Երևան–Մոսկվա–Բաքու տեսակամուրջ

Պատգամավոր. Երևան-Բաքու տեսակամուրջները կօգնեն վստահության մթնոլորտ ստեղծել

22
(Թարմացված է 19:03 04.06.2016)
Պատգամավոր Խոսրով Հարությունյանը կարծում է, որ Հայաստանի և Ադրբեջանի միջև տեսակամուրջները կարող են հարթակ դառնալ ազգային դիվանագիտությունը լավացնելու համար

ԵՐԵՎԱՆ, 4 հունիսի — Sputnik. Երևանի և Բաքվի միջև տեսակամուրջների պարբերաբար անցկացումը կարող է նպաստել երկխոսության ամրապնդմանը և կողմերի միջև վստահության ձևավորմանը, Sputnik Արմենիային ասաց պատգամավոր Խոսրով Հարությունյանը:

Sputnik Արմենիայի նախաձեռնությամբ կազմակերպված Երևան-Մոսկվա-Բաքու առաջին տեսակամրջի թեման Լեռնային Ղարաբաղի հակամարտության կարգավորման ուղիներն ու Ռուսաստանի միջնորդության հեռանկարներն էին կարգավորման հարցում: 

Հարությունյանը կարծում է, որ երկրների միջև լարված իրավիճակի պայմաններում տեսակապի մասնակիցների միջև տեղի ունեցած բանավեճը նորմալ էր: Նա այն կարծիքին է, որ Sputnik Արմենիայի առաջարկած նախաձեռնությունը պետք է պարբերական բնույթ կրի, սակայն քննարկումները ինքնանպատակ չպետք է լինեն:

«Անհրաժեշտ է նման զրույցների շնորհիվ վստահության մթնոլորտ ստեղծել: Դա հեշտ չէ, դժվար կլինի: Շփումը չպետք է վեճով ավարտվի, ինչին հասցրեցին Բաքվի մասնակիցները` շեղվելով բուն հարցի քննարկումից: Սակայն պետք է փորձել, շարունակել` կողմերի միջև վստահության ձևավորմանն ուղղված կոնցեպտի կիրառմամբ», — ասաց Հարությունյանը:

Նրա խոսքով` հաջորդ տեսակամրջի ժամանակ կարելի է քննարկել ժողովրդական և միջկառավարական դիվանագիտության ռեսուրսների օգտագործման հարցը: Պետք է որոշվի նպատակը, որից հետո այն իրականացվի քայլ առ քայլ:

Հարությունյանը կարծում է, որ կարող է աշխատանքային խումբ ստեղծվել, որտեղ ներգրավված կլինեն Ռուսաստանի, Հայաստանի և Ադրբեջանի փորձագետները, մարդիկ, ովքեր համոզված են, որ երկխոսությունը պատերազմից ավելի ճիշտ է:

Նման քննարկումներ անցկացնելու գաղափարը ողջունելի է համարել նաև հայկական կողմից տեսակամրջի մյուս մասնակից, պատգամավոր Թևան Պողոսյանը: Սակայն, նրա խոսքով, ադրբեջանցի հյուրերը պետք է նորմալ երկխոսություն վարեն, այլ ոչ թե անցնեն վիրավորանքների:

Теван Погосян
Photolure
Թևան Պողոսյան

Նախաձեռնությունը շարունակելու մասին խոսելիս Պողոսյանը նշեց, որ կարելի է վերանայել նման քննարկումների ձևաչափը` տաղավար հրավիրելով ոչ միայն քաղաքական գործիչների, ովքեր մտածում են առաջիկա ընտրությունների մասին, այլև փորձագետների և հասարակ մարդկանց:

«Կարող են փորձագետներ լինել, սակայն ես կարծում եմ, որ կարելի է հրավիրել նաև հասարակ մարդկանց, օրինակ` փախստականների հարցով: Սակայն դա շատ փխրուն հարց է, այդ իսկ պատճառով, հավանաբար, փորձագետներն ավելի լավ կլինեն», — ասաց Պողոսյանը:

Միևնույն ժամանակ պատգամավորը կարծում է, որ Ղարաբաղյան հակամարտության քննարկումների ժամանակ տեսակամրջին պետք է մասնակցի նաև Ստեփանակերտը, այլապես երկխոսությունն անարդյունավետ կլինի:

«Հակամարտության իրական ձևաչափը ոչ թե Հայաստան-Ադրբեջանն է, այլ Ղարաբաղ-Ադրբեջանը: Ինչ վերաբերում է ԶԼՄ-ների ազատությանը, կոռուպցիայի դեմ պայքարին, եվրոպական ինտեգրմանը և այլն, ապա դա կարող է քննարկվել երկկողմ ձևաչափով», — ասաց Պողոսյանը:

Տեսակամուրջը դարձավ շաբաթվա ամենահիշվող իրադարձություններից մեկը: Տեսակապին ներկա էին ինչպես էլեկտրոնային ԶԼՄ-ների (News.am, 168 ժամ, Panorama, Times.am, Yerkir, EADaily, Arminfo, armnews), այնպես էլ տպագիր հրատարակությունների (Հայկական ժամանակ, Առավոտ) ներկայացուցիչները։ Տեսակամրջին ամենաքիչը ներկայացված էին հեռուստաընկերությունները (А1+, ԱրարատTV):

Sputnik Արմենիայի նախաձեռնությունը լրագրողների կողմից մեծ հետաքրքրությամբ ընդունվեց, մասնավորապես` panorama.am-ը, հղում անելով Sputnik-ին, ուշադրություն էր հրավիրել այն հանգամանքին, որ սա «առաջին «բանակցությունների սեղանն էր»` ապրիլին Լեռնային Ղարաբաղում հակամարտության թեժացումից հետո»:

22