Ստեփանակերտ

Արցախում ավելացել է ռուսաստանցի զբոսաշրջիկների թիվը

15
(Թարմացված է 13:00 05.06.2017)
Ռուսաստանի քաղաքացիների համար սահմանված նոր կանոնների կիրառումը դրական ազդեցություն է ունեցել նաև Արցախի զբոսաշրջության ոլորտի զարգացման վրա։

ԵՐԵՎԱՆ, 5 հունիսի – Sputnik. Ռուսաստանի քաղաքացիները կարողանում են Հայաստան այցելել իրենց ներքին անձնագրերով, և այդ հանգամանքն ավելացրել է նաև Ռուսաստանից Արցախ եկող զբոսաշրջիկների թիվը. Ստեփանակերտում լրագրողներին ասաց Արցախի վարչապետ Արայիկ Հարությունյանը։

Վարչապետի խոսքով` եթե նախորդ տարի զբոսաշրջային ակտիվության անկում էր գրանցվել, ապա այս տարի աճ է արձանագրվել։

«ՀՀ կառավարությունը մի շարք քայլեր է ձեռնարկել զբոսաշրջության զարգացման համար, այդ թվում վիզային արտոնություններ է տրամադրել Հայաստան այցելող ՌԴ քաղաքացիներին։ Այդ քայլն, անկասկած, դրական ազդեցություն է ունեցել», – ասաց Հարությունյանը։

Նրա խոսքով` զբոսաշրջությունն այն ոլորտներից է, որտեղ մարդիկ պատրաստ են ներդրումներ անել։ Հարությունյանը նշեց, որ կառավարությունը շարունակում է աշխատել նաև տնտեսության մյուս ոլորտները զարգացնելու ուղղությամբ։

2017 թվականի փետրվարի 23–ից Ռուսաստանի քաղաքացիները կարող են Հայաստան այցելել ներքին անձնագրերով։ Քաղավիացիայի գլխավոր վարչության տվյալների համաձայն` մեկ ամսվա ընթացքում ներքին անձնագրերով Հայաստան է այցելել ՌԴ 3091 քաղաքացի։

Русская версия

15