ԿԸՀ

ՀՀ ԱԺ փոխխոսնակը «արջի ծառայության» և նախընտրական «փուչիկների» մասին

40
ԱԺ փոխխոսնակ Հերմինե Նաղդալյանը մեկնաբանել է դպրոցների և մանկապարտեզների տնօրենների կողմից կազմված ընտրացուցակների հետ կապված սկանդալը:

ԵՐԵՎԱՆ, 25 մարտի — Sputnik. Ինչպես դպրոցի տնօրենները, այնպես էլ ուսուցիչները կարող են ստորագրահավաք իրականացնել իրենց համակիրների շրջանում, դա անում են բոլոր կուսակցությունները, Sputnik Արմենիա մամուլի կենտրոնում ասաց ԱԺ փոխխոսնակ Հերմինե Նաղդալյանը` մեկնաբանելով Հայաստանի ուսումնական հաստատությունների ղեկավարների շուրջ ծավալված սկանդալը:

Ավելի վաղ «Իրազեկ քաղաքացի միավորում» ՀԿ-ն ՀՀկ-ի անունից զանգահարել էր Երևանի և մարզերի բոլոր վարչական շրջանների դպրոցներ: Ավելի քան 100 դպրոցների և մանկապարտեզների տնօրեններ խոստովանել էին, որ ցուցակներ են ներկայացրել ՀՀԿ-ի համար: Միայն 103-ից 19 տնօրեն չի հաստատել ցուցակներ ներկայացնելու փաստը:

«Անձամբ չեմ լսել այդ ձայնագրությունները, սակայն գործընկերներս լրջորեն ուսումնասիրել են դրանք: ՀՀԿ շտաբի հայտարարությունը հենց այնպես չի արվել, սա լուրջ հայտարարություն է», — ասաց Նաղդալյանը:

Նրա խոսքով` ընտրական գործընթացի ամենասկզբից ստորագրահավաքի վերաբերյալ հայտարարություններ են արվում, սակայն դա անհրաժեշտություն է կուսակցության համար, քանի որ հենց այդպես են նրանք որոշում ընտրազանգվածի քանակը:

Նա նշեց, որ սրա տակ միանգամից բացասական երևույթներ` ընտրակաշառքների կամ վարչական ռեսուրսների կիրառման տեսքով, պետք չէ ընկալել:

«Սա կազմակերպչական աշխատանք է, որն իրականացնում են բոլոր քաղաքական ուժերը: Ընտրացուցակների կազմումը չի նշանակում անձնագրեր հավաքել կամ ռեսուրսներ չարաշահել», — ասաց Նաղդալյանը:

Փոխխոսնակի խոսքով` ուսուցիչը կամ տնօրենը օրենք խախտելու, ստելու, իրավասությունները գերազանցելու իրավունք չունեն:

«Սակայն պետք է տարբերակել: Այնտեղ, որտեղ օրենքի խախտում է տեղի ունենում, որտեղ կլինեն փաստեր, մեղավորները կպատժվեն: Երկրի ղեկավարությունը հստակ հայտարարել է, որ պաշտոնական կարգավիճակը չարաշահած ցանկացած պաշտոնատար անձի գործողություններ, որոնք ուղղված կլինեն ինչ-որ մեկին ստիպողաբար քվեարկել տալուն, ապօրինի կհամարվեն: Նման մարդիկ, այդ թվում նաև տնօրենները, խիստ կպատժվեն», — նշեց Նաղդալյանը:

Մյուս կողմից, նա կարծում է, որ բոլոր գործողությունների տակ չէ, որ խախտումներ են թաքնված: Տնօրեններն ու ուսուցիչներն էլ են մարդ և նրանք էլ սեփական կարծիքն արտահայտելու իրավունք ունեն: Այլ հարց է, որ նրանք ոչ ոքի ստիպել չեն կարող, չեն կարող նաև քարոզչության համար օգտագործել աշխատանքային ժամանակն ու պաշտոնը:

Նա նշեց, որ ցանկացած դպրոցի կամ մանկապարտեզի տնօրեն, եթե նույնիսկ ցանկանա ՀՀԿ-ին «արջի ծառայություն» մատուցել, չի կարող ստիպել քվեարկել իր թելադրանքով կամ ստուգել նման քվեարկության արդյուքները:

«Ոչ ոք ստուգել չի կարող, թե ինչպես եք դուք քվեարկել, ում եք տվել ձեր ձայնը, խցիկում դուք լինելու եք մենակ և կարող եք քվեարկել այնպես, ինչպես կցանկանաք: Նման փորձերը պարզապես փուչիկ են, անկախ նրանից, թե ովքեր են դրանք փչում: Ցանկացած ղեկավար, ցանկացած քաղաքական ուժ պետք է հասկանան դա», — ասաց Նաղդալյանը:

Նրա խոսքով նույնը վերաբերում է նաև ընտրակաշառքներին: Դա, ինչպես նշեց Նաղդալյանը, հավասարազոր է «փողը քամուն տալուն»:

ՀՀԿ շտաբը բացատրություն է տվել կատարվածի վերաբերյալ: Չհերքելով ՀԿ-ի ներկայացրած փաստերը՝ ՀՀԿ-ն հայտնել է, որ ընտրողների հետ տարվող աշխատանքները՝ ստորագրահավաք, պոտենցիալ ընտրողների արձանագրում, մոբիլիզացիա և ինքնության հաստատում են ենթադրում:

Հայտարարության հեղինակների հավաստմամբ` ձայնագրությունների մեծ մասի ուսումնասիրությունը հիմքեր չի տալիս ՀՀ ԸՕ խախտումների վերաբերյալ մեղադրանքներ առաջադրելու համար, իսկ «Իրազեկ քաղաքացի միավորում» ՀԿ-ն քաղաքական բնույթի ոչ ազնիվ քայլերի է դիմել:

Русская версия

40