ԵՐԵՎԱՆ, 4 հուլիսի — Sputnik. ՀՀ Ազգային ժողովի գարնանային ավարտված նստաշրջանի կարևոր ձեռքբերումը խորհրդարանի փոխնախագահ Հերմինե Նաղդալյանը համարում է Ընտրական օրենսգրքի ընդունումը, քանի այն ուներ ժամանակային պահանջ։
«2017թ.-ի ապրիլի ընտրությունները մոտ էին, և մենք պետք է կարողանայինք մեկ տարի առաջ ընդունել և քաղաքական ուժերին տալ այն փաստաթուղթը, որով պիտի մասնակցեն ընտրություններին»,- նշեց Նաղդալյանը։
Նա կարծում է, որ Ընտրական օրենսգրքի քննարկման ժամանակ «հանդես եկանք նոր գործելաոճով», որն առավել հարիր է ժողովրդական հասարակությանը, աշխատանք տարվեց նաև քաղաքացիական հասարակության ինստիտուտների հետ։
«Արդյունքում մենք ունեցանք մի փաստաթուղթ, որը մեծ մասի համար ընդունելի է, և որը կարող է լինել մեզ համար հիմք, ուղեցույց` իրականում ազատ և արդար ընտրություն անցկացնելու համար։ Այս իմաստով ցանկանում եմ ընդգծել իշխանության ջանքերը, որը ցույց տվեց, որ ականջալուր է, կարող է աշխատել, ուզում է լսել և ընդառաջ գնալ»,- կարծում է Նաղդալյանը։
Խոսելով սահմանադրական փոփոխությունների մասին` փոխխոսնակը նշեց, որ նոր Սահմանադրությունը արմատական լուծում է տալիս մի շարք խնդիրների։ Նա կարծում է, որ այս փաստաթղթով խորհրդարանական այլ մշակույթի հիմքեր են դրվել, որտեղ փոքրամասնության ձայնը չի լինելու երկրորդական, որտեղ փոքրամասնությունը չի լինելու ստորադաս, ճնշված կամ զրկված իր հայացքները, առաջարկները ներկայացնելու հնարավորությունից։ Մեծամասնությունը պարտադրված է լինելու ականջալուր լինել փոքրամասնությանը։ Եվ դա աշխատանքային և քաղաքական այլ կուլտուրա է բերելու։
Սահմանադրությունից հետո, նրա խոսքով, շուրջ 200 օրենսդրական ակտերի փոփոխություններ, նորացումեր, լրացումներ և օրենքներ պիտի ընդունի խորհրդարանը։
Իսկ ընդհանրապես գարնանային նստաշրջանի ժամանակ խորհրդարանը հարյուրից ավելի օրենսդրական ակտեր և օրենքներ է ընդունել, քննարկել 30-ից ավելի միջազգային պայմանագրեր, մոտավորապես 130-140 տարբեր բնույթի որոշումներ է կայացրել, ունեցել է 2 արտահերթ նստաշրջան, երեք արտահերթ նիստ։
