ԵՐԵՎԱՆ, 30 ապրիլի — Sputnik. Ստեփանակերտի երեխաների խնամքի և պաշտպանության թիվ 1 գիշերօթիկ հաստատության տնօրեն Նոնա Մուսայելյանն «Արցախպրես»-ի թղթակցի հետ զրույցում ասել է, որ ի ուրախություն բոլորի` Արցախում կազմավորվեց ևս մի նոր ընտանիք:
«Մեր հաստատության 17-ամյա Լուսինեն ամուսնացել է ստեփանակերտցի Էդգար Բաբայանի հետ: Լուսինեն շատ բարի, գեղեցիկ, համեստ, խելացի աղջիկ է: Ծնողները գտնվում են սոցիալապես անապահով վիճակում, որի պատճառով էլ 9 տարի առաջ նրան մեզ մոտ են բերել»,- ասել է Մուսայելյանը և տեղեկացրել, որ նրանք այս պահին գտնվում են Ստեփանակերտի «Դվին» ռեստորանում, որտեղ անցկացվում է հարսանեկան արարողությունը:
Մուսայելյանի խոսքով՝ սա իրենց հաստատությունում արդեն 6-րդ հարսանիքն է:
