«Եվրատեսիլի» փորձերը քիչ են տարբերվում վերջնական ելույթից։ Երգիչները փորձն անում են լեփ–լեցուն դահլիճում, ժյուրիի ներկայությամբ, մեկնաբանություններով ու «իսկական» շոուի մյուս բաղադրիչներով։ Շեղվել չի կարելի։ Չմոռանանք, որ ծրագիրն առաջին հերթին հեռուստատեսային է ու այստեղ բառացիորեն մեկ սխալ քայլը, անփույթ շարժումը կամ թեք հայացքը կարող է փչացնել տպավորությունը։ Այդ պատճառով էլ ռակուրսներն ու շարժումները մանրամասն մշակվում են։
Իսրայելի մայրաքաղաք Թել Ավիվում մայիսի 12-ին մեկնարկել է «Եվրատեսիլ 2019» երգի միջազգային մրցույթի բացման հանդիսավոր արարողությունը:
41 երկրների պատվիրակներն արդեն ժամանել են գլխավոր իրադարձությունների կենտրոն։
Հայաստանն այս տարի ներկայացնում է երիտասարդ ու տաղանդավոր երգչուհի Սրբուհի Սարգսյանը:
Մայիսի 12-ին կայացել է մրցույթի «նարնջագույն գորգի» արարողությունը, որի ժամանակ տարբեր երկրների պատվիրակություններն անցել են գորգի վրայով, այնուհետև մասնակցել ընդունելությանը։ Սրբուկը ներկաներին հիացրել է իր արտաքին տեսքով:
Նրա ընտրած հագուստը «նարնջագույն գորգի» համար շարունակում է մնալ հայկական սոցցանցային տիրույթի քննարկումների կիզակետում։ Առանց կրծկալի սպիտակ կոստյումը տարաբնույթ արձագանքների պատճառ դարձավ։
Սակայն դա չի խանգարում, որ Սրբուկի «Walking Out» երգի տեսահոլովակը, ըստ դիտումների քանակի, «Եվրատեսիլի» յութուբյան պաշտոնական ալիքում մնա առաջատարներից մեկը։
Սրբուկը կբացի երկրորդ կիսաեզրափակիչը և ելույթ կունենա առաջինը։
Մենք չենք կարող քվեարկել մեր մասնակցի համար, այնպես որ մնում է միայն սպասել, թե ինչպես կգնահատեն նրա ելույթը մյուս երկրները։
Իսկ մինչ այդ դիտում ենք լուսանկարները, գնահատում, քննարկում համարները, կոստյումներն ու ռակուրսները։
