերմինե Նաղդալյանը:

ԵՐԵՎԱՆ, 25 մարտի — Sputnik. «Օսկանյան-Րաֆֆի-Օհանյան» դաշինքն, ինչպես նաև Արցախի պաշտպանության բանակի նախկին ղեկավարը, ՀՀԿ-ի համար որպես քաղաքական մրցակիցներ վտանգ չեն ներկայացնում, Sputnik Արմենիա մամուլի կենտրոնում ասաց ՀՀ ԱԺ փոխխոսնակ Հերմինե Նաղդալյանը:

«Մենք ՕՐՕ-ի կամ այլ քաղաքական ուժերի նկատմամբ նման քայլերի դիմելու անհրաժեշտություն չենք տեսնում: Ո՛չ այդ քաղաքական դաշինքը, ո՛չ էլ մյուսները մեզ համար վտանգ չեն ներկայացնում, իսկ եթե նույնիսկ ներկայացնեին, մենք նման ճանապարհով չէինք գնա», — ասաց Նաղդալյանը:

Նրա խոսքով` հանրապետականները քաղաքականության մեջ երբեք քրեական տարրեր մտցնելու, ինչպես նաև քրեական գործերը քաղաքականացնելու կողմ չեն եղել:

ԱԺ փոխխոսնակը կոչ արեց չշտապել հետևություններ անել և սպասել իրավապահ մարմինների աշխատանքի արդյունքներին:

Նրա կարծիքով` ներկա պահին որոշ քաղաքական ուժեր փորձում են այս գործը քաղաքականացնելով դիվիդենտներ շահել:

Նաղդալյանը նաև նշեց, որ ավելի վաղ «ՕՐՕ» դաշինքը հայտնել էր, որ ուղիղ կապ չունի Սամել Բաբայանի հետ: Ուրեմն՝ կամ նախկին հայտարարությունն իրականությանը չէր համապատասխանում, կամ էլ դաշինքի ներկայացուցիչներն Բաբայանի ձերբակալման փաստն օգտագործում են քաղաքական նպատակներով:

ՊԲ-ի նախկին ղեկավար Սամվել Բաբայանը, ով սերտ կապված է «Օհանյան-Րաֆֆի-Օսկանյան» նախընտրական դաշինքի հետ, ձերբակալվել է երկու ամիս ժամկետով: Նրան մեղադրանք է առաջադրվել ՀՀ ՔՕ 235-րդ հոդվածի հատկանիշներով (ապօրինի կերպով ռազմամթերքի, ռազմական տեխնիկայի ձեռք բերելը, իրացնելը, պահելը, փոխադրելը կամ կրելը, մաքսանենգությունը, որոնք կատարվել են մի խումբ անձանց կողմից նախնական համաձայնությամբ:

Ավելի վաղ ԱԱԾ-ն հայտարարություն էր տարածել, որ մաքսանենգ եղանակով ՀՀ «Իգլա» տեսակի զենիթահրթիռային համալիր տեղափոխելու փաստի առթիվ հարուցված քրեական գործի շրջանակում ձերբակալվել է 3 անձ, այդ թվում՝ Արցախի պաշտպանության նախկին նախարար Սամվել Բաբայանը։

Русская версия

21