Հնարավոր է՝ Ադրբեջանը հող է պատրաստում Բերձորի հիվանդանոցին հարվածելու համար. Արցախի ՄԻՊ

ԵՐԵՎԱՆ, 31 հոկտեմբերի - Sputnik. Ադրբեջանական ֆեյսբուքյան օգտահաշիվներից մեկը կեղծ լուսանկարներ է տարածում՝ պնդելով, թե Բերձորի հիվանդանոցը ռազմական նպատակներով է օգտագործվում։ Տեղեկությունը Twitter-ի իր էջում հայտնում է Արցախի Մարդու իրավունքների պաշտպան Արտակ Բեգլարյանը։ Նրա խոսքով՝ նշված օգտահաշիվը փոխկապակցված է Ադրբեջանի կառավարության հետ։

«Հրապարակել է նկարներ՝ պնդելով, թե իբր Բերձորի հիվանդանոցն օգտագործվում է ռազմական նպատակներով։ Սա ամբողջությամբ կեղծ է, և կարող է այս հիվանդանոցին ևս հարվածելու նախապատրաստություն լինել»,- գրել է Բեգլարյանը։

The “Hərbi Xəbərlər və Məlumatlar” fb page, affiliated with #Azerbaijan Govt on mil matters, published some unrelated photos & claimed that Berdzor (Lachin) hospital is used for mil purposes.
It’s quite false & could be a preparation for striking this hospital, too.#DontBeBlind pic.twitter.com/0FbL0OzoHP

— Artak Beglaryan (@Artak_Beglaryan) October 30, 2020

Հիշեցնենք, որ Ադրբեջանը հոկտեմբերի 28-ին «Սմերչ» տիպի համազարկային կրակի ռեակտիվ կայանքից հրթիռակոծել էր Ստեփանակերտի ծննդատունը։ «Տաշիր» ընկերությունների խմբի հիմնադիր և Ռուսաստանի հայ գործարարների ասոցիացիայի նախագահ Սամվել Կարապետյանն ավելի ուշ հայտարարեց, որ կվերակառուցի ավերված ծննդատունը։