Ստեփանակերտ

Նալբանդյան. Առանց Ղարաբաղի ցանկացած փաստաթղթի ստորագրումն անհնար է

12
(Թարմացված է 17:55 26.05.2016)
Բանակցությունների վերսկսման համար պետք է ստեղծվեն համապատասխան պայմաններ, ասաց Հայաստանի ԱԳՆ ղեկավարը

ԵՐԵՎԱՆ, 26 մայիսի — Sputnik. Բանակցային գործընթացում առանց Լեռնային Ղարաբաղի մասնակցության նոր փաստաթղթերի ստորագրումն անհնար է, հայտարարեց Հայաստանի ԱԳՆ ղեկավար Էդվարդ Նալբանդյանը՝ Ազգային ժողովում պատասխանելով պատգամավորների հարցերին:

«Մինչև հիմա քննարկված բոլոր աշխատանքային փաստաթղթերում, որոնց շուրջ բանակցություններ են ընթացել և որոնք պահվում են ԵԱՀԿ քարտուղարությունում, առկա է կետ, որը ենթադրում է բանակցություններում Լեռնային Ղարաբաղի մասնակցությունը»,- ասաց Նալբանդյանը:

Ինչ վերաբերում է բանակցություններին, ապա նրա խոսքով՝ պարզ է մի բան՝ դրանք սկսելու համար պետք է ստեղծվեն համապատասխան պայմաններ:

«Հայաստանը նախապայմաններ չի առաջադրել, խոսքն ընդամենն այն մասին է, որպեսզի ստեղծվեն պայմաններ բանակցություններ վարելու համար: Այդ պայմանների մասին ասել են համանախագահները, իսկ կողմերը պատասխանատվություն են ստանձնել»,- ասաց Նալբանդյանը:

Նրա կարծիքով, եթե այդ պայմանները ստեղծվեն, կներդրվեն դիտարկման մեխանիզմներ և կընդլայնվեն ԵԱՀԿ գործող ղեկավարի անձնական ներկայացուցչի գրասենյակի լիազորությունները, այլ կերպ ասած` կբացառվեն այն զարգացումները, որոնք եղել են ապրիլի սկզբին, և հնարավոր կլինի սկսել բանակցությունները:

Խոսելով Հայաստանի և Ադրբեջանի միջև ամենաբարձր մակարդակով հնարավոր հանդիպման մասին՝ Նալբանդյանը նշեց, որ հունիսի սկզբին կկայանան Հայաստանի և Ադրբեջանի ԱԳՆ ղեկավարների առանձին հանդիպումները ԵԱՀԿ Մինսկի խմբի միջնորդների հետ, սակայն հանդիպման վայրը դեռ որոշված չէ:

Նալբանդյանի խոսքով՝ նախագահների հնարավոր հանդիպման նպատակը կարող է դառնալ հակամարտության կարգավորման գլխավոր ուղղությունների մշակումը:

«Ժամանակին մենք դրանք անվանել ենք սկզբունքներ, և հիմա էլ կարելի է այդպես անվանել կամ կոչել հակամարտության կարգավորման շրջանակային ձևաչափ: Դա թույլ կտա կողմերին մշակել իրավապայմանագրային փաստաթուղթ, ինչը կօգնի կարգավորել հակամարտությունը բացառապես խաղաղ ճանապարհով»,- ասաց նախարարը:

Ղարաբաղյան հակամարտությունը սրվեց ապրիլի 2-5-ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։

Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։

Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։

Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկելու դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։

12