ԵՐԵՎԱՆ, 16 հունվարի – Sputnik. Լեռնային Ղարաբաղից Սոչի մեկնած ուրախների և հնարամիտների երկու թիմերը` «Աղ ու հացով»-ն ու «Դլե յաման»–ը, հունվարի 13-ին ելույթ են ունեցել Սոչիում ընթացող «Կիվին-2017» միջազգային 28-րդ փառատոնում:
Ադրբեջանական լրատվամիջոցները, սակայն, այսօր, վկայակոչելով իրենց երկրի Սպորտի և երիտասարդության նախարարությանը, հայտնել են, որ ՈւՀԱ-ի ղեկավարությունը ղարաբաղյան թիմերին հեռացրել է Սոչիի փառատոնից: Հրապարակման համաձայն` ՈւՀԱ-ի միջազգային միությունը քննարկել է Ադրբեջանի սպորտի և երիտասարդության հարցերի նախարարության դիմումն ու որոշել է փառատոնից հեռացնել ղարաբաղյան թիմերին:
Ստեփանակերտի երկու թիմերի ներկայացուցիչները, որոնք այս պահին դեռևս Սոչիում են, Sputnik Արմենիայի հետ հեռախոսազրույցում հերքեցին այդ լուրը։
«Ալեքսանդր Մասլյակովն այս ամբողջ իրավիճակին տեղյակ է և տիրապետում է այդ իրավիճակին: Ես էլ եմ հենց նոր կարդացել ադրբեջանական հրապարակումները: Պարզապես վրդովված եմ, որովհետև, երբ ադրբեջանական թիմը ՈւՀԱ-ին մասնակցելու հայտ էր ներկայացնում, նրանք նախ մեր թույլտվությունը հարցրին, որպեսզի իրենց թիմը «Ղարաբաղ» կոչեն: Մենք թույլ տվեցինք: Ու հիմա այս մարդիկ ինչ-որ տեղեկություններ են փնտրում, որ այլափոխված կերպով ներկայացնն աշխարհին: Իսկ Ալեքսանդր Մասլյակովն ասաց, որ ՈւՀԱ-ում չկա ազգերի, մաշկի գույնի տարբերակում: Դա միայն խաղ է, շոու բիզնես է, և պետք չէ ձեր կոնֆլիկտը խցկել այնտեղ»,- ասաց «Դլե Յաման» թիմի մասնակից Անդրանիկ Մեսրոպյանը։
ԼՂՀ երկու թիմերն էլ փառատոնում ներկայացված են իբրև Ստեփանակերտի թիմեր: «Այստեղ երկրներ չեն ներկայացվում, ներկայացվում են առանձին քաղաքներ ներկայացնող ՈւՀԱ-ի թիմեր, առանձին թիմեր՝ կոնկրետ քաղաքից»,- ասաց Գեորգի Ավետիսյանը:
Ի դեպ, «Աղ ու հացով» թիմն իր ելույթի համար ռեյտինգային բարձր՝ 3-րդ կարգի գնահատականի է արժանացել՝ իրավունք ստանալով մասնակցել կենտրոնական լիգայի խաղերին:
Ղարաբաղյան երկու թիմերն էլ Սոչիում անցկացվող «Կիվին-2017» միջազգային 28-րդ փառատոնին մասնակցության հրավեր էին ստացել՝ ստորագրված անձամբ ՈւՀԱ-ի միջազգային կոմիտեի նախագահ Ալեքսանդր Մասլյակովի կողմից: Իսկ այն փաստը, որ նրանք մասնակցում են փառատոնին, ապացուցում են ՈւՀԱ-ի պաշտոնական կայքում առկա հրապարակումներն ու նկարները, որոնք ներկայացնում ենք ստորև:
