Դավիթ Բաբայան

Ինչի՞ն պետք է պատրաստվենք պատերազմից հետո. Բաբայանը ներկայացրեց աշխարհաքաղաքական մեսիջները

775
(Թարմացված է 19:26 14.10.2020)
Արցախի նախագահի խորհրդականի խոսքով` Թուրքիան, պատերազմ սանձազերծելով Արցախում, ցույց է տալիս, որ ԱՄՆ–ն թուլացել է և չի կարողանում քայլեր ձեռնարկել, իսկ դա անպատասխան չի մնա։

ԵՐԵՎԱՆ, 14 հոկտեմբերի — Sputnik. Արցախի նախագահի խորհրդական Դավիթ Բաբայանն այսօր ասուլիսի ժամանակ հայտնեց, որ Թուրքիան մտել է տարածաշրջան ու չի պատրաստվում դուրս գալ այստեղից։

«Թուրքիան նախաձեռնել է թուրքական երկրների միացյալ բանակ`զինված ուժեր ստեղծելու գաղափարը, որին արդեն միացել է Ադրբեջանը»,– ասաց Բաբայանը` միաժամանակ համոզմունք հայտնելով, որ Կենտրոնական Ասիայի երկրները չեն մասնակցի այդ ավանտյուրային, քանի որ գտնվում են այնպիսի իրավիճակում, որտեղ շատ ուժեղ են Ռուսաստանի ու Չինաստանի ազդեցությունը, իսկ այդ երկրներն ամեն ինչ անելու են, որ նման բան տեղի չունենա։

Ինչ վերաբերում է Ռուսաստանին, Դավիթ Բաբայանն արձանագրեց, որ Ռուսաստանն արդեն այս հարցի շուրջ հստակ մեսիջներ է ձևակերպել։ Դրանցից մեկն ասվել է ՌԴ ԱԳ նախարար Սերգեյ Լավրովի շուրթերով։

«Նա հստակ ձևակերպեց, որ Թուրքիան երբևիցե չի եղել Ռուսաստանի ռազմավարական գործընկերը։ Եվ ասաց, որ չի ընդունում  հակամարտությունը ռազմական ճանապարհով կարգավորելու թուրքական գաղափարը»,– ասաց Բաբայանը` չբացառելով, որ իրավիճակի էլ ավելի սրացման պարագայում այդ թեմայի շուրջ կխոսի նաև ՌԴ նախագահ Վլադիմիր Պուտինը։

Արցախի նախագահի խորհրդականը համոզմունք հայտնեց նաև, որ պատերազմը վաղ թե ուշ կանգնելու է, բայց այդ ժամանակ Հայաստանն ու Արցախը պետք է պատրաստ լինեն իրենց շահերին համապատասխանող ճիշտ քաղաքականությամբ մտնել աշխարհաքաղաքական մրցապայքարի մեջ։

«Արցախում ընթացող պատերազմն անպայման դադարելու է, չեմ կարող ասել` 1-2 օրից, թե մեկ շաբաթ հետո, բայց դրանից հետո մենք պետք է պատրաստ լինենք, որ շատ ճիշտ քաղաքականություն վարենք և ամեն ինչ անենք, որպեսզի մեր շահերին համահունչ քայլեր կատարենք և մեր պետականության համար շահեկան իրավիճակ ստեղծենք»,–ասաց նա։

Բաբայանի խոսքով` Հայաստանի շահերն այս պարագայում համընկնում են Ռուսաստանի, Իրանի, Չինաստանի, ինչու ոչ, նաև ԱՄՆ–ի շահերի հետ։

«Այն, ինչ անում է Թուրքիան, հարված է նաև ԱՄՆ–ի քաղաքական իմիջին, քանի որ ՆԱՏՕ–ի կորիզը, ավագ գործընկերը նույնիսկ տեղյակ չէր, որ Թուրքիան պետք է գա այստեղ, պատերազմի։ Եթե տեղյակ է, դա այլ բան է, բայց իրենց հայտարարություններում ասում են, որ տեղյակ չեն»,–ասաց Բաբայանը։

Նրա խոսքով` Թուրքիան ցույց է տալիս, որ ԱՄՆ–ն թուլացել է և չի կարողանում քայլեր ձեռնարկել, իսկ դա անպատասխան չի մնա։

Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 14-ի ժամը 11:00-ի դրությամբ` հակառակորդի կրակոցների հետևանքով զոհվել են 532 զինծառայողներ և 31 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 5486 զոհ ունի, ավելի քան 5000 վիրավոր։ 

Ըստ վերջին տվյալների՝ Ադրբեջանի զինված ուժերը կորցրել են 19 ինքնաթիռ, 16 ուղղաթիռ, 176 անօդաչու սարք, 4 ՏՈՍ-1 «Սոլնցեպեկ» համազարկային կրակի ռեակտիվ համակարգ, 541 տանկ և ՀՄՄ:

«Ես կրակի տակ ամենաթանկ բանն եմ թողել՝ որդուս». ինչպես են ապրում արցախցիները Ջրամբարում 

Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ Զոհվել է 2 քաղաքացիական անձ։

Նույնիսկ ճանճը չի կարող խուսափել հայուհու դիպուկ հարվածից. արցախյան պատերազմի կանացի դեմքը

775
թեգերը:
ԱՄՆ, Թուրքիա, Դավիթ Բաբայան, Հայաստան, Արցախ
թեմա:
Ադրբեջանական ագրեսիան Արցախում - 2020 (1810)
Ըստ թեմայի
Թուրքիան 400-ից ավելի սիրիացի ահաբեկիչներ է պատրաստում Ադրբեջան ուղարկելու համար
Մենք համաձայն չենք այն դիրքորոշման հետ, որը հնչեցրել են Թուրքիան և նախագահ Ալիևը. Լավրով
Թուրքիայի առաջարկած բանակցությունների քառակողմ ձևաչափն անընդունելի է. Կազիմիրով
Թուրքիան Հարավային Կովկասը լցրել է ահաբեկիչներով. ՀՀ ԱԳ նախարարի հարցազրույցը
Флаг с эмблемой Международного Комитета Красного Креста

ԿԽՄԿ–ն աշխատում է Ադրբեջանում մահացած տղամարդու դին Հայաստան տեղափոխելու ուղղությամբ

9
(Թարմացված է 13:41 30.10.2020)
Հոկտեմբերի 29-ին Կարմիր Խաչի միջազգային կոմիտեի միջամտությամբ հայկական կողմին էր փոխանցվել Արցախի գերեվարված քաղաքացի, 85-ամյա Եվգենյա Բաբայանը, ով պաշտոնապես չհաստատված տեղեկություններով՝ Միշա Մելքումյանի կինն է։ 84-ամյա Միշա Մելքումյանն Ադրբեջանում մահացել է։

ԵՐԵՎԱՆ, 30 հոկտեմբերի - Sputnik. Կարմիր խաչի միջազգային կոմիտեն անում է հնարավորը Ադրբեջանում մահացած հայ գերի 84-ամյա Միշա Մելքումյանի դին հնարավորինս շուտ Հայաստան տեղափոխելու համար։

Sputnik Արմենիային հայտնեց ԿԽՄԿ հայաստանյան գրասենյակի հանրային կապերի պատասխանատու Զառա Ամատունին։

«Չեմ կարող ասել, թե երբ կստացվի տեղափոխել, բայց գործընթացն արդեն սկսված է, կողմերի միջև աշխատանքները տարվում են»,– ասաց նա։

Հիշեցնենք` երեկ` հոկտեմբերի 29-ին Կարմիր Խաչի միջազգային կոմիտեի միջամտությամբ հայկական կողմին էր փոխանցվել Արցախի գերեվարված քաղաքացի, 85-ամյա Եվգենյա Բաբայանը, ով պաշտոնապես չհաստատված տեղեկություններով՝ Միշա Մելքումյանի կինն է։

Իսկ 84-ամյա Միշա Մելքումյանի մասին Ադրբեջանը նախ կեղծ լուրեր էր տարածել, թե, իբր, հայկական կողմը հրաժարվել է ընդունել նրան, ապա հայտարարվեց, որ Միշա Մելքումյանի բժշկական եզրակացության համաձայն՝ տարեց տղամարդու տեղափոխումն անթույլատրելի է համարվել։

Այդուհանդերձ, Հայաստանի իրավասու մարմինները միանշանակ պատրաստակամություն են հայտնել առաջին իսկ հնարավորության դեպքում կազմակերպելու նրա վերադարձը:

Բայց հոկտեմբերի 29-ի ուշ երեկոյան հայտնի դարձավ, որ Ադրբեջանի զինված ուժերի կողմից գերեվարված 84-ամյա Միշա Մելքումյանը մահացել է։

9
Դավիթ Հարությունով

Ադրբեջանի ԶՈւ-ի «հարձակողական միջուկի» ոչնչացումը կարող է վճռել պատերազմի ելքը․ փորձագետ

496
(Թարմացված է 13:19 30.10.2020)
Կարելի է նշել Ադրբեջանի զրահատեխնիկայի և ԱԹՍ-ների ռեսուրսների որոշակի սպառումը, սակայն մարտական գործողությունների ինտենսիվության թուլացումը հազիվ թե երկարաժամկետ լինի։

ԵՐԵՎԱՆ, 30 հոկտեմբերի – Sputnik. Ադրբեջանի զինված ուժերի «հարձակվող միջուկի» ոչնչացումը թույլ կտա վճռել ռազմական գործողությունների ելքը։ Sputnik Արմենիայի հետ զրույցում նման համոզմունք է հայտնել ռազմական փորձագետ Դավիթ Հարությունովը՝ մեկնաբանելով ադրբեջանական բանակի հարձակողական ակտիվության անկումն ու դրա անօդաչու թռչող սարքերի՝ հաճախակի դարձած կորուստները։

Վերջին օրերին հայտնվեցին առաջին հաղորդումները թուրքական «Բայրաքթար» ԱԹՍ-ների խոցման մասին։ Մարտերի ողջ ընթացքում Արցախի ԶՈւ-ն ոչնչացրել է մոտ մեկ տասնյակ այդպիսի ԱԹՍ։

«Որոշակի հավաստի տեղեկություն չկա, բայց կարելի է ենթադրել, որ հնարավոր է՝ ռադիոէլեկտրոնային հակազդեցության ինչ-որ միջոցներ են կիրառվում, որոնք ի վիճակի են նման էֆեկտ ապահովել։ Դրանք, մասնավորապես, ենթադրում են սարքի վերահսկողության խափանում կամ օպերատորի կողմից կառավարման կորուստ»,-ասել է Հարությունովը։

Այս տարբերակը չի կարելի բացառել, թեև այս հարցում հստակ տեղեկություններ չկան։ Դժվար է պնդել` հայկական կողմի սպառազինության մեջ նման համակարգեր կան, թե ոչ, քանի որ «Բայրաքթարների» կիրառման փորձը ինչպես Մերձավոր Արևելքում, այնպես էլ մեր տարածաշրջանում, համեմատաբար նոր է։

Սակայն շրջանառվում է ԱԹՍ-ների դեմ պայքարի նոր համակարգերի մատակարարման վարկածը(ԶԼՄ-ներում հաղորդագրություններ էին հայտնվել նոր ռադիոէլեկտրոնային պայքարի համակարգերի մասին, – խմբ․)։

Ինչ վերաբերում է ընդհանուր առմամբ ռազմական գործողությունների ընթացքին, ապա կարելի է խոսել Ադրբեջանի ուժերի, այդ թվում՝ գործածվող սարքավորումների պաշարների հյուծման մասին։

«Առավել ևս, որ Ադրբեջանի կողմից կիրառվող միջոցների մեծ մասը ոչ թե բազմակի օգտագործման անօդաչու թռչող սարքերն են, այլ գերճշգրիտ զինամթերքը։ Այսինքն՝ ռազմական գործողությունների ընթացքում դրանց սպառումը շատ մեծ է։ Եվ չնայած տեղեկություններ կային, որ Իսրայելից մշտապես մատակարարումներ են իրականացվում, բացի այդ՝ Թուրքիայի և Ադրբեջանի պաշարները բավականին շատ են, ես չեմ բացառում այդ պաշարների որոշակի կրճատումը»,-ասել է Հարությունովը։

Թուրքիայի վրա ճնշումը կարող է հակառակ էֆեկտն ունենալ․ ռուս փորձագետը փակագծեր է բացում

Այսպիսով, երկու հավանական գործոն կա․ հակառակորդի ռեսուրսների որոշակի հյուծումը( սարքերի քանակության նվազումը) և հայկական ՀՕՊ համակարգի պայքարի արդյունավետության ավելացումը։

Սա, իհարկե, չի կարող չանդրադառնալ ադրբեջանական բանակի հարձակողական հնարավորությունների վրա։ Դիտարկվում է, բնականաբար, նաև զրահատեխնիկայի և անձնական կազմի հետ կապված ռեսուրսների կրճատում։ Այս գործոնների համակցությունը պետք է որ խաղա իր դերը, համենայն դեպս՝ տեսականորեն։ 

Թե որքան կտևի մարտական գործողությունների ինտենսիվության թուլացման շրջանը, դժվար է ասել։ Շատ բան կախված կլինի Ադրբեջանում տնտեսական պլանավորումից։ Ընդհանուր առմամբ, հակամարտության տրամաբանությունն այնպիսին է, որ եթե հիմա Բաքվի հարձակողական իմպուլսը թուլացել է, ապա չի կարելի բացառել, որ որոշակի անդորրից հետո (որը կախված է բազմաթիվ գործոններից) մարտերի ինտենսիվությունը կրկին կաճի։

«Իսկ եթե խոսքը ռեսուրսների էական սպառման մասին է, ապա չի կարելի բացառել ավելի երկար դադարը։ Բայց հավանականությունը, որ ռազմական գործողությունները կվերսկսվեն, մեծ է։ Չէ՞ որ եթե դադարը լինի ներկա փուլում, Ադրբեջանը կարող է ևս մեկ հարձակողական ալիք սկսելու գայթակղությանը տրվել՝ օգտագործելով ներկայիս մեկնարկային դիրքերը»,-նշել է Հարությունովը։

Մյուս կողմից՝ հայկական կողմի մեկ խոշոր հաջող գործողությունը, որը կհանգեցնի «հարձակողական միջուկի» ոչնչացմանը (ինչը Ադրբեջանի համար լրջագույն պարտություն կլինի թե՛ ռազմական, թե՛ քաղաքական առումով) և նախքան սեպտեմբերի 27-ը գոյություն ունեցած իրավիճակի վերականգնմանը, կարող է վճռել հակամարտության ելքը։

«Դա կազդի նաև Ադրբեջանի քաղաքական դիրքորոշման վրա։ Մեկ կամ երկու խոշոր գործողությունների դեպքում նման ելքը միանգամայն հնարավոր է»,-ասել է Հարությունովը։

Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 29-ի ժամը 18։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 39 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6749 զոհ ունի և բազմաթիվ վիրավորներ։ 

Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 226 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 632 տանկ և ՀՄՄ:

Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին

Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։ 

Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին

496
թեգերը:
Դավիթ Հարությունով (ռազմական փորձագետ), Արցախ, Ադրբեջան, Պատերազմ
թեմա:
Ադրբեջանական ագրեսիան Արցախում - 2020 (1810)
Ըստ թեմայի
Թուրքիայի գլխավորած ադրբեջանական զորքի և ահաբեկիչների նպատակը էթնիկ զտումներն են. Փաշինյան
ՀՀ–ում ԱՄՆ դեսպանատունն ԱՄՆ քաղաքացիներին հորդորում է Արցախ և Ադրբեջանի հետ սահման չմեկնել
Ադրբեջանը հիմնովին ավերում է ժամանակավոր իր տիրապետության տակ գտնվող տարածքները