ԵՐԵՎԱՆ, 1 ապրիլի- Sputnik, Ժաննա Կրիկորովա. Նախնական ոչ պաշտոնական տվյալներով՝ Արցախի Հանրապետության նախագահի ընտրությունների երկրորդ փուլ կանցկացվի։ Թեկնածուներից որևէ մեկը չի հաղթահարել ընտրողների ձայների 50% շեմը։
ԼՂՀ ԿԸՀ տվյալներով՝ քվեարկությանը մասնակցած 76471 ընտրողներից ավելի քան 31 հազարը քվեարկել է նախագահի թեկնածու Արայիկ Հարությունյանի օգտին։ Երկրորդ տեղում Մասիս Մայիլյանն է, որի օգտին քվեարկել է 16,5 հազար ընտրող, ապա Վիտալի Բալասանյանն է, որն ընտրողների 9,5 հազար քվե է ստացել։ Նշված տվյալներում ներառված չենՄարտակերտի ընտրատեղամասերի արդյունքները. դրանք դեռևս հաշվարկվում են։
Հավելենք, որ խորհրդարանական ընտրությունների արդյունքները դեռևս հրապարակված չեն ԿԸՀ կայքում։ Sputnik Արմենիայի թղթակցի հետ զրույցում ԿԸՀ-ից տեղեկացրեցին, որ հրապարակված տվյալները դեռևս ճշգրտվում են, որովհետև անհամապատասխանություններ կան քվեաթերթիկների և քվեարկողների թվերի միջև
Արցախի Հանրապետության ընտրական օրենսգրքի համաձայն՝ քվեարկության նախնական արդյունքները կհրապարակվեն քվեարկության ավարտից հետո քսանչորս ժամվա ընթացքում։
Թեկնածուները ձեռնոց նետեցին․ Արցախում անցկացված ընտրություններին բոլորը դիմակով էին
«Ձայների հաշվարկի ընթացքը շարունակվում է, խնդրում ենք ըմբռնումով մոտեցեք հանձնաժողովականների աշխատանքին, ի վերջո այդպիսի ծավալի աշխատանք մեր հանձնաժողովականները չեն ունեցել. ունեինք նախագահի 14 թեկնածու, 10 կուսակցություն և 2 դաշինք»,- հաղորդում են ԿԸՀ-ից։
Անկանխատեսելի ընտրություններ Արցախում. ո՞վ է ֆավորիտը
Sputnik Արմենիայի թղթակիցը զրուցել է նաև ԱՀ ՊԲ լրատվության և հասարակայնության հետ կապերի բաժնի ղեկավար Սենոր Հասրաթյանի հետ։ Նրա խոսքով՝ շփման գոտում իրավիճակը հանգիստ է եղել։
Հիշեցնենք` Արցախի Հանրապետությունում երեկ կայացել են նախագահական և խորհրդարանական ընտրությունները, նախնական արդյունքների մասին պաշտոնական տեղեկություն դեռ չկա: Նախագահի պաշտոնի մրցապայքարում ընտրություններին մասնակցում է 14 թեկնածու, խորհրդարանական ընտրություններին մասնակցում են 12 քաղաքական ուժեր։
