ԵՐԵՎԱՆ, 27 հոկտեմբերի - Sputnik. Երևանի «Սուրբ Գրիգոր Լուսավորիչ» բուժկենտրոնի ծննդատանը Արցախի Մարտակերտ քաղաքի բնակիչ 34-ամյա Լուսինե Միրզոյանը լույս աշխարհ է բերել իր ութերորդ երեխային: Երեխան ծնվել է բնական ճանապարհով, հաղորդում են բուժկենտրոնից։
«Ի պատասխան բժշկի բարեմաղթանքի` հերոսուհի մայր եք, ձեր որդին ծնվեց, աչքներդ լույս լինի, Լուսինեն համեստորեն նշել է` օրենքով 10 երեխա ունեցողն է հերոսուհի մայր, ես դեռ 8 երեխա ունեմ», – ասվում է հիվանդանոցի հաղորդագրության մեջ։
Փոքրիկն ու մայրն առողջ են, իրենց լավ են զգում, սպասում են ծննդատնից դուրսգրմանը։
Արդեն հայտնել ենք, որ հոկտեմբերի 14-ին նույն բուժկենտրոնի ծննդատանը ծնվել էր արցախցի Միրզոյանների ընտանիքի 7-րդ երեխան` Արայիկը, որին անվանակոչել էին Արցախի նախագահի պատվին:
Հիշեցնենք` Երևանի քաղաքապետարանն այսօր տեղեկացրել էր, որ սեպտեմբերի 27-ից մինչ օրս Երևանում ծնվել է 107 արցախցի երեխա: