ԵՐԵՎԱՆ, 14 ապրիլի – Sputnik. Արցախի նախագահ Բակո Սահակյանը Ստեփանակերտի 1/22 ընտրական տեղամասում քաղաքացիական պարտքը կատարելուց հետո պատասխանեց լրագրողների հարցերին, որոնցից մեկն էլ վերաբերում էր ընտրողների սակավությանը։
«Աշխատանքը կազմակերպվել է այնպես, որ այստեղ կուտակումներ չլինեն: Մենք ենթադրում էինք, որ երկրորդ փուլի մասնակիցներն ավելի քիչ են լինելու, քան առաջին փուլում, բայց դա պայմանավորված է անվտանգության կանոնների պահպանմամբ, երկրորդ փուլի առանձնահատկություններով»,- ասաց նա:
Արցախի Հանրապետությունում այսօր անցկացվում է նախագահական ընտրությունների երկրորդ փուլի քվեարկությունը։
Տարածքային ընտրական հանձնաժողովների տվյալների համաձայն՝ ժամը 14:00-ի դրությամբ քվեարկությանը մասնակցել է 29 հազար 443 ընտրող կամ ընտրողների 28.4%-ը:
Արցախում մարտի 31–ին կայացած նախագահական ընտրությունների առաջին փուլի արդյունքում նախկին վարչապետ (պետնախարար) «Ազատ Հայրենիք» կուսակցության ղեկավար Արայիկ Հարությունյանը ստացել է ձայների 49,26%-ը, արտգործնախարար Մասիս Մայիլյանը՝ 26,4%։-ը
Հիշեցնենք՝ ԱՀ նախագահ Բակո Սահակյանի հրամանագրով Արցախում կորոնավիրուսի տարածումը կանխելու նպատակով արտակարգ դրություն է հայտարարվել։
Վերջին տվյալներով՝ ԱՀ-ում կորոնավիրուսի վարակով հաստատված 6 քաղաքացի կա, որոնցից երեքի վիճակը գնահատվում է բավարար, երկուսինը՝ միջին ծանրության, մյուսի մոտ վարակին բնորոշ ախտանիշներ չկան: