ԵՐԵՎԱՆ, 16 հունվարի - Sputnik. Պատերազմի ընթացքում չպայթած զենք-զինամթերքի հայտնաբերման և ոչնչացման աշխատանքների շրջանակում այսօր պայթեցման աշխատանքներ են նախատեսված Ասկերանի շրջանում։ ԱՀ արտակարգ իրավիճակների պետական ծառայության մամուլի բաժինը տեղեկացնում է, որ մասնավորապես չպայթած զնեք-զինամթերքը ոչնչացվելու է Խաչմաչ և Մխիթարաշեն գյուղական բնակավայրերում, ինչպես նաև Խնածախ և Այգեստան համայնքների տարածքներում:
«Պայթյունների ձայները լսելի կլինեն նաև Ստեփանակերտում: Նշենք, որ գործընթացը կշարունակվի նաև առաջիկա ամիսներին: Ուստի խնդրում ենք ձայներ լսելու դեպքում խուճապի չմատնվել»,- նշված է հաղորդագրության մեջ։
Հավելենք, որ սակրավորական ջոկատներն աշխատում են ամեն օր՝ առավոտյան ժամը 10:00-ից մինչև 18:00-ն:
Պարզաբանումների և այլ տեղեկությունների համար անհրաժեշտ է կապ հաստատել ԱԻ ծառայության ճգնաժամային կառավարման կենտրոնի հետ՝ 911,101,112 կարճ հեռախոսահամարներով:
