ԵՐԵՎԱՆ, 4 հոկտեմբերի - Sputnik. Արցախի նախագահ Արայիկ Հարությունյանը տեղեկացնում է, որ այս պահի դրությամբ հանձնարարել է դադարեցնել կրակը Գյանջայի ուղղությամբ՝ քաղաքացիական բնակչության շրջանում անմեղ զոհերից խուսափելու համար:
«Եթե որևէ մեկի մոտ Գյանջան հարվածելու մասին իմ հայտարարությունն ընկալելու խնդիր է եղել, վերահաստատում եմ, որ դա ամենևին կատակ չէր: Իմ հրամանով այսօր Պաշտպանության բանակը Գյանջա քաղաքում տեղակայված ռազմական օբյեկտների վնասազերծման նպատակով հասցրել է մի քանի հրթիռային հարված»,–Facebook սոցացնցի իր էջում գրել է Հարությունյանը։
Նրա խոսքով` թշնամու կողմից համապատասխան հետևություններ չանելու պարագայում շարունակվելու են համաչափ ու հուժկու հարվածները՝ կազմալուծելով և կազմաքանդելով թշնամու բանակը և թիկունքը։ Արցախի նախագահը վստահեցնում է` մինչև վերջ վճռական ենք մեր գործողություններում:
«Կա՛նգ առեք, քանի դեռ ուշ չէ»,–զգուշացնում է Հարությունյանը։
Քիչ առաջ հայտնի դարձավ, որ ՊԲ–ն խոցել է Գյանջայի ռազմական օդանավակայանը։ Դրան հաջորդեց Ադրբեջանի նախագահի օգնական Հիքմեթ Հաջիևի հայտարարությունը, թե կրակել է Հայաստանի ԶՈւ–ն։ ՀՀ ՊՆ–ն հերքեց այդ լուրերը։
Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։
Հոկտեմբերի 3-ի ժ. 22։00-ի դրությամբ` հակառակորդի կրակոցների հետևանքով զոհվել են 202 զինծառայողներ և 8 քաղաքացիական անձինք։ Հայկական կողմը շուրջ 200 վիրավոր ունի։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 2730 զոհ ունի, 4400 վիրավոր։ Հակառակորդը նաև զինտեխնկայի զգալի կորուստ ունի և շարունակում է գրանցել։
Ըստ վերջին տվյալների ՝ Ադրբեջանի զինված ուժերը կորցրել են 14 ինքնաթիռ, 14 ուղղաթիռ, 123 անօդաչու սարք, 3 ՏՈՍ-1 «Սոլնցեպեկ», 4 «Սմերչ» համազարկային կրակի ռեակտիվ համակարգ, 372 տանկ և ՀՄՄ:
Առաջնագծում գտնվող տղաներն անում են անհնարինը. տեսանյութ
Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։
Հայացք թաքստոցից․ մահվան աչքերին նայած արցախցիները․ լուսանկարներ
