ԵՐԵՎԱՆ, 16 մարտի – Sputnik. Հայ ուխտավորները ռուս խաղաղապահների ուղեկցությամբ Արցախում այցելել են Դադիվանքի և Ամարասի հնագույն վանական համալիրներ։ Տեղեկությունը հայտնում է ՌԴ ՊՆ-ն։
Նշվում է, որ հայ ուխտավորները ռուս խաղաղապահների ուղեկցությամբ անարգել մտել են համալիրի տարածք:
«Դադիվանքը Հայ Առաքելական Եկեղեցու հնագույն քրիստոնեական կառույցներից է և գտնվում է Քարվաճառի (Քելբաջար) տարածքում, որը, եռակողմ հայտարարության համաձայն, Ադրբեջանի վերահսկողության տակ է անցել 2020 թվականի նոյեմբերին»,- հավելում է ՌԴ ՊՆ-ն։
Ինչպես նշվում է գերատեսչության հաղորդագրության մեջ, ռուս խաղաղապահները նաև ապահովել են հայ ուխտավորների անվտանգ այցը Ամարաս քրիստոնեական վանք, որը գտնվում է կողմերի սահմանազատման գծի անմիջական հարևանությամբ:
«Ձեռք բերված պայմանավորվածությունների արդյունքում Ադրբեջանի Հանրապետության զինծառայողները անարգել թույլ են տալիս ուխտավորներին համալիրի տարածք մտնել ռուս խաղաղապահների ուղեկցությամբ», - ասված է հաղորդագրության մեջ:
Հիշեցնենք` 2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր, որոնք մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
