ԵՐԵՎԱՆ, 11 մայիսի — Sputnik. Մայիսի 10-ին, ժամը 01.35-ին ոստիկանության Սպիտակի բաժինը հաղորդում է ստացել հիվանդանոցից, որ «մեջքի շրջանի կտրած-ծակած վերքերով» բուժօգնության է դիմել Լեռնավան գյուղի 21-ամյա մի բնակիչ։
Sputnik Արմենիան որոշ մանրամասներ է իմացել Լոռու մարզում տեղի ունեցած դանակահարության մասին:
Ծայրահեղ ծանր վիճակում հիվանդանոց տեղափոխված 21-ամյա երիտասարդն ու նրան դանակահարած 32-ամյա տղամարդը ազգականներ են:
Վեճն ու դանակահարությունը տեղի են ունեցել նրանց հայրենի Լեռնավան գյուղում: Ըստ գյուղում շրջանառվող որոշ տեղեկությունների՝ միջադեպի համար լուրջ պատճառ չի եղել։ Դանակահարված երիտասարդի` Սպիտակում ապրող փեսայի խոսելաձևը դուր չի եկել դանակահարողին: Վերջինս այդ ամենը փորձել է պարզաբանել համագյուղացի երիտասարդի հետ: Պարզաբանումների ժամանակ էլ մեքենայից վերցրել է դանակն ու երեք անգամ հարվածել երիտասարդին՝ վնասելով նրա կրծքավանդակի ձախ կեսն ու թոքը:
Գյուղացիները վրա են հասել, դանակահարողի ձեռքից խլել են դանակն ու կատարվածի մասին տեղեկացրել վերջինս եղբորը, որն էլ շտապ վրա է հասել ու դանակահարված երիտասարդին հասցրել Սպիտակի հիվանդանոց:
Իրավապահները հայտնաբերել ու բերման են ենթարկել դանակահարող տղամարդուն: Մեր տեղեկություններով՝ և՛ տուժող, և՛ կատարող կողմը ալկոհոլի ազդեցության տակ են եղել, քանի որ նշել են «Հաղթանակի օրը»:
Հայտնի է, որ վիճաբանության ժամանակ տղամարդը դանակով 3 անգամ հարվածել է համագյուղացու թիկունքին։
Դեպքի առթիվ հարուցվել է քրեական գործ։
