Анкара, столица Турции

Թուրքագետ. Թուրքիան փորձում է փոխել ժողովրդագրական ցուցանիշը

21
Թուրքիայի իշխանությունը պատրաստվում է Ուկրաինայի հակամարտության գոտուց շուրջ 3 հազար թուրք-մեսխեթների վերաբնակեցնել երկրի արևելյան Կարս և Էրզինջան գավառներում

ԵՐԵՎԱՆ, 21 հոկտեմբերի- Sputnik. Թուրքիան թուրք-մեսխեթների վերաբնակեցման միջոցովփորձում է մասամբ փոխել ժողովրդագրական իրավիճակը երկրի արևելքում, Sputnik Արմենիա պորտալին ասաց թուրքագետ Գևորգ Պետրոսյանը:

Ավելի վաղ հայտնի է դարձել, որ թուրքական իշխանությունները նախատեսում են Ուկրաինայի հակամարտության գոտուց շուրջ 3 հազար թուրք-մեսխեթների վերաբնակեցնել երկրի արևելյան Կարս և Էրզինջան գավառներում:

«Հաշվի առնելով այն, թե ինչպիսի տարածքներ են ընտրել թուրք-մեսխեթների վերաբնակեցման համար, կարելի է եզրակացնել, որ թուրքական իշխանությունները մասամբ լուծում են ժողովրդագրական հարցը: Թուրքիան փորձում է ազդել բնակչության էթնիկ կազմի վրա` նրանց բնակեցնելով Կարսում և Երզնկայում, որտեղ մեծամասնություն են կազմում քրդերը »,- ասաց Պետրոսյանը:

Նրա խոսքով` թուրք-մեսխեթների վերոհիշյալ թիվը մեծ դեր չի խաղա ժողովրդագրության մեջ, սակայն իշխանությունն աշխատում է այդ ուղղությամբ և հայտարարում, որ տվյալ պահին պատրաստ է ընդունել մինչև 6 հազար մարդու:

Թուրքագետը նշում է, որ հարցը մեկ այլ կողմ էլ ունի` Թուրքիան փորձում է իրեն թուրքալեզու բնակչության պաշտպան ներկայացնել:

«Ուկրաինական հակամարտության սկզբից ի վեր Թուրքիան փորձում է օգտագործել էթնիկական սկզբունքը: Սկզբում նրանք բարձրացնում էին Ղրիմի թաթարների հարցը, որից հետո անցան թուրք-մեսխեթներին»,- ասաց Պետրոսյանը:

Նրա խոսքով` վերջին տարիներին այդ հարցը շոշափվում է նաև Վրաստանի թուրք-մեսխեթների առնչությամբ, որոնք 40-ական թթ.-ին Ստալինի որոշմամբ աքսորվել էին Վրաստանից:

«Երկու երկրների հարաբերություններում խաղարկվում է նաև աքսորված վրացիներին Վրաստան վերադարձնելու հարցը: Թուրք-մեսխեթների պաշտպանության հարցը Թուրքիայի արտաքին քաղաքականության ուղղություններից մեկն է, և Թուրքիանը փորձում է իրեն որպես թուրքալեզու ժողովուրդների պաշտպան ներկայացնել»,- ասաց Պետրոսյանը:

21