Փորձագետ. Սահմանադրական բարեփոխումների փաթեթեը որևէ տեսանկյունից առաջընթաց չէ
ԵՐԵՎԱՆ, 25 օգոստոսի– Sputnik. Սահմանադրության փոփոխության նախագիծը չի կարող որևէ տեսանկյունից համարվել առաջընթաց, քանի որ այդ փոփոխությունների հիմնական նպատակը բոլորի համար մնում է անհայտ, «Sputnik-Արմենիա» ռադիոկայանի հետ զրույցում ասաց քաղաքական և ընտրական տեխնոլոգիաների փորձագետ Վիգեն Հակոբյանը:
Նա տարակուսանք է հայտնում, թե որքանով էր անհրաժեշտ հիմա՝ թե՛ աշխարհաքաղաքական, թե՛ ներքաղաքական այս բարդ իրավիճակում, նախաձեռնել մի միջոցառում, որի թե՛ վերջնական արդյունքը, թե՛ նպատակները կասկածելի են:
«Եթե նայենք ընտրական տեխնոլոգիաների տեսանկյունից, ապա չէի ասի, որ այս նախագծում դրանք շեշտակիորեն նշվում են, քանի որ կարծում եմ` եթե սահմանադրության նախագիծն անցնի, ապա նոր միայն դրանից հետո կմշակվի Ընտրական օրենսգիրքը, և միայն այդ ժամանակ կարող ենք ասել ընտրական մեխանիզմների տեսանկյունից առաջընթա՞ց է, թե՞ ոչ: Հիմա կարող ենք միայն ասել, թե որքանով է նպատակահարմար կառավարման մի մոդելից մյուսին անցնելը, արդյոք դա բխո՞ւմ է քաղաքական, աշխարահաքաղաքական, ներքաղաքական կամ հասարակական պահանջից»,-հարցադրում է արել բանախոսը:
Հակոբյանի կարծիքով՝ ոչ մի սահմանադրություն, մեծ հաշվով, վատը չի եղել թե՛ կառավարման մեխանիզմների, թե՛ կայունություն ապահովելու առումներով:
«Կառավարությունը բավական արդյունավետորեն օգտագործում էր իր լծակները և այդպիսով կարողանում էր դուրս գալ իրավիճակից: Խնդիրը ոչ թե առաջադեմ մեխանիզմներն են, այլ սահմանդրության կատարումը: Եթե կա քաղաքական կամք, ապա չեմ կարծում, որ այսօրվա մոդելը հետամնաց է»,-վստահ է նա:
Ի վերջո, սահմանադրության փոփոխությունից ի՞նչ է շահելու շարքային քաղաքացին: Փորձագետը նկատում է՝ այս պահի դրությամբ քաղաքացիների ճնշող մեծամասնության համար բացարձակ միևնույն է, թե կառավարման որ մոդելն է լինելու:
«Եթե քաղաքացին չի հավատում, որ սահմանադրության փոփոխմամբ իր կյանքը կբարելավվի, կդառնա ավելի կայուն, ֆինանսական արտաքին ճգնաժամերը չեն ազդի իր կյանքի մակարդակի վրա, ապա նրա համար բացարձակապես միևնույն է, և նա անտարբեր է բոլոր տիպի քաղաքական պրոցեսների նկատմամբ»,-հավոզված է Հակոբյանը:
Ժողովրդին քաղաքական թմբիրից դուրս բերելու միակ տարբերակը, ըստ քաղտեխնոլոգի, այն է, որ ընդդիմությանը հաջողվի միավորվել սահմանադրության նախագծի դեմ և բնակչությանը համոզել, որ այս բարեփոխումները պարզապես մի նոր մեխանիզմ է՝ իշխանության վերարտադրման համար։
Փաշինյան–Ծառուկյան հանդիպումն այսօր չի կայանա. սպասում են քաղաքական խորհրդի որոշմանը
(Թարմացված է 11:52 05.03.2021)
Հնարավո՞ր է, որ ԲՀԿ–ն հրաժարվի Վազգեն Մանուկյանի գլխավորությամբ ժամանակավոր կառավարության ձևավորման` ընդդիմադիր շարժման առաջ քաշած դիրքորոշումից ու ընդունի խորհրդարանը ցրելու և նոր ընտրություններ անցկացնելու Փաշինյանի առաջարկը։
ԵՐԵՎԱՆ, 5 մարտի - Sputnik. ՀՀ վարչապետ Նիկոլ Փաշինյանի` արտահերթ ընտրությունների առաջարկը ԲՀԿ–ն չի քննարկել։ Տեղեկությունն այսօր ԱԺ–ում կայացած ճեպազրույցում հայտնեց «Բարգավաճ Հայաստան» խմբակցության պատգամավոր Իվետա Տոնոյանը։
«Քանի որ այսօր կուսակցության քաղխորհրդի նիստ նախատեսված չէ, հետևաբար Նիկոլ Փաշինյան– Գագիկ Ծառուկյան հանդիպում ևս նախատեսված չէ»,–ասաց Տոնոյանը` հավելելով, որ այդ որոշումը պետք է բացառապես քաղաքական խորհրդի ձևաչափում կայացվի։ Այսինքն` ի հայտ եկած նոր իրողությունների քննարկում լինի, քաղաքական ներկա իրավիճակի ուսումնասիրություն, վերլուծություն և ըստ այդմ`քաղաքական դիրքորոշում։
©
Sputnik / Asatur Yesayants
«Այս պահին մենք ձեռնպահ ենք մնում հարցի հետ կապված մեր անձնական դիրքորոշումը ներկայացնելուց, մինչ այն պահը, երբ քաղաքական խորհուրդը` Գագիկ Ծառուկյանի գլխավորությամբ, կքննարկի որոշումը»,– ասաց Տոնոյանը` պատասխանելով հարցին` հնարավո՞ր է, որ ԲՀԿ–ն հրաժարվի Վազգեն Մանուկյանի գլխավորությամբ ժամանակավոր կառավարության ձևավորման` ընդդիմադիր շարժման առաջ քաշած դիրքորոշումից ու ընդունի խորհրդարանը ցրելու ու նոր ընտրություններ անցկացնելու Փաշինյանի առաջարկը։
«Բարգավաճ Հայաստան» խմբակցության պատգամավոր Միքայել Մելքումյանն էլ շեշտեց, որ արտահերթ ընտրությունների անցկացումը նաև իրենց օրակարգում է։ «Խնդիրը դրանց անցկացման ժամկետի ու ձևաչափի մեջ է։ Բայց որ ճգնաժամ կա, ու այն երկար չի կարող շարունակվել, միանշանակ է»,– ասաց նա։
Մելքումյանը նշեց, որ կառավարման համակարգը չի գործում ու իր հաշվարկով դրա հետևանքով Հայաստանի տնտեսությունն օրական 5-7 մլն դոլար գումար է կորցնում։ Եվ սա, նրա խոսքով, ամիսներ շարունակվել այլևս չի կարելի։
Հիշեցնենք, որ մարտի 4-ին, կայացել է Մարուքյան–Փաշինյան հանդիպումը։ ԼՀԿ առաջնորդը հայտնել է, որ Հայաստանում ստեղծված ներքաղաքական իրավիճակից դուրս գալու ճանապարհը արտահերթ ընտրություններն են, որն անցկացնելու կամք ունի նաև վարչապետը։
«Բարգավաճ Հայաստանը» վարչապետ հետ հանդիպման չէր գնացել`հայտարարելով, որ նրանից հրավեր չի ստացել։
Այս վիճակից ելք գտնելը ժողովրդի պահանջն է. Մարուքյանը պատրաստ է խոսել բոլոր ուժերի հետ
(Թարմացված է 11:33 05.03.2021)
Մարուքյան–Փաշինյան հանդիպումն արդեն կայացել է։ ԲՀԿ–ն հայտարարել է, որ վարչապետից հրավեր չի տացել։ ԵՐԵՎԱՆ, 5 մարտի – Sputnik. ԱԺ «Լուսավոր Հայաստան» խմբակցության ղեկավար Էդմոն Մարուքյանը հույս ունի, որ խորհրդարանը ցրելու ու արտահերթ ընտրություններ նախաձեռնելու ՀՀ վարչապետի առաջարկին կմիանան նաև այլ քաղաքական ուժեր։ Այս մասին նա հայտարարեց այսօր ԱԺ–ում կայացած ճեպազրույցում։
«Սա մի պրոցես է, որտեղ պետք են զիջումներ, կոնսենսուսներ բոլոր կողմերից։ Հիմա, եթե ստացվի, կասենք` մենք ամեն ինչ արեցինք, որ այս երկրում ցնցումներ չլինեն, արյունահեղություն չլինի, ու լուծվեց այս հարցը։ Եթե չստացվի, կբացատրեն` ժողովրդին, որ հասանք այսինչ մակարդակին, բայց այդ մակարդակում առաջացավ այսինչ խնդիրը, և դա չեղավ»,– ասաց Մարուքյանը` հավելելով, որ այս վիճակից ելք գտնելը ժողովրդի պահանջն է, որն այլևս անկարող է դիմանալ այս պայմաններին։
«Ես մեկ ժամ խոսակցություն եմ ունեցել և պատրաստ եմ ցանկացած այլ ուժի հետ էլ այդ խոսակցությունն ունենալ»,– ասաց Մարուքյանը։
Հիշեցնենք, որ մարտի 4-ին, կայացել է Մարուքյան–Փաշինյան հանդիպումը։ ԼՀԿ առաջնորդը հայտնել է, որ Հայաստանում ստեղծված ներքաղաքական իրավիճակից դուրս գալու ճանապարհը արտահերթ ընտրություններն են, որն անցկացնելու կամք ունի նաև վարչապետը։
«Բարգավաճ Հայաստանը» վարչապետ հետ հանդիպման դեռ չի գնացել ու հայտարարել է, որ նրանից հրավեր չի ստացել։
Դիմակավորված ու զինված կողոպուտ Գյումրիում. կողոպտիչը հափշտակել է ամբողջ գումարը
(Թարմացված է 13:38 05.03.2021)
Դանակով զինված կողոպտիչը մտել է դեղատուն, սպառնացել աշխատակցին, հափշտակել գումարն ու փախել։ Իրավապահները քայլեր են ձեռնարկում նրան հայտնաբերելու ուղղությամբ։Գյումրիում գործող «Նատալի ֆարմ» դեղատունը երեկ կողոպտել են։ Տեղեկությունը հայտնում է shamshyan.com–ը։
Ըստ կայքի` ժամը 21։20-ի սահմանում դիմակավորված և զինված անձը մտել է Շիրակացի փողոցի թիվ 3/1 հասցեում գործող դեղատուն, սպառնացել դանակով ու այնտեղ աշխատող դեղագործ Արևիկ Գալստյանից պահանջել այնտեղ եղած ողջ գումարը։
Նա հափշտակել է գումարն ու փախել։ Դեպքի վայր են մեկնել ոստիկաններն ու քննիչները։
Կողոպուտի հատկանիշներով քննչական բաժնում նյութեր են նախապատրաստվում։
Ոստիկանությունն ու քննչական բաժինը ձեռնարկում են անհրաժեշտ օպերատիվ-հետախուզական և քննչական համատեղ գործողություններ՝ կողոպուտը կատարող անձի ինքնությունը պարզելու, նրան և հափշտակված գումարը հայտնաբերելու ուղղությամբ։
Կայքի տեղեկություններով՝ դեղատնից հափշտակվել է մոտ 130 հազար դրամ։