ԵՐԵՎԱՆ, 12 ապրիլի — Sputnik. Լյուքսեմբուրգից Եվրոպական խորհրդարանի պատգամավոր Ֆրանկ Էնգելսը մտադիր է հարսանիքն անել Արցախում, այդ մասին DennikN պարբերականում գրել նրա գործընկերը՝ Սլովակիայից Բորիս Զալան։ Բորիս Զալան դիտորդի կարգավիճակում մասնակցում էր Հայաստանի խորհրդարանական ընտրություններին։
Նա պատմեց Հայաստանի մասին իր տպավորությունները` հոդվածի զգալի մասը նվիրելով գործընկերոջ՝ Ֆրանկ Էնգելսի ծրագրերին։ Նրա խոսքով` Եվրոպական խորհրդարանի պատգամավոր, Լյուքսեմբուրգի ներկայացուցիչ Ֆրանկ Էնգելը որոշեց ծանոթացնել Զալային հայկական խոհանոցի հետ։
«Խոհանոցը հիասքանչ էր, հատկապես գառան ուտեստը և ստերլետ ձուկը։ Ֆրանկը ոչ միայն սիրահարվել է հայկական խոհանոցին, այլև` մի աղջկա։ Նա արդեն հարսանիք է կազմակերպում, այն էլ` անմիջապես Արցախում»,- գրել է Զալան։
Ավելի վաղ Ֆրանկ Էնգելը (Լյուքսեմբուրգից), Յարոմիր Շտետինան (Չեխիա) և Էլենի Թեոխարուսը (Կիպրոս) այցելեցին Ղարաբաղ, որտեղ հետևում էին փետրվարի 20-ին տեղի ունեցած սահմանադրական բարեփոխումների ընթացքին։
Ադրբեջանը դրանից հետո Եվրախորհրդարանի պատգամավորներին միջազգային հետախուզում հայտարարեց։ Սակայն, ինչպես Sputnik Արմենիային հայտնեցին ոստիկանությունից, Եվրախորհրդարանի նշված պատգամավորների նկատմամբ Ինտերպոլը միջազգային հետախուզում չէր հայտարարել։
