ԵՐԵՎԱՆ, 12 ապրիլի – Sputnik. Երևան քաղաքի Մալաթիա-Սեբաստիա վարչական շրջանի բնակիչ, 57-ամյա Հարություն Սարգսյանը կալանավորվել է։ Ինչպես տեղեկացնում է Shamshyan.com-ը, ապրիլի 5-ին, ժամը 08։10-ի սահմաններում ոստիկանության Մալաթիայի բաժին ահազանգ էր ստացվել, որ Հարավ-Արևմտյան թաղամասի Անդրանիկի 90 շենքի բակում կրակոցներ են հնչել և կա վիրավոր։
Դեպքի վայր մեկնած իրավապահները նշված շենքի առաջին հարկում հայտնաբերել էին հրազենից արձակված 2 գնդակ։ Պարզվել էր նաև, որ դեպքի վայրից ոտքի մասում ստացած հրազենային վնասվածքով «Աստղիկ» բժշկական կենտրոն էր տեղափոխվել նշված շենքի բնակիչ Ջոնի Սամսոնյանը։
Գ. Շամշյանի տեղեկություններով՝ վերջինն աշխատում էր ՀՀ ՊՆ N զորամասում՝ որպես հրամանատար։ Հրազենային վնասվածք ստացած հրամանատարն ինքն էր հենց վնասազերծել իր վրա կրակողին, որը տեղափոխվել էր ոստիկանության Մալաթիայի բաժին։ Փաստի առթիվ հարուցվել էր քրեական գործ՝ ՀՀ քր. օր-ի 34-104 հոդվածի և 235 հոդվածի 1-ին մասի հատկանիշներով։
Հ. Սարգսյանը դատարանից տեղափոխվել է Նուբարաշեն քրեակատարողական հիմնարկ: