ԵՐԵՎԱՆ, 28 հուլիսի — Sputnik. Լուսադեմին «Էրեբունի» բժշկական կենտրոնում մահացել է վերելակի անսարքության պատճառով մարմնական վնասվածքներ ստացած երկրորդ վիրավորը։ Այս մասին հայտնում է Sputnik Արմենիայի թղթակիցը։
Մահացածը երևանի բնակիչ 59-ամյա Ա.Մ.-ն է, ով աշխատում էր Այվազովսկու փողոցում գտնվող նոր կառուցվող շինության տարածքում։ Այստեղ, ըստ լուրերի՝ ռեստորանային համալիր է կառուցվում։
Դեպքը տեղի էր ունեցել երեկ`ժամը 18-ի սահմաններում. հիմնականում շինարարական աշխատանքների համար ծառայող վերելակի պարանը պոկվել էր ու վերելակում գտնվող 45-ամյա և 59-ամյա տաղամարդիկ տարբեր մարմնական վնասվածքներով տեղափոխվել էին Էրեբունի բժշկական կենտրոն։ Նրանց վիճակը գնահատվել էր ծայրահեղ ծանր։
Դեպքից մի քանի ժամ անց 45-ամյա տղամարդը գիտակցության չգալով մահացել էր։
Իրավապահները պարզում են կատարվածի հանգամանքները։ Նշանակվել է փորձաքննություն։
