Ճամբարի կազմակերպիչը կանանց ֆուտբոլի հիմնախնդիրներով զբաղվող GOALS կազմակերպությունն էր, որը հիմնել են ԱՄՙՆ խաղաղապահ կորպուսի կամավորները:
GOALS-ի գործադիր տնօրեն Լորիկ Հարությունյանը Sputnik Արմենիայի հետ զրույցում նշեց, որ սպորտային ուսուցողական խաղ-դասընթացներն աղջիկներին ֆուտբոլի միջոցով սովորեցնում են միասնական լինել, առաջնորդել, բարձրացնել ինքնավստահությունն ու ինքնագնահատականը:
«Պատկերավոր ասած` թիմը նույն համայնքն է, որոնցից մեկն ունի առավելություն։ Աղջիկները պետք է հասկանան` ինչպես անել, որ բոլոր թիմերն ունենան առավելություն, պետք է փոխառեն առավելություն ունեցող թիմի փորձը և այլն»,- ասաց նա։
Ճամբարի ընթացքում մասնակիցները նաև հանդիպում ունեցան Եղեգնաձորում հաջողության հասած կանանցից մեկի հետ, որն աղջիկներին ներկայացրեց իր հաջողության գաղտնիքը:
Եղեգնաձորում անցկացվող GOALS-ի ճամբարում աղջիկներին մարզելու էր եկել ՀԲԸՄ «Քաղաքացիական հասարակության կամուրջ» ծրագրի շրջանակում Հայաստան ժամանած ամերիկահայ Դևիդ Տիգրանյանը: Նշենք, որ նա առաջին անգամ է հայրենիքում:
«Եկել եմ Հայաստան, որպեսզի երեխաներին ու երիտասարդներին կրթելու գործում օգնեմ կամավորներին: Բայց եկել եմ նաև, որ մոտ լինեմ արմատներիս: Շատ ուրախ եմ, որ ՀԲԸՄ-ի միջոցով կարողացա կապ հաստատել GOALS-ի հետ, շատ կարևոր եմ համարում նման ծրագրերի անցկացումը»,- Sputnik Արմենիայի հետ զրույցում ասաց նա` նշելով, որ անչափ տպավորվել է Հայաստան կատարած առաջին այցից և իր նկատմամբ ցուցաբերված ջերմ վերաբերմունքից:
Դևիդ Տիգրանյանի հետ հարցազրույցը կարող եք ընթերցել այստեղ։
