ԵՐԵՎԱՆ, 9 նոյեմբերի — Sputnik, Արման Վանեսքեհյան. Տարածաշրջանում ԱՄՆ-ի դիրքորոշումն այսօր, ինչպես երբեք, թույլ է: Եվ այն հանգամանքը, որ ամերիկացիների դաշնակիցներ փեշմերգա քրդերն ու Սիրիական ժողովրդավարական կուսակցությունը միաժամանակ ռազմական գործողություններ են անցկացնում իրաքյան Մոսուլի և սիրիական Ռաքքայի ազատագրման համար, վկայում է, որ Վաշինգտոնը պատրաստ է հնարավոր ամեն ինչ անել՝ նախկին դիրքերն ու տարածաշրջանում ունեցած ազդեցությունը վերականգնելու համար, Sputnik Արմենիային ասաց թուրքագետ Հակոբ Չաքրյանը:
Նրա խոսքով՝ Սիրիայում ամերիկյան ազդեցության թուլացման գլխավոր պատճառը ռուսական օդատիեզերական ուժերի գործողություններն են, ինչի շնորհիվ հաջողվեց հաշված օրերի ընթացքում փոխել երկրի իրավիճակը և լրջորեն ճնշել ահաբեկչական խմբավորումներին: Այլ կերպ ասած՝ նրանք արել են այն, ինչը մի քանի տարվա ընթացքում չէր հաջողվում ամերիկացիներին և նրանց դաշնակիցներին:
Փորձագետը կարծում է, որ եթե առաջիկայում ԱՄՆ-ն չկարողանա շոշափելի հաջողությունների հասնել տարածաշրջանում, ապա կարելի է խոսել այն մասին, որ Վաշինգտոնը շատ բան է կորցրել Մերձավոր Արևելքում: Սպիտակ տունը ոչ մի դեպքում չի գնա դրան, և նոր ամերիկյան վարչակազմը Մերձավոր Արևելքում չի փոխի ներկա արտաքին քաղաքականությունը:
«Կարծում եմ, որ պետք չէ հատուկ նշանակություն տալ Թրամփի նախընտրական խոստումներին: Երբ նա ձեռնամուխ լինի նախագահական պարտականությունների կատարմանը, պետդեպարտամենտը և պենտագոնը նրան կներկայացնեն Մերձավոր Արևելքի իրավիճակը, և նոր նախագահը կհասկանա, որ չի կարելի հեռանալ այնտեղից: Ավելին՝ նա կհասկանա, որ ամերիկյան դիրքերն ամրապնելու նպատակով պետք է ուժեղացնի ճնշումը:
«Այնպես որ, ես չեմ զարմանա, եթե անգամ Թրամփը մեծացնի ամերիկյան ռազմական ներկայությունը Մերձավոր Արևելքում», — ասաց Չաքրյանը:
Նրա խոսքով՝ ամերիկացիները նույնիսկ այն քայլի են գնացել, որ լրջորեն վնասել են ՆԱՏՕ-ի դաշնակից Թուրքիային, որի համար քրդական գործոնը կարծես կարմիր կտոր լինի ցլի համար: Միաժամանակ ԱՄՆ-ն շեշտը դրել է հենց քրդերի վրա՝ խոստանալով նրանց ինքնավարություն կամ սեփական պետություն, միայն թե նրանք օգնեն ամերիկացիներին հաստատվել տարածաշրջանում և վերականգնել նախկին ազդեցությունը:
Ինչպես նշեց թուրքագետը, այդ առումով Թուրքիայի գործերն ավելի քան վատ են. ԱՄՆ-ն թույլ չի տվել, որ նա մասնակցի Մոսուլի և Ռաքքայի ազատագրման գործողություններին, իսկ Հալեպում Ռուսաստանը թույլ չի տվել մասնակցել մարտական գործողություններին:
«Այնպես որ, ով էլ նստի Սպիտակ տանը, Վաշինգտոնը ոչ մի դեպքում ռազմական գործողություններ չի ծավալի Սիրիայում և Իրաքում: Դա կնշանակի, որ ԱՄՆ-ն ընդունում է իր ձախողումը Մերձավոր Արևելքում: Ամերիկյան հարկատուները դա չեն հասկանա», — ասաց Չաքրյանը:
