Լևոն Տեր–Պետրոսյան

Ծառուկյանից բացի, վերադառնում է նաև Տեր-Պետրոսյանը

31
ԲՀԿ-ից բացի, առաջնորդի վերադարձի մասին այսօր հայտարարել է նաև ՀԱԿ-ը: Առաջիկա խորհրդարանական ընտրություններին ՀԱԿ ցուցակը կգլխավորի ՀՀ առաջին նախագահը:

ԵՐԵՎԱՆ, 9 դեկտեմբերի — Sputnik. ԲՀԿ նախկին նախագահ Գագիկ Ծառուկյանն է որոշելու, թե ինչ սխեմայով է «Բարգավաճ Հայաստան» կուսակցությունը մասնակցելու խորհրդարանական ընտրություններին: Այսօր հայտարարել է ԲՀԿ խմբակցության պատգամավոր Միքայել Մելքումյանը:

Իսկ ո՞վ է գլխավորելու ԲՀԿ ցուցակը. այս հարցն առայժմ պատասխան չունի: Դա ևս, ըստ Մելքումյանի, նույնպես Ծառուկյանը պիտի որոշի:

«Հարցի պատասխանը կապված է պարոն Ծառուկյանի՝ շատ շուտով կատարվելիք հայտարարության հետ: Հայտարարությունը չի ուշանա, սպասվում է առաջիկայում»,- ասաց նա:

ԲՀԿ-ական պատգամավորի համոզմամբ` այն ժամանակահատվածը, երբ Ծառուկյանը քաղաքականությունում չէր, ցույց տվեց, որ քաղաքական դաշում որոշակի փոշիացում է ընթանում, և նրա տեղը չլրացվեց:

Գագիկ Ծառուկյանից բացի, ակտիվ քաղաքականություն է վերադառնում նաև ՀՀ առաջին նախագահ Լևոն Տեր-Պետրոսյանը:

Ապրիլին կայանալիք Խորհրդարանական ընտրությունների ժամանակ հենց նա կգլխավորի ՀԱԿ ցուցակը: Այս մասին այսօր լրագրողներին հայտնեց ՀԱԿ խմբակցության ղեկավար Լևոն Զուրաբյանը:

Իսկ մինչ այդ, Լևոն Տեր-Պետրոսյանը ելույթով հանդես կգա դեկտեմբերի 17-ին նախանշված ՀԱԿ համագումարին:

31