Ֆրանկ Վալտեր Շտայնմայեր

ԵԱՀԿ նախագահը մտադիր է այցելել Լեռնային Ղարաբաղ

34
ԵԱՀԿ–ի ղեկավար Ֆրանկ Վալտեր Շտայնմայերը հանդիպել է Լեռնային Ղարաբաղի խնդրով զբաղվող ԵԱՀԿ ՄԽ համանախագահների հետ` քննարկելու իր ղարաբաղյան այցը

ԵՐԵՎԱՆ, 23 հունիսի — Sputnik. ԳԴՀ ԱԳՆ ղեկավար, ԵԱՀԿ նախագահ Ֆրանկ Վալտեր Շտայնմայերի առաջիկա այցը տարածաշրջան քննարկվել է հինգշաբթի Ղարաբաղի հարցով ԵԱՀԿ ՄԽ համանախագահների հետ հանդիպման ժամանակ, հայտնում է ՌԻԱ Նովոստին` հղում անելով կազմակերպության մամուլի ծառայությանը։

Հաղորդագրության համաձայն` Շտայնմայերը ԵԱՀԿ ՄԽ համանախագահների հետ քննարկել է ղարաբաղյան կարգավորման հարցը Բեռլինում։ Ավելի վաղ միջնորդների հետ հանդիպման մասին տեղեկությունը հայտնվել էր Շտայնմայերի Twitter-ի էջում։

«Շտայնմայերը ողջունել է վերջին դրական փոփոխությունները` կապված հրադադարի ռեժիմի պահպանման հետ։ Հանդիպման մասնակիցները համաձայնել են, որ հրադադարի պահպանման կայուն ռեժիմն ու քաղաքական բանակցություններին վերադարձը անփոխարինելի են։ Այսօրվա բանակցությունների ընթացքում քննարկվել են նաև հետագա հավանական քայլերը Լեռնային Ղարաբաղի հակամարտության կարգավորմանը հասնելու համար, ինչպես նաև Շտայնմայերի առաջիկա այցը տարածաշրջան», — գրված է հաղորդագրության մեջ։

Մամուլի ծառայությունից ավելացրել են, որ հինգշաբթի հանդիպման ընթացքում ՄԽ համանախագահները, ՌԴ և Ֆրանսիայի դեսպաններ Իգոր Պոպովն ու Պիեր Անդրիեն պատմել են Շտայնմայերին Սանկտ Պետերբուրգում հունիսի 20-ին տեղի ունեցած Հայաստանի, Ադրբեջանի և Ռուսաստանի Դաշնության նախագահների զրույցի արդյունքների և տարածաշրջանում ԵԱՀԿ նախագահի անձնական ներկայացուցիչ Անջեյ Կասպրշիկի կորպուսի մեծացման մասին։ Կորպուսի ընդլայնումը կնպաստի լրացուցիչ միջազգային դիտորդներ հակամարտության գոտի բերելուն։

Ղարաբաղյան հակամարտությունը սրվեց ապրիլի 2-5–ն ընկած ժամանակահատվածում։ Երևանը հայտարարեց, որ Ադրբեջանը նախահարձակ գործողություններ է սկսել, Բաքուն էլ իր հերթին հայտարարեց, որ հայկական կողմն է կրակում Ադրբեջանի ուղղությամբ։ Պաշտոնական տվյալների համաձայն` հակամարտության երկու կողմն էլ զոհեր ունեցան, այդ թվում` խաղաղ բնակիչների շրջանում։

Ապրիլի 5-ին Մոսկվայի աջակցությամբ կողմերը պայմանավորվեցին դադարեցնել ռազմական գործողությունները, սակայն շփման գծում խախտումները շարունակվում են մինչ օրս։ Մայիսի 16-ին Վիեննայում կայացավ Հայաստանի և Ադրբեջանի նախագահներ Սերժ Սարգսյանի և Իլհամ Ալիևի` հակամարտության թեժացումից հետո առաջին հանդիպումը, որին մասնակցեցին նաև ԵԱՀԿ Մինսկի խմբի համանախագահները։

Սարգսյան-Ալիև հանդիպմանը համանախագահող երկրների ներկայացուցիչները պնդեցին 1994թ.–ի զինադադարի և 1995թ.–ի զինադադարի ամրապնդման մասին համաձայնագրերի անշեղ իրագործման անհրաժեշտությունը: Համաձայնություն ձեռք բերվեց քայլեր ձեռնարկել դրանց իրականացման մշտադիտարկման և միջադեպերի հետաքննության մեխանիզմի ներդրման, ԵԱՀԿ գործող նախագահի անձնական ներկայացուցչի թիմի կարողությունների ավելացման, հակամարտության կարգավորման բանակցային գործընթացի հնարավոր վերսկսման ուղղությամբ։

34