Գաբրիել Շաիմ

«Մայրը կրկնում էր` ինչո՞ւ հենց դու». բրազիլացի ռազմական թղթակիցը պատմում է Արցախի մասին

958
(Թարմացված է 16:28 10.10.2020)
Գաբրիել Շաիմը մի քանի տարի եղել է Սիրիայում, սեփական աչքերով տեսել, թե ինչպես են երկիրն ազատում իսլամիստներից։ Հիմա էլ Արցախում է։ Ասում է` այստեղ ապրող մարդիկ չեն հարցնում` ով ես դու, որտեղից, յուրային ես, թե օտար։ Եթե դու այստեղ ես, ուրեմն պիտի հոգ տանեն քո մասին։

ԵՐԵՎԱՆ, 12 հոկտեմբերի – Sputnik. «Հաղթանակը» էկրանին մի բան է, կյանքում՝ բոլորովին այլ բան։ Սա լավ գիտի բրազիլացի ռազմական թղթակից Գաբրիել Շաիմը։ Նա մի քանի տարի աշխատել է Սիրիայում, այնտեղից պատմել «Իսլամական պետության» դեմ պայքարի մասին։ Իսլամիստների գրոհներից մեկի ժամանակ սիրիական զորքերի ջոկատը, որի հետ է եղել նաև Շաիմը, շրջափակման մեջ է հայտնվել և հինգ ժամ շարունակ մնացել այնտեղ։ Արցախում գտնվող Շաիմի հետ զրուցել է Sputnik Արմենիայի թղթակից Կարեն Ավետիսյանը։

Бразильский военный документалист Габриель Шаим
© Photo : Gabriel Chaim
Գաբրիել Շաիմ

Թե՛ Սիրիայում, թե՛ Ստեփանակերտում բրազիլացի ռազմական թղթակիցը պատմում է այն մարդկանց մասին, որոնց մոռացել են «քաղաքակիրթ» աշխարհում` տարված լինելով ավելի կարևոր գործերով։

Հնարավոր է, որ ոչ բոլորին կհետաքրքրեն նրանք, ում Գաբրիելը նկարել է այստեղ և Սիրիայում։ Բայց նրանք հետաքրքրում են ռազմական թղթակցին։

«Ասե՞մ առաջին տպավորությունս։ Մարդիկ բարի են, փորձում են օգնել, ինչով կարող են։ Դա ինձ` որպես մարդու, հարստացնում է»,-խոստովանում է Գաբրիելը։

Հարցին, թե ինչու է այստեղ, պատասխանում է․ «Ես ուզում եմ պատմել այն մասին, ինչին հավատում եմ։ Հայերը, քրիստոնյաները հիմա փոքրամասնություն են։ Իհարկե, հայերն այդ երկու երկրների (Թուրքիայի և Ադրբեջանի՝ խմբ․) դեմ կռվելու համար այդքան ռեսուրսներ չունեն, բայց նրանք այս հողը պաշտպանելու համար անում են հնարավոր ամեն բան։ Այնպես որ ես ճիշտ կողմում եմ»։

Հայացք թաքստոցից․ մահվան աչքերին նայած արցախցիները․ լուսանկարներ

Նա տեսել է` ինչպես են թուրքական զորքերն օկուպացրել Սիրիայի հյուսիս-արևմուտքը։ 2019թ-ի նոյեմբերին եղել է ռմբակոծվող Թել-Աբյադում, որը հետո իսլամիստները գրավեցին թուրքական զորքերի աջակցությամբ։

«Այնտեղ նրանք փաստացիորեն գործում են այնպես, ինչպես այստեղ։ Պարզապես այնտեղ իրենք են կռվում, իսկ այստեղ կանգնած են ադրբեջանցի զինվորների մեջքի հետևում և զենք են մատակարարում նրանց»,-ասում է նա։

Ռումբերը նետում են մարդկանց վրա, որոնք ամեն օր կարող են կորցնել այն ամենը, ինչ ստեղծել են տարիների ընթացքում, իսկ ամենակարևորը՝ իրենք կողքիններին։ Գաբրիելի խոսքով` այս մարդկային ցավը բոլորի մոտ նույնն է` լինի Ղարաբաղում, Սիրիայում, Եմենում կամ Բրազիլիայում։

«Ես մի կնոջ տեսա, որը լալիս էր և ինչ-որ բան էր խոսում․․․Խնդրեցի, որ թարգմանեն նրա ասածը։ Նա կրկնում էր․ «Ինչո՞ւ հենց դու»։ Որդու մասին էր․․․Բոլորն էլ ունեն մայրեր, և այս ցավը հնարավոր է, որ բոլորն էլ զգան։ Սա ես ամենից լավ եմ հիշում», - պատմում է Գաբրիելը։

«Հաղթանակ» բառը կարող է լինել բնավ ոչ այնպիսին, ինչպիսին երևում է հեռուստացույցի էկրանին, երբ հոլիվուդյան երաժշտության տակ խիզախ մարտիկն ամրացնում է դրոշը, ապա գրկախառնվում սիրելիի հետ։ Հաղթանակի մեջ ամենակարևորը մարդկանց պատրաստակամությունն է ու նրանց հավատը, վստահ է ռազմական թղթակիցը։

«Երկրներ կան, որտեղ մարդիկ շատ փող ունեն և ուրիշ ոչինչ։ Չկա սեր այն տարածքի հանդեպ, որտեղ իրենք ապրում են։ Այդպիսի մարդիկ նույնիսկ հաղթանակի դեպքում արդեն պարտված են լինելու», - ասում է նա։

Իսկ Արցախում ապրող մարդիկ չեն հարցնում` ով ես դու, որտեղից, յուրային ես, թե օտար։ Եթե դու այստեղ ես, ուրեմն պիտի հոգան քո մասին։ Չնայած հենց իրենք հոգածության կարիք ունեն․․․

«Մենք նրանց սրտերում ենք։ Այլ կերպ չես ասի։ Նրանք մեզ համար նախաճաշ են պատրաստում, ինչպես իրենց երեխաների համար»,- եզրափակում է Գաբրիելը։

958
թեմա:
Ադրբեջանական ագրեսիան Արցախում - 2020 (1554)
Ըստ թեմայի
Օրվա կադր. մարտադաշտից դուրս պայքար` հանուն կյանքի
Օրվա կադր. «Ու այս ազգին ուզում են հաղթե՞լ»
Արցախ. հրետակոծված շենքն ու արյունոտ ճակատով տղամարդը
Արցախ

Ադամ Շիֆը կոչ է արել ԱՄՆ-ին ճանաչել Արցախի անկախ հանրապետությունը

83
(Թարմացված է 00:39 24.10.2020)
ԱՄՆ կոնգրեսականի խոսքով` Ալիևին ու Էրդողանին պետք է հասկացնել, որ եթե շարունակեն պատերազմը, ապա կտեսնեն դրա հետևանքները։ Միացյալ Նահանգները «ձեռքերը ծալած» չի նստելու։

ԵՐԵՎԱՆ, 23 հոկտեմբերի - Sputnik. ԱՄՆ կոնգրեսական Ադամ Շիֆը պաշտոնապես կոչ է արել ԱՄՆ-ին ճանաչել Արցախի անկախ հանրապետությունը։

«Տևական ժամանակ է, ինչ Թուրքիան և Ադրբեջանը պատերազմում են Արցախի դեմ, գնդակոծում խաղաղ բնակավայրերը, եկեղեցիները` ռազմական հանցագործություններ կատարելով: Ադրբեջանի գրոհները հետ մղելիս զոհվել է ավելի քան 800 զինծառայող, ինչպես նաև տասնյակ խաղաղ բնակիչներ »,–իր կոչում նշել է Շիֆը։

Շիֆի խոսքով` ձմռան շեմին Արցախի քաղաքացիական բնակչության կեսից ավելին ստիպված է տեղափոխվել այլ քաղաք, քնել մեքենաներում կամ բաց դաշտերում ՝ ընկնող ռումբերից հեռու։

Նա նշում է, որ չեն կարող թույլ տալ, որ պատմությունը կրկնվի։ Եթե Ադրբեջանն ու Թուրքիան որոշել են պատերազմել, ապա ԱՄՆ–ն, ԵԱՀԿ Մինսկի խումբը և միջազգային հանրությունը պետք է հստակ ասեն, որ Ադրբեջանն ու Թուրքիան իրենց ցանկություններում հաջողության չեն հասնելու։
Ալիևին ու Էրդողանին պետք է հասկացնել, որ եթե շարունակեն պատերազմը, ապա կտեսնեն դրանց հետևանքները։ Միացյալ Նահանգները «ձեռքերը ծալած» չի նստելու։

Շիֆն իր աջակցությունն է հայտնել Հայաստանին և Արցախին։

Ավելի վաղ` հոկտեմբերի 6-ին, Շիֆը Facebook–ի իր էջում գրել էր, որ Լոս Անջելեսը սատարում է Հայաստանի և Արցախի ժողովրդին։

Նշենք, որ Ադամ Շիֆը հայտնի է իր հայամետ դիրքորոշմամբ։ Նա լավ հարաբերություններ ունի հայ համայնքի ներկայացուցիչների հետ ու հաճախ է մասնակցում Հայոց ցեղասպանության զոհերի հիշատակի ոգեկոչմանը նվիրված միջոցառումներին։

83
թեգերը:
ԱՄՆ, Ադամ Շիֆ, Արցախյան պատերազմ
Ըստ թեմայի
Միլանի քաղաքային խորհուրդը ճանաչել է Արցախի անկախությունը
Ֆրանսիայի Վիեն քաղաքը ճանաչեց Արցախի անկախությունը
ԱՄՆ կոնգրեսականը կոչ է արել ճանաչել Արցախի անկախությունը
Նիկոլ Փաշինյան

Փաշինյանի հայտարարությունը կազդի՞ բանակցությունների վրա. քաղաքագետը վերլուծել է իրավիճակը

129
ՀՀ վարչապետի հայտարարությունը`այս փուլում ղարաբաղյան հարցի դիվանագիտական լուծման մասին խոսելու անիմաստության մասին, մեծ իրարանցում առաջացրեց։ Փորձել ենք հասկանալ այդ խոսքերի դեմարշի պատճառներն ու հանգամանքները։

ԵՐԵՎԱՆ, 23 հոկտեմբերի — Sputnik. ՀՀ վարչապետ Նիկոլ Փաշինյանի կոշտ հայտարարությունները Ղարաբաղի վերաբերյալ իրավիճակից բխող հույզերի արդյունք են։ Բանակցություններն էլ, խնդրի կարգավորման դիվանագիտական ուղիների որոնումն էլ կշարունակվեն։ Sputnik Արմենիայի հետ զրույցում նման կարծիք հայտնեց «Ռուսաստանը գլոբալ քաղաքականության մեջ» («Россия в глобальной политике») ամսագրի գլխավոր խմբագիր, քաղաքագետ Ֆյոդոր Լուկյանովը։

Հիշեցնենք, որ հոկտեմբերի 21-ին Facebook-ի ուղիղ եթերի ժամանակ ՀՀ վարչապետ Նիկոլ Փաշինյանը հայտարարել էր, որ այս փուլում անիմաստ է խոսել ղարաբաղյան խնդրի դիվանագիտական լուծման մասին, քանի որ Բաքվի մարտավարությունն ու նպատակներն անփոփոխ են մնում՝ դա Ղարաբաղի կապիտուլյացիան է։ Ավելի ուշ ՀՀ ԱԳՆ-ն պարզաբանել էր, որ Հայաստանը միշտ պատրաստ է եղել ու հիմա էլ պատրաստ է հակամարտության խաղաղ կարգավորմանը, ու Երևանը բարձր է գնահատում ԵԱՀԿ Մինսկի խմբի, մասնավորապես՝ Ռուսաստանի ջանքերը։

Լուկյանովը նշում է, որ երբ երկիրը պատերազմի մեջ է, ապա հասարակության ներքին համախմբվածության ու ճիշտ ընկալման գործոնը շատ կարևոր է։ Թե ինչպես են առաջնորդները ճիշտ արտահայտություններ գտնում՝ մի կողմից մարտական ոգին բարձր պահելու, մյուս կողմից՝ դիվանագիտական լուծմանը վնաս չտալու համար, կախված է կոնկրետ որակավորումից ու տաղանդներից։

«Իհարկե պատերազմական իրավիճակում, այն էլ այդպիսի ողբերգական նախապատմություն ունեցող պատերազմի պայմաններում, դժվար է զսպվածություն ակնկալել, հատկապես Հայաստանի վարչապետի պես քաղաքական գործչից, որը ժողովրդից է դուրս եկել։ Անկասկած դա կարող է որոշակի վնաս հասցնել արտաքին դիվանագիտությանը, բայց այնուամենայնիվ, դիվանագիտական գործընթացը միշտ էլ ծնվում է պատերազմող կողմերի ներքին իրավիճակներից։ Որոշ դեպքերում դա հուզերի արդյունք է, որոշ դեպքերում՝ բանակցությունների վրա ազդելու ու կառավարելու փորձ», - նշեց Լուկյանովը։

Հակառակորդը փոխել է մարտավարությունը. Արծրուն Հովհաննիսյանը մանրամասներ է ներկայացնում

Մեր զրուցակիցն անդրադարձավ նաև այն հարցին, թե ինչպես են արտաքին գործընկերները, մասնավորապես Ռուսաստանը, ընկալում այդպիսի հուզական պոռթկումները։ Նրա խոսքով` հակամարտության թեման ակտիվ քննարկվում է նաև ռուսական դիվանագիտական տիրույթում։ Որպես բանակցային գործընթացի քարշակի, Մոսկվայի հռետորաբանությունն ուղղված է դիվանագիտական լուծմանը գնալուն, և բնականաբար նման հայտարարությունները բավականին տարօրինակ դրության մեջ են դնում մարդկանց, որոնք զբաղվում են այդ լուծումների մշակմամբ։ Մյուս կողմից՝ ՀՀ վարչապետը հայտնի է կտրուկ հայտարարություններով, նրա քաղաքական խառնվածքի տեսակին արդեն ծանոթ են։

«Սակայն նա դաշնակից երկրի առաջնորդ է։ Այդ հայտարարությունը չի ազդի դիվանագիտական գործընթացի վրա։ Ընդ որում՝ պետք է հասկանալ, որ Փաշինյանն այդ խոսքերից հետո արտգործնախարարին բանակցություններից հետ չի կանչել, որևէ դեմարշ չի արել», - նշեց Լուկյանովը։

Հիշեցնենք` Հայաստանի և Ադրբեջանի արտգործնախարարներ Զոհրաբ Մնացականյանն ու Ջեյհուն Բայրամովը հոկտեմբերի 9–ին Մոսկվա էին մեկնել` խորհրդատվություններ անցկացնելու։ ՌԴ արտգործնախարար Սերգեյ Լավրովի հետ համատեղ հանդիպումը տևեց գրեթե 11 ժամ և ավարտվեց համաձայնագրի ընդունմամբ, որը հակամարտության կարգավորման չորս կետ է պարունակում։

Մասնավորապես, կողմերը պայմանավորվել են, որ հոկտեմբերի 10-ին, ժամը 12։00-ից սկսած հումանիտար նպատակներով հրադադար կհաստատվի ռազմագերիներին, այլ պահվող անձանց և զոհվածների մարմինները փոխանակելու համար՝ Միջազգային Կարմիր խաչի չափանիշներին համապատասխան։ Հրադադարի վերաբերյալ պայմանավորվածությունից հետո Ադրբեջանը շարունակում էր հրետակոծել Արցախը։

Հոկտեմբերի 17-ին ՀՀ արտգործնախարարությունը հայտնեց, որ Հայաստանի Հանրապետությունը և Ադրբեջանի Հանրապետությունը երկրորդ պայմանավորվածությունն են ձեռք բերել. որոշվել է հոկտեմբերի 18-ին, տեղական ժամանակով ժամը 00:00-ից հաստատել մարդասիրական զինադադար։

Արցախի ՊԲ–ն, սակայն, հոկտեմբերի 18-ի առավոտյան տեղեկացրեց, որ 07:20-ի սահմաններում հրետանային ակտիվ կրակից հետո ադրբեջանական զինուժը հարավային ուղղությամբ անցել է հարձակման: Երկուստեք եղել են զոհեր ու վիրավորներ:

Ադրբեջանը մինչև այսօր էլ խախտում է հրադադարի վերաբերյալ պայմանավորվածությունները։

129
թեգերը:
ԵԱՀԿ Մինսկի Խումբ, Արցախ, Ղարաբաղյան հակամարտություն, Լեռնային Ղարաբաղ, Նիկոլ Փաշինյան, Ռուսաստան, Մոսկվա
թեմա:
Ադրբեջանական ագրեսիան Արցախում - 2020 (1554)
Ըստ թեմայի
Ղարաբաղում խաղաղապահների տեղակայումը դեռ քիչ հավանական է․ ռուս փորձագետը բացել է փակագծերը
ԱՄՆ-ն անհանգստացած է. Թուրքիայում հնարավոր ահաբեկչությունների մասին տեղեկություններ կան
Դատապարտեք Ադրբեջանի քայլերը. հայ երիտասարդներն ակցիա են արել Բեյրութում