ԵՐԵՎԱՆ, 17 հունիսի — Sputnik. Ռուսաստանցիների գրեթե քառորդ մասը (23 տոկոս) համարում է, որ ԱՄՆ-ն և ՆԱՏՕ-ն մեղավոր են Ղարաբաղյան հակամարտության սրման մեջ։ Դա են վկայում «Լևադա կենտրոնի» անցկացրած հարցախույզի տվյալները։
Հարցվածների 19 տոկոսը համարում է, որ հակամարտության թեժացման մեղավորն ադրբեջանական կողմն է, 4 տոկոսի կարծիքով` հայկական կողմը։ 15 տոկոսը մեղադրում է Թուրքիային։
Ռուսաստանցիների մեծ մասը (67 տոկոս) չեզոք դիրքորոշում ունի այս հարցում։ Հարցվածների 15 տոկոսը սատարում է Հայաստանին, 4 տոկոսը` Ադրբեջանին։
Ռուսաստանցիների կեսից ավելին (66 տոկոս) կարծում է նաև, որ ՌԴ-ն պետք է չեզոք դիրք ունենա Ղարաբաղյան հակամարտության հարցում, 11 տոկոսը կարծում է, որ Ռուսաստանը պետք է օգնի հայկական կողմին, իսկ 3 տոկոսն էլ համարում է, որ Ադրբեջանն ունի Ռուսաստանի աջակցության կարիքը։
Ղարաբաղում ռուսական խաղաղապահ ուժեր տեղակայելու վերաբերյալ հարցին 46 տոկոսը պատասխանել է, որ կողմ է այդ գաղափարին, 36 տոկոսը պատասխանել է, որ դեմ է։
Ռուսաստանցիների գրեթե կեսը (44 տոկոս) կարծում է, որ Լեռնային Ղարաբաղը պետք է լինի անկախ պետություն, 11 տոկոսը հանդես է գալիս Հայաստանի մաս ճանաչելու օգտին, իսկ 6 տոկոսը` Ադրբեջանի։
Լեռնային Ղարաբաղում իրադարձությունների զարգացմանը հետևում է ռուսաստանցիների 11 տոկոսը, 59 տոկոսն ինչ-որ բան լսել է այդ մասին, իսկ հարցվածների 30 տոկոսն ընդհանրապես տեղյակ չէ, թե ինչի մասին է խոսքը։
Հարցումն անցկացվել է մայիսին 18 տարեկանից բարձր 800 ռուսաստանցիների շրջանում։ Տանն անցկացված անձնական հարցազրույցի միջոցով հարցերին պատասխանել են 48 շրջանի 137 բնակավայրերի բնակիչները։ Տվյալների վստահության միջակայքը տատանվում է 4,1 տոկոսի սահմանում:
