ԵՐԵՎԱՆ, 27 հունիսի — Sputnik, Արմենուհի Մխոյան. Հունիսի 26-ին նորից կարկտահարություն է եղել Շիրակի մարզում: Այս անգամ տուժել են հիմնականում մարզի Ամասիայի և Ախուրյանի տարածաշրջանների գյուղական համայնքները:
20 րոպե տևած կարկուտը վնասել է 14 գյուղերի գյուղացիական տնտեսությունների մրգատու ծառերը, բանջարաբոստանային կուլտուրաներն ու ցանքատարածությունները։ Թեև դեռ վաղ է խոսել վնասի չափերից, բայց որոշ համայնքներում արդեն ակնհայտ է ՝ բնության տարերքն ավերել է ամեն ինչ:
Ահազանգից անմիջապես հետո, տուժած գյուղեր այցելած մարզային գյուղատնտեսության վարչության պետ Մովսես Մանուկյանը վստահեցնում է՝ տուժած գյուղերից շատերում վնասը մեծ է: «Շիրակում օրինակ ահավոր է առաջին հայացքից, բայց ստույգ միայն կկարողանաք ասել ուսումնասիրությունից հետո»:
Խոսելով նախորդ կարկտահարության վնասի մասին՝ պատասխանատուն փաստեց. «Դեռ ամբողջական պատկեր չունենք, բայց արդեն հստակ է՝ 30-100 տոկոս վնաս գրանցվել է: Աղետի պատճառած վնասը տարբեր գյուղերում տարբեր է: Հունիսի 24-ին կարկտահարության պատճառով ամենաշատը՝ մոտ 100 տոկոս, վնաս կրել են Սարատակ, Հոռում, Լուսակերտ, Բենյամին գյուղերը, իսկ այս անգամ ամենաշատը Շիրակն է տուժել: Այստեղ կարկուտը գետնին է հավասարեցրել գրեթե բոլոր մշակաբույսերը»,-պատմում է Մովսես Մանուկյանը:
Հավելենք, վաղվանից նոր հանձնաժողով կձևավորվի ու ուսումնասիրություններ կկատարի նոր գյուղերում: Սա այս ամսվա կարկտահարության երրորդ դեպքն է Շիրակում: Միայն հունիսի 4-ին գրանցված կարկտահարության ժամանակ տուժել էր 2060 հա տարածք՝ պատճառելով 560 մլն դրամի վնաս: Գրեթե նույն վնասը կանխատեսվում է հունիսի 24-ի կարկտահարությունից, իսկ հունիսի 27-ին ավելի շատ՝ տարածքն ավելի մեծ է Շիրակից մինչև Գեղանիստ:
