ԵՐԵՎԱՆ, 21 մարտի — Sputnik. «Մեկնում եմ Արցախ» մարտի 18-ին, Livejournal-ի իր բլոգում գրել է ռուս հայտնի բլոգեր Անտոն Նոսիկը:
«Կարծիք կա, որ յուրաքանչյուր ոք, ով գալիս է այստեղ, խախտում է Ադրբեջանի տարածքային ամբողջականությունը: Ինձ դա չի հուզում,- գրում է Նոսովը,- այնտեղ, ուր մարդակեր Ռամիլ Սաֆարովին ազգային հերոս են համարում, իսկ բլոգեր Լապշինին՝ պետական վտանգավոր հանցագործ, արժանի չէ, որ ես հաշվի առնեմ նրա կարծիքը «ճիշտ» սահմանների մասին»:
Ի դեպ, թե՛ Լապշինի արտահանձնումը Մինսկի կողմից, և թե՛ Սաֆարովի ազատ արձակումը հունգարական բանտից, բլոգերը որակում է իբրև «նավթադոլարներով վճարված գործարքներ»:
Նոսովը միակ ռուսաստանցի բլոգերը չէ, որն այս օրերին Արցախում է: Հայ բլոգերների նախաձեռնությամբ Արցախում կազմակերպվել է մասնագիտական համաժողով, որի շրջանակում Արցախ են այցելել մի խումբ ռուսաստանցի բլոգերներ ու լրագրողներ:
Մեկ այլ բլոգեր՝ Ալեքսանդր Ալիմովն իր տեսաբլոգում տեսանյութ է հրապարակել, որտեղ ներկայացնում է Արցախի մայրաքաղաք Ստեփանակերտի տեսապատկերը, որտեղ երևում է նաև, թե ինչպես են ռուսաստանցի հյուրերը հարցազրույցներ տալիս ղարաբաղյան լրատվամիջոցներին:
Ֆեյսբուքյան օգտատերերից մեկի դիտարկմանը, թե կարևորը Արցախից վերադառնալուց հետո Բելառուս չայցելելն է, Ալեքսանդր Ալիմովը պատասխանել է, որ իրենց հետ Արցախում նաև բելառուս բլոգեր կա:
Ռուսաստանցի բլոգերներն Արցախ կատարած այցով իրենց բողոքն են արտահայտել ընդդեմ գործընկեր Ալեքսանդր Լապշինի նկատմամբ Ադրբեջանի իշխանությունների հարուցած քրեական գործի:
