Брифинг официального представителя МИД России М.Захаровой

Զախարովա. ՌԴ–ն պատասխանատվությամբ է մոտենում ԵԱՀԿ Մինսկի խմբի աշխատանքին

760
Ռուսաստանի ԱԳՆ–ի պաշտոնական ներկայացուցիչ Մարիա Զախարովայի խոսքով` Ռուսաստանը ԵԱՀԿ ՄԽ ձևաչափի մասնակից է և շատ պատասխանատվությամբ է մոտենում իր պարտավորություններին

ԵՐԵՎԱՆ, 27 օգոստոսի– Sputnik. Ռուսաստանը մեծ պատասխանատվությամբ է մոտենում ԵԱՀԿ Մինսկի խմբի ձևաչափի շրջանակում ունեցած իր պարտավորություններին, հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։

«Հուսով ենք, որ ինչ–որ երկրների հետ Ռուսաստանի տարաձայնությունները, որոնք, ցավոք սրտի, առաջանում են ոչ մեր մեղքով, չեն անդրադառնա Մինսկի խմբի աշխատանքի վրա։ Մեր կողմից արգելքներ, հարցեր կամ խնդիրներ չեն կարող լինել։ Մենք այդ ձևաչափի մասնակիցն ենք»,–  հինգշաբթի ճեպազրույցում նշել է Զախարովան։

Նրա խոսքով` Ռուսաստանում հասկանում են, թե որքան լուրջ թեմա է դրված այդ խմբի օրակարգում։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ.–ի դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Հանրաքվեին հաջորդեցին Ադրբեջանի ձեռնարկած ռազմական լայնածավալ գործողությունները, որոնց հետևանքով Ադրբեջանը կորցրեց վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ.–ի մայիսի 12-ին զինադադարի վերաբերյալ եռակողմ համաձայնագիր կնքելուց հետո հակամարտության գոտում դադարեցին ռազմական գործողությունները, որոնց հետևանքով երկու կողմն ընդհանուր առմամբ շուրջ 25-30 հազար զոհ ունեցավ, իսկ մոտ մեկ միլիոն մարդ էլ ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակում, որի համանախագահներն են ԱՄՆ-ն, Ռուսաստանը և Ֆրանսիան:

760