ԵՐԵՎԱՆ, 27 հունվարի – Sputnik. Լեռնային Ղարաբաղում ռուսական խաղաղապահ զորախմբի Կողմերի հաշտեցման կենտրոնի պետի տեղակալ, գնդապետ Դմիտրի Պերեպյոլկինն այսօր ճեպազրույցի ընթացքում հայտնել է, որ կիրակի երեսուն հայ ուխտավորներ են այցելել Դադիվանք։
«Խաղաղապահները նրանց ուղեկցել են Դադիվանքի համալիր և հետ»,-ասել է Պերեպյոլկինը։
Մայր աթոռի տեղեկատվական կենտրոնի ղեկավար տեր Վահրամ քահանա Մելիքյանն օրերս Sputnik Արմենիային տված հարցազրույցում պատմել էր, թե ինչ քայլեր են ձեռնարկվում Արցախում գտնվող և ադրբեջանական վերահսկողության տակ անցած եկեղեցիներն ու վանքերը փրկելու համար։
Դադիվանքը 9-13-րդ դարերի հայկական վանական համալիր է Արցախում, Թարթառ գետից կես կիլոմետր դեպի հյուսիս։ Ճարտարապետական համալիրը գտնվում է անտառապատ լեռան հարավային լանջին՝ 1100 մ բարձրության վրա։ Վանական համալիրի անվանումը կապված է Սուրբ Դադիի անվան հետ, որը քրիստոնեություն էր քարոզում Հայաստանի արևմուտքում և Քրիստոսի յոթանասուն աշակերտներից մեկի՝ Թադեոս առաքյալի աշակերտն էր։
Ըստ ավանդության՝ վանքը կառուցվել է նրա գերեզմանի վրա։
Դադիվանքի վանական համալիրը, ինչպես և Արցախի մյուս բոլոր վանքերը, մոտ 100 տարի չէր գործում։ 1921 թվականին՝ խորհրդային իշխանության հաստատումից հետո, նրանք փակվեցին և կրկին բացվեցին միայն ԼՂՀ անկախության հռչակումից հետո։ Ադրբեջանցիները Դադիվանքը վերածել էին գոմի։ Համալիրը վերականգնեցին, վերակառուցեցին, վերանորոգեցին ու օծեցին։
Արցախում հրադադարի մասին եռակողմ հայտարարության ստորագրումից հետո Քարվաճառը (Քելբաջար), որտեղ գտնվում է վանքը, հանձնվեց Ադրբեջանին, թեև ադրբեջանական զինված ուժերը չէին կարողացել առաջ շարժվել այդ ուղղությամբ: Բայց քանի որ Դադիվանքը եզակի քրիստոնեական սրբավայր է, որին պղծում և ոչնչացում էր սպառնում, այդ կարևոր կրոնական-մշակութային օբյեկտը պահպանության տակ վերցրին ռուս խաղաղապահները։ Այստեղ հայ հոգևորականներ են մնացել։ Ռուս զինվորականների ուղեկցությամբ ուխտավորները կարող են այցելել վանք։
