Արթուր Վանեցյան

Արցախում նոր բնակավայր է կառուցվելու. Վանեցյանը հայտարարել է` ոչ մի թիզ հող հետ չենք տալու

753
ՀՀ ազգային անվտանգության ծառայության տնօրեն Արթուր Վանեցյանն արցախյան այցի ընթացքում ծանոթացել է երկրի հարավում նախագծված ապագա բնակավայրին։

ԵՐԵՎԱՆ, 1 մարտի — Sputnik. Արցախի հարավում`Արաքսի հովտում, առաջիկայում կկառուցվի 150 բնակելի տներից բաղկացած նոր բնակավայր։ Արցախի հանրային հեռուստաընկերությունը հայտնում է, որ Արցախի իշխանությունները երկրի հարավային հատվածի վերաբնակեցման նախագիծը ներկայացրել են ՀՀ ազգային անվտանգության ծառայության տնօրեն Արթուր Վանեցյանին։

Ըստ նախագծի` նոր բնակավայրի բնակելի տներից յուրաքանչյուրն ունենալու է 3 սենյակ և 1200 քմ տնամերձ հողամաս։ Բնակավայրում կառուցվելու են նաև հանրային, հասարակական ու մարզական կառույցներ։

Ծանոթանալով վերաբնակեցման ծրագրին` Վանեցյանն այն որակել է երկրի անվտանգության հիմնական երաշխիք։

«Անընդհատ շահարկվում է, թե հողերը հետ են տալու, բանակցելու են, զիջելու են և այլն։ Այս ծրագրի իրականացման արդյունքում մենք հստակ ուղերձ ենք տալու մեր ժողովրդին և աշխարհին, որ մենք ոչ մի թիզ հող հետ տալու նպատակ չունենք։ Մեր հողում պետք է բնակվեն մեր հայրենակիցները և շենացնեն մեր երկիրը»,– ասել է Վանեցյանը։

Արաքսի ափին կառուցվող ապագա բնակավայրը կոչվելու է Արաքսավան։ Նախագիծն արդեն թղթի վրա է, մնում է ֆինանսավորումը։

Հիշեցնենք` փետրվարի 27-ին ՀՀ ազգային անվտանգության ծառայության տնօրեն Արթուր Վանեցյանն Արցախի Հանրապետության նախագահ Բակո Սահակյանի հետ այցելել է արցախա-ադրբեջանական սահմանագծի հարավային հատված, տեղում ծանոթացել զինվորների ծառայության ընթացքին, սահմանին տիրող իրավիճակին ու ապագայի ծրագրերին։

753
թեգերը:
Արթուր Վանեցյան, Արցախ
Ըստ թեմայի
Ալիևը հայտարարել է` ղարաբաղյան հակամարտության կողմերը միայն Բաքուն ու Երևանն են
Ինչպես պետք է կարգավորվի Ղարաբաղյան հակամարտությունը. պատասխանում է Սարգսյանը
«Լրացուցիչ ժամանակ կպահանջվի». Լավրովը` Ղարաբաղյան հակամարտության կարգավորման մասին
Հայաստանը ղարաբաղյան խաղաղ կարգավորման կողմնակից է. Միրզոյանը` Դաշնային Խորհրդում