ՀՀ Ազգային ժողով

Հայ պատգամավորները կքննարկեն եզդիների ցեղասպանության ճանաչման հարցը

41
Եզդիների ցեղասպանության ճանաչման հարցն առաջիկայում կքննարկվի Հայաստանի Ազգային ժողովի մասնագիտական հանձնաժողովում, հաղորդել է նախաձեռնության հեղինակը

ԵՐԵՎԱՆ, 9 հունիսի-Sputnik. Առաջիկայում եզդիների ցեղասպանության ճանաչման վերաբերյալ որոշման նախագիծը կդրվի Հայաստանի խորհրդարանի արտաքին հարաբերությունների հանձնաժողովի քննարկմանը, Sputnik Արմենիային ասաց «Բարգավաճ Հայաստան» խմբակցության ղեկավար Նաիրա Զոհրաբյանը։

2014թ.-ի օգոստոսի սկզբին ԻՊ ահաբեկիչներն Իրաքի հյուսիսում գրավել են Շանգալ (Սինջար) շրջանը, որը բնակեցված է առավելապես եզդիներով` կոտորելով տեղի բնակչությանը։ Տարբեր տվյալներով` սպանվել է շուրջ 5 հազար մարդ, մոտ 7 հազար կին և երեխա ստրկության է տարվել, մի քանի հարյուր հազար եզդի փախստական է դարձել։

«Օրենքի նախագիծը օրակարգում է, ես կարծում եմ, որ առաջիկայում ԱԺ համապատասխան հանձնաժողովում քննարկում կլինի։ Նախաձեռնությանը միացել է նաև պատգամավոր Թևան Պողոսյանը։ Բոլոր իրավական հիմնավորումները նախապատրաստված են և կներկայացվեն պատգամավորներին»,- ասաց Զոհրաբյանը։

Նրա խոսքով` իրավաբանների հետ խորհրդակցություններ են անցկացվել այն առիթով, որպեսզի ճիշտ որակվի Իրաքի հյուսիսում տեղի ունեցածը։ Պատգամավորը հույս է հայտնել, որ Հայաստանի խորհրդարանը կաջակցի նախաձեռնությանը։

Ներկա պահին «Բարգավաճ Հայաստան» կուսակցության անդամները «Սինջար» եզդիների միավորման ներկայացուցիչ Բորիս Մուրազիի հետ (գլխավորում է կուսակցության ազգային փոքրամասնությունների հարցերի հանձնաժողովը) հանդիպումներ են անցկացնում խորհրդարանի այլ խմբակցություններ հետ։

«Եթե մենք ակնկալում ենք, որ աշխարհը պետք է որակի Օսմանյան կայսրությունում տեղի ունեցածը որպես ցեղասպանություն, և դա պետք է առաջին հերթին անի Թուրքիան, ապա Հայաստանն իր հերթին պետք է որպես ցեղասպանություն ճանաչի այն, ինչ տեղի է ունեցել Իրաքի հյուսիսում եզդի ժողովրդի հետ։ Եվ դա միանշանակ բոլոր չափանիշներով ցեղասպանություն է»,- ասաց Զոհրաբյանը։

Ի վերջո, նրա խոսքով, եզդիական համայնքը Հայաստանի ամենամեծ համայնքն է, թեև առանց այդ էլ պետք է իրերը կոչել իրենց անուններով։

Հայաստանում ապրում է շուրջ 42 հազար եզդի։ Դա հանրապետության ազգային փոքրամասնության ամենամեծ համայնքն է։ Հայաստանում ապրում են 11 ազգային փոքրամասնությունների ներկայացուցիչներ` եզդիներ, քրդեր, ասորիներ, հույներ, ռուսներ, ուկրաինացիներ, հրեաներ, բելառուսներ, վրացիներ, գերմանացիներ և լեհեր։

41