ԵՐԵՎԱՆ, 14 ապրիլի – Sputnik. Գյումրիում այսօր արտակարգ պատահար է գրանցվել: Անկախության հրապարակում ծառայություն կատարելու ժամանակ ոստիկանության ծառայողները փորձել են պարզել քաղաքացիների ինքնությունը:
Կանգնեցրել են ավտոմեքենան և խնդրել ցույց տալ արտակարգ դրության համար նախատեսված տեղաշարժի թերթիկը։ Սակայն վերջիններն առանց որևէ պատճառի վիճաբանել են ոստիկանության ծառայողների հետ, որի ժամանակ նրանցից մեկը դանակահարել է ճանապարհային ոստիկանության աշխատակիցներից մեկին և ոստիկանության մեկ ծառայողի։
Ինչպես Sputnik Արմենիային տեղեկացրին ՀՀ ոստիկանության «Կումայրի» բաժնից, ոստիկանների օպերատիվ և ճիշտ գործողությունների արդյունքում հնարավոր է եղել վնասազերծել դանակով զինված քաղաքացուն, որը բերման է ենթարկվել։ Ոստիկանները տեղափոխվել են «Գյումրի» բժշկական կենտրոն: Մեկի ոտքն է վնասված, մյուս ոստիկանի՝ կողոսկրերը: Կատարվում է քննություն:
Երթուղայինների վարորդներն աջակցություն են պահանջում. ինչ են ասում քաղաքապետարանից
«Գյումրի» ԲԿ-ից էլ տեղեկացրին, որ այսօր իրենց մոտ են ընդունվել սուր կտրող-ծակող գործիքով մարմանական վնասվածքներ ստացած երկու քաղաքացի: Տուժածներից՝ 1995 թվականին ծնված Ա. Բ-ի մոտ ախտորոշվել է կրծքավանդակի կտրած-ծակած վերք, իսկ 1989 թվականին ծնված Ա. Հ.-ի մոտ աշխատորշվել է ձախ ազդրի կտրած-ծակած վերք: Տուժածների վիճակը կայուն է, կատարվել է վերքերի վիրաբուժական զննում, սահմանավել է հսկողություն:
