ԵՐԵՎԱՆ, 30 հունիսի - Sputnik. Առաջիկա օրերին Արցախում արտադրված բժշկական նշանակության տարբեր պարագաներ կուղարկվեն ԱՄՆ։ Արցախի Հանրապետության Ազգային Ժողովի պատգամավոր Դավիթ Մելքումյանը Facebook-ի իր էջում գրառում է կատարել՝ նշելով, որ օգնությունը մեծ չի լինի, բայց խորհրդանշական բնույթ կունենա. դրանով Արցախի Հանրապետությունն իր հնարավորությունների սահմաններում կմիանա կորոնավիրուսի համավարակի դեմ համաշխարհային պայքարին։
«Մեծ սիրով տեղեկացնում եմ, որ պետական համապատասխան կառույցների ղեկավարների՝ խորհրդարանի նախագահի, պետնախարարի, ԱԳ նախարարի հետ կառուցողական քննարկումների արդյունքում համաձայնություն ձեռք բերվեց Արցախի ժողովրդի անունից Արցախում արտադրված բժշկական նշանակության պարագաներ ուղարկել Կալիֆոռնիա նահանգ՝ օգնելու ԱՄՆ բարեկամ ժողովրդին և մեր հայրենակիցներին կորոնավիրուսի համավարակի դեմ պայքարում»,- գրել է Մելքումյանը։
Այս գաղափարի համար ԱԺ պատգամավորը շնորհակալություն է հայտնել քաղաքագետ Սուրեն Սարգսյանին։
Նշենք, որ ընդամենը ժամեր առաջ Սարգսյանը Facebook-ի իր էջում գրառում էր կատարել՝ ընդգծելով՝ հիմա ամենահարմար պահն է, որ Արցախը օգնության ձեռք մեկնի ԱՄՆ-ին։ Նա առաջարկել էր Արցախի իշխանություններին «Made in Artsakh» գրությամբ դիմակներ և ալկոգելներ առաքել ԱՄՆ:
Նրա կարծիքով՝ սա այս փոքր, բայց սիմվոլիկ օգնությունը շատ տեղին ու ժամանակին կլինի մեր լոբբիստների աշխատանքի համար, բացի այդ, պատմական հնարավորություն է ցույց տալու համար, որ Արցախը չճանաչված, բայց կայացած պետություն է։
Հիշեցնենք, որ կորոնավիրուսային հիվանդության տարածվածության առումով ԱՄՆ–ն աշխարհում առաջին տեղում է։ Այսօրվա տվյալներով` Միացյալ Նահանգներում COVID-19 է հայտնաբերվել 2 681 811 մարդու մոտ։ Մահվան ելքերը 128 783–ն են։
Հայաստանը 1 հորիզոնականով նահանջել է աշխարհի կորոնավիրուսային հակավարկանիշում
